Vaega: 138

Fa’atalofa atu i le alafa’i mai o le atunu’u i lenei taeao fou, malo le soifua, malo fo’i le onosa’i i faiva ma tiute o lo’o feagai ai i lenei aso. E i ai pea le fa’amoemoe o lo’o sologa manuia pea fuafuaga ma fa’amoemoega o lenei aso, i le fa’atasi mai a lo tatou Matai oi le lagi. Ae alo maia, o le a toe fa’aauau atu la tatou tala e pei ona masani ai.

Ua iloa nei e Misi ma Susana le mea lea e tupu i totonu o le aiga, ae ua lagona ai le fa’anoanoa tele, ona ua amata ona lepetia le nonofo fealofani o le aiga, ona o faiga leaga a le lo’omatua o Su’e, le to’alua lea o le uso lona lua o Paulo, lea sa avea ma Faifeau.

Ua tau mafaufau nei Misi, po’o le a se auala e mafai ai ona fo’ia lenei fa’afitauli, ae le i sosolo ma fa’aleaga ai le aiga atoa. O lea sa ia manatu ai, e sili pe a la fetufa’ai pea ma Petelo, ona o Petelo o lo’o avea ma Sa’o o le aiga. O le isi itu na manatu i ai Misi, ona o le leaga o le mea, o Petelo lea o le a afaina tele i le mataupu lenei. Ua toe nofo ifo i lalo Misi, ma toe fa’asolosolo ona mafaufauga, na i’u ai ina fa’apea sona manatu, e sili pe a talatalanoa muamua i a Vaitimaleata Caroline, le tama lea a Salamasina.

O le isi itu na tau i ai le mafaufau o Misi, o Vaitimaleata, o se tama’ita’i e malamalama lelei i tulaga fa’apea, o se tama’ita’i fo’i, e tau aliali lava ona uiga Samoa na e le kea i se tagata pe a le sa’o le faiga o mea o le aiga. Ua tonu nei i le mafaufau o Misi, e sili pe a usu i le taeao i Fagatogo ma alu sa’o loa i le ofisa o Vaitimaleata e talatalanoa e tusa ma le fa’afitauli lea o le a tula’i mai i totonu o le aiga.

Ua nofo ifo i lalo Misi, ua fa’asolo fa’asolo lava ona mafaufauga te’i lava ua maligi ifo ona loimata. Ua tau ona mafaufauga i le tina o Petelo, le lo’omatua o Eseta, o se tina e tautala i mea sa’o ma mea e lelei ai aiga. O se tina e mafana le mafutaga ma Salamasina, le tuafafine e to’atasi o Paulo. O se tina e naunau lona loto i mea e lelei ai aiga, ma tausi ai le nonofo filemu o tagata uma.

Na tau loa mafaufauga o Misi i uiga malie o le lo’omatua o Eseta, ‘ata loa ma lulu lona ulu, “Talofa e, i a Eseta, le lo’omatua e le i lavea lava lona lima i se tagata.” O uiga malie ma uiga fa’afiafia loto o le lo’omatua, ua tu mai nei i luma o Misi i lea taimi.

Ua o’o mafaufauga o Misi i si ona uso o Petelo, e ui lava ina fa’apea e le i ifo mai i le laualo e tasi, ae ua iloa lelei e Misi le alofa o Petelo i a te ia ma si ona to’alua, fa’apea si a la fanau. Ua atili ai ona maligi ifo loimata o Misi, na i’u lava ina tu a’e i luga ma fa’apea ane i a Susana, “Susana, su’e so’u ‘ofu, ou te alu taeao i Fagatogo.” Na fa’ate’ia Susana le to’alua o Misi, ina ua fai ane Misi i a te ia, ua tau mafaufau nei le fafine i le mafua’aga o le a alu ai Misi i Fagatogo.

“Misi, e leai, ta te o i Fagatogo, se i o’u fa’amatala lelei i a Vaitimaleata ia tala na fa’alogo i ai o’u taliga, e leaga pe a e alu na o oe, ae e sili pe a ta o fa’atasi, ona iloa ai lea e le teine le mea e tatau ona fai.” Ua toe mafaufau Misi, e moni fo’i, e sili pe a la o ma lona to’alua e va’ai Vaitimaleata. Ua fa’apea lava ona fai, ua ala usu i le taeao, ae na fa’ate’ia ina ua malamala a’e le taeao, o lo’o nofonofo Petelo i luma o lo la fale.

Ua le iloa nei e Misi ma Susana po’o le a le tala o le a fai ane i a Petelo, ae na iloa lelei lava e Misi le mea e tatau ona fai. “Oi, sole, se ta’i e ala po se, ua toetiti ‘ai oe e se moa i lou ala po.” Ua ‘ata Petelo ma tilotilo ane i a Misi, “E lelei fo’i pe a ‘ai e se moa, ae leaga pe a ‘ai e se isi tagata.”

E faia pea…