Vaega: 144

Fa’aalofa atu i lou alafa’i mai i le manuia i lenei taeao fou, i le alofa ma le agalelei o lo tatou Matai oi le lagi. E i ai pea le fa’amoemoe, o lo’o aoina le masina  i le soifua laulelei o le atunu’u, ae alo maia, o le a toe fa’aauau atu la tatou tala mo lenei aso. Ae ia manuia le alo faiva o le atunu’u i feau ma galuega o le a feagai ai i lenei aso.

Na muta mai la tatou tala ina ua suiga malie mea uma o le aiga, o lea la ua fai nei le fa’atasitasiga a Salamasina ma nai ona tuagane ma o latou ta’it’oalua, ae ua misi lava e le lo’omatua si ona tuagane matua o Paulo fa’apea ma si ona to’alua o Eseta, ae tainane fo’i o si ona to’alua Palagi o Larry.

O le afiafi lava lea na fa’ate’ia ai le aiga ina ua alu atu le ta’avale a le tama’ita’i o Vaitimaleata, ae ua o atu ma le tama. Na motusia  vave lava le ta’ina o le meatuligi a Sila, ae tilotilo mai i fafo i le savavali atu a Vaitimaleata ma le tama. Na iloa mamao mai lava e le toeaina o Sila le alu atu a le ta’avale a Vaitimaleata, o lea na muto fa’atopetope ai loa le taina o le meakuligi, ae o lo’o alu lava kitala a Petelo ma Eteuati, fa’apea ma le aufaipese a Sala ma lo’omatutua fa’ataulaitu o Su’e, Tupu ma Lisi.

Na i’u lava ina tu a’e i luga Sila ma savali mai i fafo, ona ua fai si umi o tu pea le ta’avale, ua lagona le popole o le toeaina, ne i te’i ua oso se ma’i si ona tei, ae e le o iloa atu. Ae ina ua latalata atu i ai Sila, na matala mai ai loa le faitoto’a, ma oso mai i fafo se tama e matua’u lalelei lava i le va’ai. Ua tu nei Sila ma tilotilo atu i le tama, e tino lelei, e fa’asasa’o lona faitino, e pa’epa’e e pei lava o Vaitimaleata. Ua le mautonu le toeaina i lea taimi, ae na matala nei le faitoto’a ma oso mai i fafo le tama’ita’i, ma ‘ata mai i le tuagane o lona tina.

O le fa’ili lea na fai nei, ae maise ai o tagata na o ane e fa’alogologo, ua na o le mata’i mai nei o le mea lea ua tupu. Na fesili Salamasina i a Petelo, po’o le a le mea ua taofi ai fua le fa’ili. Na a’apa ane nei le tama ma u’u le lima o le tuafafine e to’atasi e auau i ai si ona tama, a’o soifua, “Sala, o Vaitimaleata lea ua sau.” Na feliuliua’i nei le lo’omatua ua le mautonu, “Petelo, o ai, o Ata, oi ta fe fe, talofa e, i si a’u tama po’o le a le mea ua sau ai nei ua pogisa, o fea o i ai?”

Na tu a’e nei i luga le lo’omatua o Lisi, ma savali ane ma nofo i talane o Salamasina ma milimili lona tua, “Sala, ‘aua e te popole, a lae e talatalanoa mai Vaitimaleata ma Sila, o lea ua savavali mai i le fale.”

“Lisi, talofa e, i si a’u tama, pe ua ma’i fua i le sau i le mea mamao, o fea o i ai, fai i ai e sau.” Ua tilotilo ane nei tuagane o Salamasina i le lo’omatua, ua o la iloa lelei lava, e ‘ese le auau o Salamasina i si ana tama lea, le teine o Vaitimaleata. Na tu tu a’e nei i luga Eteuati ma Falaniko ma savavali loa i fafo. E taunu’u ane, o lo’o fai pea le talatalanoaga a Vaitimaleata ma le tuagane o lona tina, a’o lea o lo’o tu pea le tama, ma fetilotilofa’i solo ona mata i le to’atele o le aiga o Vaitimaleata, aemaise ai ua mautu mea uma e nonofo ai.

E taunu’u ane Eteuati ma Falaniko, ua ma’ea ona fai tala a Vaitimaleata ma le tuagane o lona tina, o lea na toe savavali fa’atasi mai ai loa i totonu. Na fiu Sila e tau vaovao toeai’ina, ae ua la’a atu lava le tagata latou velo atu lona lima i si tama e mana’o e fa’atalofa. Ua ‘ata le tama ma lulu ane i ai lona, ma fa’apea ane, “Talofa lava.” E fa’alogo mai Eteuati ma Falaniko e tau le matala le fa’aSamoa a si ali’i. Na liliu mai nei i tua Sila ma fai ane i ona uso, “Se o maia, matua’i lua faitatala tele, o e fai ni lua mu’umu’u ma ni lua papa se i tilotilo atu i ai le tama.”

Ua alu nei le tali e, ae tali mai Falaniko, “ia o lou manatu lava e fa’ama’ima’i nei tagata, ma te fia iloa fo’i e ma’ua ia le ‘au o le paipa, e pei lava e i ai se mea na ou va’ai ai i le tama lenei, a Vaitimaleata, e sa’o a’u.” Ua ‘ata le teine ma a’apa atu lona lima ua u’u mai le lima o lana uo, ua ‘ata ane i ai le tama, ma punou ifo us sogi i a Vaitimaleata.

E faia pea...