Fagogo: Lupe o le Filifili

Vaega: 134

 

Tatou fa’afo’i pea le vi’iga ma le fa’amanu i lo tatou Matai oi le lagi, ona o lona alofa ma Lona agalelei, lea fo’i ua mafai ai ona o tatou toe feiloa’i i le manuia i lenei taeao fou, malo le soifua, malo fo’i le onosa’i i faiva ma tiute o lo’o feagai ai i lenei aso. E ao ona o tatou ave le mua ma le fa’asao i le Atua, ona o Ana fa’amanuiaga lea o lo’o tatou ‘oa’oa ai pea i faleseu ma o tatou sa’a ai i ma’a o malie i aso uma o lo tatou ola.

 

Ae alo maia, o le a toe fa’aauau atu la tatou tala mo lenei aso. ina ua ma’ea le aso o Larry, na mata’i ai uma e le aiga ia le lo’omatua o Salamasina, aua fo’i e maliu si ona to’alua, ae o lo’o ma’i le lo’omatua. O le mea fo’i la lea sa mata’itu pea e si ana fanau po’o le a ni uiga o lo latou tina, ina ua leai si o latou tama sa o la to’alua i mea uma lava.

 

Ae na fa’ate’ia tuagane o Sala ina ua potopoto ma fa’atasitasi le aiga i le isi afiafi, ae fa’alogo mai ua tagi le lo’omatua, “Nai o’u tuagane e, e momoli atu la’u fa’afetai ma la’u fa’amalo i lo outou agaga mai i a te a’u, ae maise o le aso o si o’u to’alua, ave ia a’u e fai ma sui o si a’u fanau, e momoli atu ai la matou fa’afetai tele…ua tau le matala upu a le lo’omatua, aua ua va’ai atu nei, ua maligi ifo ona loimata. “Ae e i ai lo’u mana’oga ma ou te mana’o ia fa’atino vave po’o taeao po’o le aso e soso’o ai, tatou o i Upolu, se i asi le aiga o si o tatou tina.

 

“O lea fo’i fa’ato’a fo’i atu nai o tatou tausoga, e le mafai ona fa’aletonu i fa’alavelave e tutupu atu i a tatou i’inei, ae o lo’u mana’o ia tatou o e asi si o tatou tina o lo’o lagomau i Upolu fa’apea ma nai o tatou aiga, o la’u talanoa atu lea i lenei afiafi.”

 

Ua fa’ate’ia tagata o le aiga, aua sa i ai lo latou manatu e le toe fia fo’i Salamasina i le mea na ola a’e ai, aua o la’ua ma lona tuagane la’ititi o Pati na nonofo i le aiga o lo latou tina i Upolu, ae ina ua maliu, sa toe fo’i mai ai loa i Tutuila nei. O le mana’oga o Sala ua folasia nei, e le mana’o lava le lo’omatua e fa’atuai, o le ala fo’i lea ua ia folasia ai, ina ia iloa uma e ona tuagane le mea o lo’o i ai lona loto ma lona mafaufau.

 

Fai mai, e te le le seleni na o mai ma le fanau a Salamasina mo aso o si o latou tama, ae o lo’o i ai fo’i le vaega tupe tele sa teu e le lo’omatua ma lona to’alua, o lea la ua i ai fuafuaga a Sala, e fa’aaoga e fai ai se mea lelei mo le aiga o si ona tina i Upolu. Fai mai e le i uma atu tala a le lo’omatua, ae sau le pati ma le loto fiafia o fanau a ona tuagane ma lana fanau na o mai mai Amerika.

 

Ua fetilotilo fa’i solo nei tuagane o Sala, aua ua fa’ate’ia i le tala a lo latou tuafafine. O le upu moni lava, e leai se tasi o i latou na o’o sona manatu i lea itu, atonu fo’i ua i ai o latou manatu ua ola a’e fanau i Amerika Samoa, ma e le toe i ai nisi tulaga e ona toe o’o ai i Upolu. Ae o le mea moni, o si tagata ma si ona aiga, o a fo’i fa’alavelave na tutupu atu i a i latou i Amerika Samoa nei, e le mafai ona fa’atamala nai aiga o lo’o i Upolu.

 

O le a fo’i le lima vaivai ma le le tagolima o nai aiga i Upolu, ae sa tula’i ma savali, ona o le naunau o le loto i le fia fai aiga lelei. O a fo’i mea o lo’o tutupu i totonu o aiga, o faia e le Atua auala e silisili ona lelei e fo’ia ai fa’afitauli uma. O lea la ua fa’atoa lagona e ona tuagane i le taimi na tautala ai Salamasina, ina ia o i Upolu e asi si o latou tina, ae maise o nai o latou aiga.

 

Na tali le tuagane lona lua o Sala, le toeaina o Sila, manatua fo’i i le amataga o la tatou tala, o Sila na avea ma Faifeau, ae ua malolo mai, ona ua maua i gasegase o le tino, fa’apea ma lona to’alua o Su’e. O le tali a Sila na folasia i luma o isi ona uso o Eteuati, Falaniko ma Pati, e uiga i le fanoga a si o latou tuafafine. E tu’u atu le po lea, se i talatalanoa ai, ona toe logo ane lea o ia.

 

Ua fa’apea lava ona fai, ua tilotilo ane nei Samuelu i a Petelo, ua tu’u fesilisili nei nai teine Papalagi o ta’ito’alua ia o le fanau a Sala ma Larry, fa’apea ma le to’alua o Samuelu, po’o le a le mea ua tupu. Ae na fa’amalamalama ane i ai e Samuelu, le mea o lo’o mana’o i ai le tuafafine o lona tama.

 

E faia pea…

Comment Here