Vaega: 137

Tatou fa’afetaia pea le alofa ma le agalelei o lo tatou Ta’apau oi le lagi, ona o Lana tausiga alofa mo i tatou e le mavae, lea o lo’o tatou maua ai pea le ola i lea aso ma lea aso. E i ai pea le fa’amoemoe, o lo’o sologa manuia pea faiva o le atunu’u, ae maise ai o fa’amoemoega o le tagata lava ia. Ae ia fa’afo’i pea le vi’iga ma le fa’afetai i le Atua e le aunoa. Alo maia, o le a toe fa’aauau atu la tatou tala mo lenei aso.

Ua si’omia atoa le fanua o Alava’a i fale o tuagane ma fanau o le lo’omatua o Salamasina ae maise o ona aiga, ae o lo’o tu i le ogatotonu le fale talimalo ma le maota o le Sa’o o le aiga, lea ua nofoia nei e le atali’i o le uso matua o Sila, Eteuati, Falaniko, Pati ma lo latou tuafafine o Salamasina. Ua fai i lagi le folauga a Paulo, o le uso matua lea, ma le tuagane matua o Salamasina, a’o lea ua nofoia e lona atali’I o Petelo le suafa o le aiga.

Fai mai, o le mea ua tupu nei, ua foliga mai ua tau i ai se manatu o isi uso ona o lea ua nonofo fa’atasi uma nei i totonu o le ‘ele’ele e tasi, ae o lo’o matai ai le atali’i o lo latou uso. O le mea ua tupu, o fautuaga ma leo le manuia ma leo e malepelepe ai aiga o le a ua amata ona aliali a’e i totonu o le aiga. O Sila le uso lona lua o Paulo, lea sa o i le galuega a le Atua, o se tagata e filemu ona uiga, a’o lona to’alua o Su’e, o se tina e ‘ese le leaga faia o ona uiga.

O le ala ua taunu’u mai Eteuati ma Falaniko ma o la ta’ito’alua, o lea la ua amata ona solosolo i ai faiga leaga a Su’e, i le taumafai lea e ave’ese le suafa matai ua tu’u i a Petelo, ona fai mai a ia e le fetaui, ona o lea ua nonofo Sila ma Falaniko ma Eteuati i le aiga.

E ‘ese le leaga o lea ituaiga leo, a ea, ae maise ai pe a sau mai se fafine nofo tane i totonu o se aiga. E ‘ese fo’i le mata’utia o mea e tutupu mai ai i totonu o aiga, pe afai o le a sao mai le ituaiga leo leaga lea a ea. Ua na o le malepelepe, fea’aiga’i, taua’imisa ma fefulitua’ai o aiga, ua leai se nonofo filemu ma se nonofo fealofani e maua ai.

E le o iloa lava la e toeai’ina le mea lea e tupu nei, ona ua na o lo’omatutua lea ua fai nei le mulumuluga veve, e uiga i le aiga, a’o lea e nonofo toeai’ina e onaina le aiga. Fai ma la le fa’amatalaga, na maua lelei lava e le to’alua o Misi, le fafine o Susana le mulumuluga veve lea a Su’e, o Lisi le to’alua o Eteuati ma Tupu le to’alua o Falaniko.

Na alu ane Susana e momoli ane le meatausami a Sila ma Su’e, ae fa’alogologo atu Susana, o lo’o tele leo o lo’o talanoa mai i totonu o le fale, o lea na tu ai loa se i fa’alogologo po’o ai, ae fa’alogo atu Susana o lo’omatutua uma nei o lo’o fa’atasitasi i le fale o Sila ma Su’e. O le mea na lagona ai le loto tiga o Susana, ma toe fo’i ai ma ave le meatausami i lo la fale ma Misi, ona e fa’alogo atu le fafine, e ‘ese tala ia ua fai nei e lo’omatutua.

Fai mai na savali Susana ma ona loimata, na ona taunu’u lava i le fale, ato atu ma le mea’ai i luma, toe liliu loa o le a alu i le fale o Salamasina ma Vaitimaleata, ae tau vala’au mai loa Misi, “Susana, Susana, o le a le mea ua tupu, se tautala mai, o le a le mea ua tupu?” Ua tu le fafine ua le tautala, ae ina ua taunu’u atu i ai lona to’alua, na tagi ai loa ma fa’amatala i a Misi ia tala ia sa ia fa’alogo i ai i le fale o Sila ma Su’e.

Ua na o le punou o Misi i lea taimi, ma ona fa’alogona tiga, aua o lea ua iloa atu nei, o le a amata ona poia faleolo, o le a amata ona o’o le aiga i se tulaga pagatia, ona o lo’omatutua nei.

“Susana, ia fa’alogo lelei mai lava oe si o’u to’alua, ia tanu ifo lava i le ‘ele’ele lenei, ae tu’u mai se taimi se i o’u talanoa ai i a Petelo, ae ia e alofa mai, tausi le filemu i totonu o le aiga, va’ai oulua ma Losalia, e matua’i malie o ma loto ma si o’u uso o Petelo, i la oulua tautua, e leai se mea o fa’aletonu, ae ‘aua ne i oulua pei o lo’omatutua na, se o tagata ua matutua, e faigata lava ona fa’asaga tonu mafaufau, ae liliu mai oulua e fai lelei mea o le tatou aiga.”

E faia pea…