Ads by Google Ads by Google

FAGOGO: O KATI LE LEOLEO NANA

[Sosoo ane loa lau faitau i le tatou tala faasolo mo lenei vaiaso, lea na gata mai i le vaiaso na tea nei i le taimi lea ua fai ai nei tuliga a le taitai fitafita ma ana fitafita, ma leoleo faapitoa a le tama o Kati, i le maea ai lea o le faalavelave lea na tafana ai le taitai fitafita ma lana vaega alii leoleo e toafa na tiute i luga o le tuaoi o le auala.]E lei toe faatafa le taavale a tama faapitoa a Kati i le taimi lea ae ua la tuliloaina loa le sipi uliuli lea o lo o sosola atu ai le taitai fitafita ma ana fitafita faapitoa. E alu lava le sipi ae tafana mai lava e le au alii ia le taavale a leoleo faapitoa a Kati, e lei umi ae faalogoina loa vaalele a leoleo ma le militeli ua felelei i luga tonu ane lava o le auala lea o lo o fai atu ai nei tuliga taavale nei, ma faatonuina ai loa le ave taavale o le sipi uliuli ina ia faatafa itua po o le tafanaina loa o i latou i pomu. E lei nenefu le faalogo a leoleo faapitoa a Kati i le faatonuga o lo o sau i luga, o le mafuaaga foi lea na faaauau ai pea a latou tuliga ma le au alii ia, ona o le la naunau e fia iloa poo ai o lo o i totonu o le taavale, ae o le taimi lea, ua le toe tafanaina maia le la taavale e le sipi uliuli sei vagana ai le faaauau pea o le alu i le atoa i se saoasaoa uiga ese.Pe tusa toe 20 minute taunuu le auala i le isi fesootaiga tele o nofoa afi i le isi itu o le taulaga, ae toe logoina loa e le vaalele a le militeli le ave taavale o le sipi ina ia taofi le taavale ona o lea ua latalata atu i le isi fesootaiga o nofoa afi, ina nei i ai se soifua o tagata savili e maimau ai. E lei umi ae vaaia loa e leoleo faapitoa a Kati le sipi uliuli ua mumu mai moli taofi e foliga mai ua amata ona alu lemu, e lei umi ae vaaia loa le sipi ua tu, ma pe tusa o le 2 minute talu ona tu le sili, e leai ma se isi na vaaia o ulufafo mai ae o lo o ola pea le taavale ae o le taimi foi lea na tau fai li’o uma ai e taavale a leoleo le vaega lea o lo tu ai le sipi, ae o luga ane o lo o faapepepepe mai ai vaalele a leoleo ma le militeli, e lei umi ae taunuu loa ma le tama o Kati, ua oso i fafo ma lana taavale ma savali sa’o atu loa i le faitotoa o le itu a le ave taavale o le sipi, ona tu ai lea mo ni nai sekone, faatoa tago atu lona lima ua tuitui le tioata o le faitotoa e faailoa atu ai e manaomia le tatala o le tioata.I fafo i le taimi lea ua silia i le 30 leoleo ma fitafita o lo o latou sioina le sipi ma latou aupega o lo o ta’i atu uma i le vaega o lo o tu mai ai le taavale. Na toe tuitui e Kati le faamalama o le faitotoa i le itu o le ave taavale ma fai atu i le ave taavale e tatala le faitoto’a, peitai sa tumau pea le le tatalaina mai o le faitoto’a, o le taimi lava foi lea na tago atu ai loa ma le tama i le faitotoa ua tatala faamalosi mai i tua, ma le te’i ina ua vaai atu i totonu, ua maliliu uma lava i latou e toa 5 ia na sosola mai i le sipi, e aofia ai le taitai fitafita ma ana fitafita faapitoa e toafa.