[Sosoo ane loa lau faitau i le tatou tala faasolo mo lenei vaiaso, lea na gata mai i le vaiaso na tea nei i le taimi lea ua tuufaatasi ai e leoleo a latou mau faamaonia ma ua tuuina atu le suesueina atoa o le mataupu i le alii leoleo nana ia Kati na te faamaeaina le suesuega.]

Ua tuu faatasi e leoleo a latou mau faamaonia e tusa ai o suesuega o lo o faagasolo, ma ua taoto atu nei le taulimaina o le mataupu i le alii leoleo nana o Kati na te faamaeaina suesuega e uiga i lenei miataupu, ma le tuutuuga e tatau ona maea i totonu o le vaiaso ona tuuina atu loa lea o se ripoti i le Komesina o Leoleo i se faaiuga e tatau ona fai. O se tasi o gaioiga sa faia e Kati i le vaiaso ao faagasolo ai lana suesuega, o lona talosagaina lea o faleoloa ma pisinisi o lo o tu tu latalata ane i le nofoaga na aga’i mai ai loli nei, pe mafai ona aumai ata sa pueina i a latou masini pu’eata o lo o i fafo o a latou faleoloa, e fesoasoani ai i le suesueina o le mataupu.

E na o le lua aso na tuufaatasi ai e Kati ata sa pu’eina, amata mai lava i le nofoaga o lo o i ai le fale o matua a lana uo tamaitai ua maliu, ma faasolo mai ai lava i ogaala na ui mai ai loli seia oo atu i le vaega na tupu ai le faalavelave mulimuli. I ata sa tuu faatasia e le tama, sa vaaia ai se isi van lanu paepae o lo o tu i le isi magafa, ona tatala lea o le keli ae aveese mai ni ato uli se lua ae tuu atu i totonu o le loli na pito i tua o le laina.

O le aso Lulu atoa o le vaiaso lea sa nofo ai le tama i lona ofisa ma taumafai e faafesootai ata ma gaioiga taitasi sa faia i luga o le auala, ina ia faigofie ai ona tuu faatasi lana ripoti lea o le a tuuina atu i luma o le alii komesina. I le faaiuga o le suesuega a Kati na faavae mai i ata sa ia vaavaai i ai sa ia maua ai, o le van paepae lea na paka i le isi oga auala ma lona keli o lo o tatala ae aveese atu ai ni ato lanu uli se lua ma tuu atu i le isi loli, o le taavale lea a le isi taitai au o le vaega a le Ami, o ia lea o lo o masalomia i le tele o osofaiga o lo o tutupu i le atunuu, ma e foliga mai sa avatu sese ai i totonu o ato na tuu atu i loli ma se tama’i ato o lo o i ai ID o le isi taitai au, ae le o i ai sona aafiaga i lenei mataupu.

O ato sa tuuina atu i le loli o lo o tumu i a’upega e pei o fana ma pulufana, ma o fana ia na faaaoga e fasiotia ai i latou na maliliu i totonu o le loli. Sa maua foi e Kati faamaumauga i talanoaga sa faia i luga o le telefoni i le va o le taitai au a le Ami ma nisi o alii fitafita sa faatinoina lenei solitulafono, ma o lo o faatonuina ai fitafita ina ia fasiotia uma tagata o lo o i tua o loli pe afai ae maua e leoleo le latou gaioiga o lo o faia, ina ne’i ola se tagata ona ia ta’uina lea i leoleo o nisi o faamatalaga o lo o latou fia maua ma faigofie ai ona maua e leoleo faamatalaga e faatatau i le latou vaega faatupu faalavelave. E latalata loa ina tapuni galuega i le afiafi o le aso Faraile, ae taunuu loa i le ofisa o le komesina o leoleo le ripoti a Kati e faatatau i le faalavelave atoa sa tupu.