Ads by Google Ads by Google

FAGOGO: O KATI LE LEOLEO NANA

[Sosoo ane loa lau faitau i le tatou tala faasolo mo lenei vaiaso, lea na gata mai i le vaiaso na tea nei i le taimi lea na musumusu atu ai Kati i le taliga o le maula lea o lo o i ai i le lisi o tagata e pu’e faapagota, pe mafai ona la savalivali i le isi tulimanu o le Pa pia la te talanoa ai.]

 

Na lilo i le manatu o le maula lea, o lana toe tafaoga lea i totonu o le Pa pia i le aso lea, ona o lea o le a loka o ia i mea valea e tele o lo o asosi ai ma ni isi o le au faipisinisi i le atunuu. Sa savali faamaliuliu le tamaitai ma mulimuli atu i le mea lea ua savali atu i ai Kati, ona tu lea ma toe tepa tasi i le laulau na nofo ai pe le o taatia ai se mea e patino ia te ia, ina ua leai se mea o galo, ona toe faliu lea i luma ma toe faaauau lana savali lemu i ona seevae mulimuli ma le faaeteete, ina ne’i sasi sana laa ona palasi lea i le ova o lona ‘ona.

 

“Se lau susuga i le Leoleonana, o fea o le a e avea i ai ta ita ne’i tupu se faalavelave ia te a’u,?” o le tala faatosotoso loloa lea a le maula e pei e ula ia Kati, ae sa na o le savali lava o le tama e aunoa ma sana tali. Na ona taunuu atu lava o Kati i le isi nofoaga toa filemu lea e leai ma ni tagata vevesi vale o tumu ai, ona aapa loa lea o lona lima i totonu o lana ato o lo o asoa ma aumai i fafo se pepa o lo o teu ai, ona tu lea ma ia e faatali ai le taunuu atu o le tamaitai i ona tafatafa. “O a ga pepa lau susuga a le Leoleonana,?” o le fesili atu lea a le maula lea, ae na tali Kati, “O le poloaiga lea na aumai e le faamasinoga maualuga, e faatonuina ai le pu’e fa’apagota o oe i le taimi lava lenei, ona o lea ua tuuaia oe i lou fesoasoani i ni tagata faipisinisi se to’afa i le atunuu, i le faia o gaioiga faatupu faalavelave ua mafua ai ona maliliu le to’atele o tagata,” o le tala lea a Kati a’o ia tuu atu le pepa i lima o le tamaitai lea, ona ia tago lea i handcuff o lo o i tua o lona ofu ma se’i mai ae loka ai lima o le tamaitai, ona toe faapea atu lea o lana tala i ai, “E i ai lou aia tatau e le tau faia ai sau faamatalaga, e le mafai foi ona faaaoga le le faia o sau faamatalaga faasaga ia te oe i le aso o lou faamasinoga ....” E fai lava tala a Kati ma aapa atu ua loka lima o le tamaitai lea, ona ia taitai lea i fafo o le Pa pia a’o ia taumafai e faafesoota’i ana leoleo o lo o paka mai i fafo o le auala.

 

“O fea le alii faipisinisi lea sa lua talanoa i totonu o le Pa pia, lona uiga ua e lokaina fo’i o ia,?” o le fesili avaavau atu lea a le maula lea ia Kati, ae na tali Kati, “E tutusa lava le tulaga lea ua o o ia oulua i le aso lenei, o le la foi ua loka lau paaga lena ma ua uma ona auina atu i le falepuipui e taofia ai mo le po nanei, e faatali ai le taimi e te lua tutula’i ai i luma o le faamasinoga a taeao,” e fai atu lava tala a Kati ae o lo o valo mai foi le gutu a le maula lea ma fai mai, “E le faia sa’u kala se’iloga ou ke kalagoa i la’u loia, ae leai fo’i se mea e ala ai fua oga loka fa’afuase’i a’u e leai sa’u sookaga i legei makaupu.”