Ads by Google Ads by Google

FAGOGO: O KATI LE LEOLEO NANA

[Sosoo ane loa lau faitau i le tatou tala faasolo mo lenei vaiaso, lea na gata mai i le vaiaso na tea nei i le taimi lea na faateia ai le alii lea ua teu faafoliga ia Kati ina ua ia vaaia ni alii se toalua ua taitai mai i fafo o le Van uliuli a le au faatupu faalavelave.]

 

E lei faatamala leoleo nana faapitoa e toafa na auina mai e le malo o Italia o lo o lalafi i se tasi o nofoaga faapitoa, i le mata’ituina o gaioiga uma ia o lo o faia i totonu o le malae lea o lo o talanoa ai le au faatupu faalavelave. E le gata ua sauni alii leoleo nana ia i soo se osofaiga ma soo se gaioiga e tulai mai, ae ua maea foi ona latou tapenaina le auala e faasao ai ola o alii leoleonana e toalua o lo o ave faapagota e le au faatupu faalavelave. Na ona faasino atu lava e le alii lea ua teu faa Kati o ato e fa o lo o i ai le 10 miliona i totonu, faatonu loa e le taitai o le au faatupu faalavelave ana tama faapitoa e siaki ato ma ave i totonu o le ato, peitai na taofi e le alii lea ma fai i ai, e tatala muamua atu leoleo nana na o latou lokaina sei siaki poo okay uma i laua poo i ai foi se isi o tupu ai se faaletonu, o le taimi lea na vaaia ai loa le taitai mai o ni alii se toalua mai totonu o se Sipi lanuuliuli ma o la foliga o lo o ufi i taga uliuli, ua taitai atu ma faatutu i luma teisi ane o le Van.

 

Na valaau atu le alii lea e teu pei o Kati i alii e toalua o lo o taitaiina maia leoleo nana sa ave faapagota ina ia tatala ese taga uli o lo o ufi ai foliga o alii nei e toalua sei, peitai na toe valaau atu le taitai o le au faatupu faalavelave e aua, sei vagana ua ave muamua taga tupe i totonu o le taavale. “Afai e le tatalaina taga uli o lo o ufi ai foliga o tama na tou te le o ma taga tupe,” o le valaau atu lea a le alii o lo o teu pei o Kati, ona ia tago lea i le uaealesi o lo o i le taga o lona ofu ua aumai i ai fafo ae faaaoga e talanoa atu ai i isi vaega o leoleo o lo o lalafi i vaega e latalata ane i le nofoaga lea. Na vaaia le le mautonu o le alii taitai o le au faatupu faalavelave ina ua talanoa le alii o lo o teu faa Kati i lana uaealesi, o lea na ia valaau atu ai loa i ana tama e toe ave alii leoleo nana i totonu o le taavale ma latou toe fo’i ese. E fetaui lava le tau gaioi atu o alii e faataunuu le faatonuga ae faafuasei loa ona latou vaaia se vaega o leoleo faapitoa e silia ma le toa 20 ua latou siomia le nofoaga ma valaau mai i a latou ina ia aveese uma a latou a’upega i totonu o le 5 sekone.

 

E tau fai tuu loa i lalo a’upega a le au alii ia ae lio atoa loa e leoleo ma latou ta lokaina a latou lima, ae o le taiim foi lea na vaaia ai le tatala ese e le alii sa teu faa Kati o ana teuga ma iloa ai, e le o ia o Kati ae o ia o se fitafita a’oa’oina a le malo o Italia i tulaga o faalavelave faapenei. O le taimi foi lea na taunuu mai ai ma le alii o Kati ma ona lavalava savili sa eva i le isi itu o le nofoaga lea ma ana a’upega, ona ia faatonuina loa lea o alii nei e toalima ina ia ave i le falepuipui e loka ai ae faanatinati atu i le falema’i alii leoleo nana e toalua na o latou ave faapagota, ona o manu’aga tuga o lo o aafia ai o laua foliga.