Ads by Google Ads by Google

FAGOGO: O KATI LE LEOLEO NANA

[Sosoo ane loa lau faitau i le tatou tala faasolo mo lenei vaiaso, lea na gata mai i le vaiaso na tea nei i le taimi lea na faateia ai le vaega faatupu faalavelave ina ua li’o atoa i latou e fitafita faapitoa a Kati ma latou mautinoa ai, o le tagata lea na teu atu faa Kati, o le isi foi fitafita a le malo.]

 

Na pei o le emo o le mata gaioiga a leoleo ma fitafita sa i ai i le nofoaga lea i le faatinoina o faatonuga ua fai atu ai le tama o Kati. O le taavale lea na alu atu ma ato o lo o i ai le $10 miliona, ua faatonu e le tama ina ia toe fo’i i le nofoaga na sau ai, ma ia mautinoa e saunia se ripoti e toe tuuina atu i le malo o Italia e faatatau i gaioiga uma nei. A’o pisi Kati i le tau faamautuina o galuega ae te’i i le tatagi o lana telefoni ma le vaai atu, o le tamaitai pule o le fale’aiga lea ua vili atu, “malo le galue ma le onosa’i, o a’u lea ua ou toe faanatinati i le fale’aiga ona o lo o pisi, pau le itu taua ua ou mautinoa e te le o afaina, o lena foi ua toe faasao mai ola o lau vaega e toalua.” Na faatofa le tama i lana uo i luga o le telefoni, ona toe tape lea o le telefoni ae alo e faamaea le tapenaina o mea uma sa tapena atu i le nofoaga lea ona o le taumafai e faasao mai ola o ana leoleo faapitoa e toalua.

 

E oso loa Kati i lana taavale o le a aga’i atu i le falema’i ae toe tatagi lana telefoni, ma le vaai atu e le masani i le numera lea e vili atu. Na tali e le tama lana telefoni ma ia iloa ai, o lo o manaomia mai o ia i le Ofisa autu o le Amapasa a le malo o Aialani i totonu o le taulaga i le taimi lava lea mo se mataupu taua o lo o faia fesiligia ai o ia, ma toe sui ai loa le nofoaga lea o le a alu i ai le taavale a le tama, ua le falema’i e asi ana leoleo e toalua ia ua faanatinati atu i ai ae o lea ua faatu tu i le ofisa autu o le amapasa a le malo. I faila ua taulimaina e le ofisa o le amapasa, e tolu mataupu tetele ua maea ona faia i ai e Kati suesuega ma ua taofia foi i latou o lo o masalomia i nei solitulafono i le falepuipui e faatali ai a latou faamasinoga, ae o mataupu nei ua silia i le ta’i 4 tausaga o galulue ai leoleo a le malo e le maua poo ai na fasiotia tama’ita’i na maliliu ai.

 

“Talofa,!” o le faatalofa atu lea a Kati i le alii leoleo o lo o tu i le faitoto’a, “E i ai se mataupu e te fia maua i ai se fesoasoani,?” o le fesili lea a le alii leoleo ma lona leo pau ae o lona lima taumatau i lana fana e le misi, “O lo o mana’omia a’u i luga o le ofisa o le amapasa a le malo i le taimi nei lava,” o le tali atu lea a Kati i le fesili a le leoleo, ona ia vaaia lea o le leoleo ua talanoa i lana uaealesi mo ni nai sekone, ona ia aapa atu lea i le ki o le faitoto’a ma oomi ina ia avanoa ai le auala mo Kati ma lona leo malu na faapea atu i le tama, “Ulufale.” Na vaaia e le tama tamaloloa e tofu ma matatioata o lo o laulaututu i vaega eseese o le lotoa, e tofu uma ma a’upega, o le isi toalua na mulimuli atu i ona tua ao agai atu i le Ofisa o le amapasa, ina ua taunuu i totonu, sa ia vaaia ai ni tagata e toa 10 o lo o nonofo faataliolio mai i luga o le laulau, ma le nofoa e tasi o lo o avanoa, o lona nofoa lea.