Vaega: 148

Fa’aalofa atu i lou alafa’i mai i le manuia i lenei taeao fou, i le alofa ma le agalelei o lo tatou Matai oi le lagi, e ao ai ona o tatou fa’apea ifo, “Le Atua e, ia  E alofa, foa’i mai le filemu i o matou loto i lenei aso, ina ia mafai ai ona o matou talia faigata ma puapuaga e o’o mai, ae o le vi’iga ma le fa’amanu matou te fa’afo’i atu i Lau Afio e fa’avavau, fa’avavau lava, amene.”

Alo mai, o le vaega lona fasefuluvalu lenei o la tatou tala fa’asolo, Lupe o le Filifili, ua lata ina ma’ea la tatou tala, ae tatou tulituliloaina pea, po’o fea o le a o’o i ai la tatou tala. Ae ia  manuia lou alo faiva i lenei aso, i feau ma galuega o le a feagai ai.

Ua o’o i le aso fiafia o Vaitimaleata ma Mikaele, fai mai, o se aso ua sili ona matagofie, o se aso fo’i sa molimauina ai le fiafia ma le olioli o tagata uma. Ua tapena ma’ea’ea lelei e le nu’u atoa ae maise o le aiga o le lo’omatua o Salamasina. E le i fa’atafa le masi’i mai o le aiga o le lo’omatua mai Upolu ma Savai’i, ua maualuga ai le fa’amoemoe o Salamasina ma si ana fanau, e moni lava le upu, o si tagata ma si ona aiga, o si tagata fo’i ma lona fa’asinomaga. Ua atoa lupe o le filifili, aua ua fa’atasi aiga, i ona itu uma.

O le masi’i mai o le aiga a tina o Salamasina, fai mai le tala, na va’aia e le nu’u atoa le lava tapena o mea uma. O le ofu fa’aSamoa o le tamaita’i o Vaitimaleata lea na fai mai e le aiga o le tina o lona tina, fai mai, o se laei ua sili ona matagofie. O le ie toga vaivai lava sa sui ai, O le kuiga o le tama’ita’i, ma ona teuga uma, e leai se mea na fa’aletonu, ua sau soli le aiga o le tina o Salamasina e molimau ma auai i le aso o le tama’ita’i o Vaitimaleata.

Ina ua taunu’u le aiga o Mikaele, fai mai na va’aia fo’i le tapenapenaga ma’ea’ea a le aiga mai Pago Pago. Ua matua’i fa’atumulia le nu’u atoa, ina ua potopoto lupe  o le filifili, aua le aso fiafia o Vaitimaleata ma Mikaele. ina ua o’o i le taimi e fa’apaia  ai le ulugali’i fou i le malumalu, na fa’alogo atu loa le lo’omatua o Salamasina, ua fai feofoofoa’iga alofa i le va o Vitimaleata ma Mikaele, te’i lava ua maligi ifo ona loimata. Ua tau ona mafaufauga i si ona to’alua o Larry, “E talofa e, i si o’u to’alua o Larry, talofa e, i si o’u tuagane o Paulo ma si ona to’alua o Eseta, ua o latou le va’ai i le matagofie o le aso o si a’u tama o Vaitimaleata.”

E ui lava i ia manatu, ae sa ta mau pea i le loto ma le mafaufau o le lo’omatua, “E alu aso, sau fo’i aso, e i ai fo’i le taimi e a’ami ai tatou e le Atua, ae ia o tatou nonofo sauniuni ma o tatou tapena i le taimi ma le aso o le tagata.”

Na fa’ate’ia mafaufauga ia o le lo’omatua, ina ua tu ane lana tama o Vaitimaleata, e fa’afeiloa’i i si ona tina, fai mai le tala, na fa’alogoina e tagata uma na auai ma le auvala’aulia le tagi aue ue, a le lo’omatua i totonu o le falesa ma a’apa atu ua fusi mau mai lana tama. Na o’o ane nei i ai lana fanau, lea na malaga mai Amerika, ae ua le mafai ona ave’ese pe fa’amaulu e le lo’omatua Vaitimaleata i lea taimi. Na o’o ane  fo’i i ai ona tuagane, ae ua le mafai lava le lo’omatua, e foliga mai, o lana toe feiloa’i lea i si ana tama, o le a le toe va’ai i ai.

Na iloa lelei lava e Samuelu le mea lea ua tupu, na pau le tagata na te mafaia, o lona uso o Petelo, ua tuli nei e Samuelu tama e tamomo’e i le fale o lo’o galue mai ai Petalo i le faiga o mea uma, ina ia alu ane i le falesa, ma ia fa’avave. Fai mai, ina ua taunu’u ane Petelo ma lona ieie ma lona mitiafu ua pala i lona afu, na savali sa’o atu loa i luma, i le mea o lo’o i ai  le tuafafine o lona tama, lea o lo’o tautau pea i le ‘ofu fa’aipoipo i lana tama o Vaitimaleata.

“Ata, Ata, talofa e, i si a’u tama, ailoga a ta toe feiloa’i, Ata, Ata, ia e alofa i si o’u aiga, alofa i nai o’u tuagane ma a latou fanau, alofa i nai ou tei, ‘aua ne i tu’ulafoa’ia si o’u aiga, ia e alofa i si o’u aiga i Upolu ma Savai’i, ia e alofa i si aiga o Mikaele, ‘ia oulua fealofani ma alofa le tasi i le isi…. ia e alofa i a Petelo i le taumafaiga o mea o le aiga, ou te alofa i a te oe si a’u tama pele….Ata…Ata…”

Fai mai, o tagata uma na i ai, ua le pei o se fa’aipoipoga e fiafia ai, ae ua pei o se maliu, ona o tulaga ua tula’i mai nei. Na ona taunu’u lava o Petelo, tilotilo ifo i le tuafafine o si ona tama e pele i lona loto, a’apa ifo loa i ai, na ona tepa ifo lava o Salamasina o Petelo, fa’amamulu loa ma Vaitimaleata, ae pau atu i lima o Petelo.

E faia pea…