FAGOGO: O KATI LE LEOLEO NANA

[Sosoo ane loa lau faitau i le tatou tala faasolo mo lenei vaiaso, lea na gata mai i le vaiaso na tea nei i le taimi lea faateia ai le fafine ave taxi ina ua faailoa atu e Kati faamatalaga uma e uiga ia te ia.]

 

Na te’i le fafine ina ua faailoa e Kati talaaga uma e faatatau ia te ia, atoa ai ma le mafuaaga o lona i ai i totonu o le malo. Na fesili le fafine ia Kati pe i ai se mea o tupu, ae na faailoa i ai e le tama, o lo o i ai le vaega faatupu faalavelave o lo o taumafai e fasioti o ia, e ala i le faaaoga o se tamaitai e faatosina o ia la te momoe. E silia ma le afa itula o talanoa Kati ma le ave taxi i totonu o le taavale, ao paka pea le taavale i luma o le faleoloa lea e tu i le tulimanu o le auala. Ao talanoa Kati ma le ave taxi, na faafuase’i ona la vaaia se solo o taavale lanu uli sa tumutumu i luma o le fale’aiga ua toe faataalise agai atu i le isi tulimanu o le aai, e foliga mai e i ai se mea o lo o mafua ai ona nati nati atu i le isi itu o le aai.

 

Talu ai e masani lelei le ave taxi i le ma’ale’ale o le galuega lea o lo o galue ai Kati, na maua ai ona ia valaaulia o ia la te o sa’o i lona fale se’i fai sina mapu ma tau faato’a lona mafaufau, ona toe seki ai lea mo se isi ana fuafuaga, peitai sa musu le tama ona e popole i lana taavale lea e paka i luma o le Fale’aiga ina nei faaleaga e ni tagata ona faaletonu lea o lana galuega o lo o faatino i le taimi lea. Ui o lea, na talia e le Kati ma valaaulia a le fafine, ona alu lea o Kati i le taxi ae alu atu le fafine ave taxi i lana taavale, ma la aga’i atu loa i le nofoaga o lo o nofo ai le fafine, i luga o le isi pito mauga o le aai o Italia, e le mamao lava ma le taulaga lea o lo o autu i ai le galuega a le tama.

 

Se fale ina tele ma matagofie ae na o le fafine lava ma lana tama teine ua 21 tausaga le matua, o lo o ave foi lana mataupu i galuega faa leoleonana i le Iunivesite tele o Italia, o le aoga foi lena na faauu mai ai lona tina atoa ai ma le tama o Kati. Na lilo i le manatu o Kati, sa i ai tagata o le au faatupu faalavelave na lalafi i le vaega e paka ai taavale a le fale’aiga, mo le tau maitauina o le tagata e alu atu e piki mai lana taavale sa paka ai, ma na avea le alu atu o le fafine ave taxi e piki mai lana taavale ma itu na mulimuli atu ai loa ma le au alii ia i tua o le taavale, ma latou iloa ai le nofoaga o lo o nofo ai le fafine. Toeititi ao le po o talanoa ma fefaasoaa’i Kati ma le fafine i auala e fesoasoani ai i lana galuega, ae o la faalogoina loa se pao e aga’i mai i le pito i lalo o le fale.

 

Na oomi e le fafine le ki o lo o i luma o le faitoto’a ma vaaia ai le tau fai ola uma o moli o le auala seia oo lava i luma o le auala, ma vaaia ai loa se Sipi lanuuliulio lo o tu faasaga mai i le isi itu auala, ma ni tagata se to’alua o lo o nonofo mai ai i totonu. “Pei lava e i ai le mea o le a tupu,” o le tala lea a Kati ma fai atu i le fafine ina ia saili se vaega o lona fale e saogalemu ai ma lana tama, ona o lea ua ia iloa sa mulimuli atu le au faatupu faalavelave i tua o lana taavale. “E faapefea ona e iloaina lena mea,?” o le fesili lea a le fafine, ae na tali Kati, “A lea ua o mai le au faatupu faalavelave.”

Comment Here