Ads by Google Ads by Google

FAGOGO: O KATI LE LEOLEO NANA

[Sosoo ane loa lau faitau i le tatou tala faasolo mo lenei vaiaso, lea na gata mai i le vaiaso na tea nei i le taimi lea ua mulimuli atu ai le taavale a Kati i tua o le taavale a le tagata lea ua ia masalomia sa i ai i le faapaina o le pomu na mu ai le fale’aiga a lana uo ma maliu ai o ia.]

 

Na vaaia le afe o le taavale i se fale’aiga e latalata i le poloka e nonofo ai matua o lana uo teine, ona faatagå afe lea o le taavale a Kati i le fale kofe o lo o pito atu ai i tua, se’i ona mata’ituina gaioiga a le tagata o le a faia, e le’i umi ae vaaia loa e Kati se tama’ita’i lalelei umi sasa’o ua savali aga’i atu i le vaega tonu o lo o paka mai ai le taavale, ua talanoa ma le tagata o lo o i totonu o le ta’avale ma tuu atu i ai e le tama’ita’i se taga pepa enaena lapo’a lava i totonu o le ta’avale faatasi ai ma se ato fa’afafa. Na ona uma lava ona talanoa o le alii lea ma le tama’ita’i, ona toe vaaia lea e Kati o le taavale ua ola ma aga’i ese atu mai le nofoaga sa paka ai, ma afe i le auala tonu e afe ai i le poloka o lo o i ai fale o matua a lana uo.

 

E le’i toe misi se vaai a le tama ae ua na o le faato’ato’a o lana vaai i gaioiga uma a le tagata lea o le a fai ina ne’i i ai se faalavelave e tula’i mai ae misi ia te ia. Na toe faaola e Kati lana taavale ma mulimuli atu pea i le vaega lea ua alu atu i ai le taavale a le ali’i lea, e fetaui lava le taunuu o Kati i se tasi o vaega laolao ae ona vaaia loa le ali’i lea ua oso i fafo o lana taavale ma savali atu i le sitepu o le fale, ona tu lea mo ni nai sekone faatoa tu’itu’i le faitoto’a o le fale, e le’i umi ae vaaia loa e le tama se olomatua ua ia tatalaina le faitoto’a, ma ia vaaia ai le ali’i lea ua ia faaali atu i le olomatua se mea o lo o uu i lona lima, ma vaaia ai loa le savali atu o le ali’i lea i totonu o le fale, o le taimi fo’i lea na ualesi atu ai loa Kati i le ofisa autu a leoleo mo ni taavale leoleo e paka latalata mai i le nofoaga lea ina ne’i tula’i mai se faalavelave faafuase’i i totonu.

 

O luma o le ta’avale a Kati e i ai masini e mafai ai ona lagona talanoaga e faia i nofoaga mamao, ma o ituaiga taavale ia na o Leoleo nana a ni isi o malo i Europa ma Amerika o lo o faaaogaina i taimi o a latou suesuega. E lei toe faatali Kati ina ua ulufale le alii lea i totonu o le fale ae na ia tago atu loa i lana masini ua ki ma faaaoga uma isi masini e fesootai ai aga’i i le fale o le ulugalii ina ia mafai ai ona lagona talanoaga o lo o faia. E fetaui lava le manino o le taaloga a Kati ae faapea atu loa ma le alii lea i le ulugalii, o ia o le sui o le vaega o leoleo nana a le malo o Italia, ma ua tofia o ia na te suesue auiliili talaaga o le olaga o le la tama ua maliu e aofia ai teugatupe a lana pisinisi, inisiua ma ni isi lava teugatupe o lo o la iloa, ina ia mautinoa e le mafai e tagata sa latou galulue ona ave faagaoi, ae ina ua faailoa e le ulugalii i le alii lea e leai ma ni teugatupe tetele a le la tama o i ai, na faalogoina ai loa e Kati le sui o le leo ua talanoa atu i ai le ali’i lea atoa ai ma lona tuuina atu o upu tau faamata’u i le ulugalii pe afai la te le usitaia le faatonuga ua ia tuuina atu.