Ads by Google Ads by Google

FAGOGO: O KATI LE LEOLEO NANA

[Sosoo ane loa lau faitau i le tatou tala faasolo mo lenei vaiaso, lea na gata mai i le vaiaso na tea nei i le taimi lea faateia ai le vaai a Kati ina ua ia vaaia le tamaitai o lo o la talanoa, e foliga mai o se tagata sipai.]

 

O Kati, ua masani i gaioiga faa sipai, o le mafuaaga lea na vave ai lava ona oso le manatu i le mafaufau o le tama, ua tatau ona faamuta le la talanoaga ma le tamaitai lea, ae sili ai loa pe a toe fo’i ina ne’i tuai ai ona faatino ana galuega o lo o manaomia le faauma i lea aso. “Faafetai mo le talanoaga i lenei aso, ae ou te manatu ua oo i le taimi e tatau ai ona ou alu e piki si o’u to’alua ma la’u fanau mai le aoga, ona aga’i atu ai fo’i lea i le fale mo isi fuafuaga o le aso, ae ta te feiloa’i fo’i i se isi aso,” o tala faamavae ia a Kati i le mafine lea, peitai e ese le manatu sa oso atu ma le tamaitai, “Sa ou faapea o le a ta malolo i le fale talimalo lea se’i faauma ai ta talanoaga o lo o fai, ma se’i auiliili atili ai la ta masaniga ...” e fai lava tala a le tamaitai ma taumafai e pa’i atu i le lima o Kati, peitai sa aapa atu Kati i lana ato ma ipu kofe, ua uu mai ma savali aga’i i le faitoto’a o le fale’aiga ma aga’i atu ai loa i fafo.

 

Na tu le tamaitai e maitau le ta’avale e oso ai Kati, ae ona o le tama ua atamai i gaioiga faa sipai, na mafua ai ona ia taofia le Taxi ma aga’i atu ai i le isi faleoloa o lo o tu latalata ane i le nofoaga lea mo lana faatau, ina ua mae’a, sa toe taofi le isi Taxi ma toe fo’i atu ai loa i le vaega o lo o paka ai lana taavale ma le faamoemoe e alu ai, ae na faateia le tama ina ua ia vavai mamao atu, o lo o feofeoa’i solo mai tagata ofu uli i le vaega e paka ai taavale e foliga mai o nisi o le au faatupu faalavelave o lo o latou taumafai e saili se isi. O le ave taxi o se fafine pe a ma le 45 tausaga le matua. “Driver, e mafai ona ta o sa’o i le isi auala le le se’i faauma mai la’u faatau i le isi faleoloa o lo o i le tulimanu le la o le auala ..” o le tau faanoi atu lea a Kati i le ave taxi, ma sa talia fo’i e le fafine ma faasasa’o loa le la taavale i le faleoloa o lo o tu i le tulimanu o le taulaga ma faauma ai le faatau a le tama.

 

“Ou te vaai atu e i ai se mea o lo o e natinati i ai, e mafai ona ou fesoasoani atu ia oe,?” o le fesili fia iloa lea a le fafine ave taxi, ae sa na o le lulu o le ulu o Kati e foliga mai e le o manao e vave talia le fesoasoani lea ua ofo atu. “Vaai oe, o a’u o se leoleo nana a le malo lenei o Italia, e 23 tausaga o ou galue i le galuega, ae na ou malolo litaea ina ua ou lavea i se osofaiga tele lava ma leaga ai le isi vaega o lo’u tino, o le taimi nei, o lea lava ou te taumafai e saili auala e faafetoai ai faiga a le au faatupu faalavelave o lo o vaaia i totonu o le aai ma le atunuu i le taimi nei,” na te’i Kati i le faamatalaga a le fafine ave taxi ma ia manatu ai loa, o le tagata tonu lava lea e maua ai se fesoasoani mo ia, e le’i toe faatali Kati ae ua ia faailoa atu loa i le fafine, “O a’u o Kati, o le leoleonana a le malo o Italia i le taimi nei.”