Ads by Google Ads by Google

FAGOGO: :O KATI LE LEOLEO NANA

[Sosoo ane loa lau faitau i le tatou tala faasolo mo lenei vaiaso, lea na gata mai i le vaiaso na tea nei ina ua fetaui lava le maua e Kati ma ana leoleo faapitoa o tusi saisai mo le Taitai Fitafita ma ana fitafita e toafa ae maua loa ma le tala o le Taitai Fitafita ua sauni e lele atu i Peretania mo sana fonotaga faapitoa.]

E lei te’i le tama o Kati ina ua ia faalogo i le tala mai se molimau faalilolilo e faatatau i le gaioiga a le Taitai Fitafita, pau le fautuaga a le tama i ana leoleo faapitoa, ia to’a ma sauni o latou o le a malaga sa’o i le malae vaalele lea ua fuafua e tuuvaa ese atu ai le Taitai Fitafita. Na ona toe fesootai atu lava o Kati i totonu o le Vaega Au i lana molimau faalilolilo o lo o i ai ae faapea mai le tala, e tatau ona o latou o atu i luma o le lotoa a le Army e faatali ai le taimi e alu ese mai ai le taavale a le Taitai Fitafita, ina ne’i ese se malae vaalele e faatutu aga’i i ai.

Na ona faamavae lava o Kati i le tamamitai pule o le Fale’aiga, faatonu loa ma ana leoleo e muamua i le lotoa a le Army. Ua sogi atu le tama i le tamaitai pule o le Fale’aiga ma faamavae atu i ai ma lana tala, afai ae maea la latou osofaiga lea, o le a toe afe atu i le Fale’aiga ao le’i tapunia i le 12:00 i le po. E taunuu Kati i lana taavale ae o le taimi lea ua leva ona nimo ese le taavale a ana tama faapitoa, ona latou fesootai lea i luga o le telefoni ma le uaealesi e faailoa i ai vaega o le alatele e ao ona latou paka mai ai.

E lei atoa se 20 minute talu ona logo mai Kati ma ana leoleo faapitoa i le gaioiga a le Taitai Fitafita lea o le a fai, ae taunuu loa le tama i luma o le faitotoa tele o le lotoa a le Army, ma latou faatali ai le agai ane i fafo o le taavale  a le Taitai Fitafita. Na toe fesootai Kati i le molimau faalilolilo o lo o i totonu ma faailoa ane ai, o lea ua maea le faamavaega ma ua savavali atu le Taitai Fitafita ma ana fitafita faapitoa e toafa i totonu o le taavale mo le agai ese atu i fafo. “Unit 2, o maua mai a’u,” o le valaau atu lea a Kati i lana vaega, ae na tali mai le unit 2, “Commander, o lea ma te maua atu oe.” “Aua le vave faavevesia le case, tuu ai pea se’i o poo fea e aga’i i ai, ina nei tatou vave faate’i ae ese le nofoaga lea o le a aga’i i ai, toe faalogo mai i le lua uaealesi i se isi faatonuga,” o le faatonuga lea a le tama i ana leoleo faapitoa, ae fetaui loa ma le ulufale mai o le taavale a le Taitai Fitafita ma ana fitafita e toafa ua agai mai ma latou agai atu loa i le itu i sisifo o le atunuu. E pei ona masani ai Kati i le faatinoina o lana galuega, soo se taimi lava e fia tuuina atu ai ni tusi saisai, e valaau ai le tama i se Ofisa o leoleo e lata ane, mo se fesoasoani ia te ia ma lana vaega, peitai o le mataupu i le Taitai Fitafita, sa faatuai le valaau a le tama mo se fesoasoani, ina ua ia vaaia le agai sa’o atu o le taavale a le Taitai Fitafita ma lana vaega i se tasi o nofoaga e seasea afea e ni tagata.