Fagogo: Lupe o le Filifili

Vaega: 133

 

Fa’afeiloa’i atu i le atunu’u i lou alafa’i mai i le manuia i lenei taeao fou i le alofa ma le agalelei o lo tatou Matai oi le lagi, e ao ai ona o tatou momoli la’au I foga’a ma sunu’I lapalapa o malo I le Atua Soifua, o Ia lava o le Tufuga ma le Mataisau o mea uma lava. Ae alo maia, o le a toe fa’aauau atu la tatou tala mo lenei aso, ae ia manuia le alo atu o le atunu’u I faiva ma tiute o le a feagai ai.

 

Na muta mai la tatou tala ina ua aofaga potopoto uma nei le aiga, ona o le maliu o le to’alua o Salamasina, le ali’I Papalagi o Larry, manatua fo’I, o lea ua nonofo Sala ma lona to’alua I le aiga, ma ua ma’ea lo la fale o lo’o tu I luga o le ‘ele’ele o Alava’a, lea fo’I na fa’amasino ai le aiga o Paulo ma le isi aiga ona o le ‘ele’ele lava lea.

 

Ua manumalo ai le aiga o Paulo, o lea fo’I la ua mafai ai ona fa’aaoga le ‘ele’ele lea e nonofo ai ma fau ai o latou fale. O suiga fou ma suiga e tele ua ofi mai I totonu o Amerika Samoa, o se lu’I lea I o tatou tagata, aua fai mai le tala, afai lava na a’oa’o mai a tatou fanau I uiga lelei ma uiga fa’atamali’I, o a lava mea e tutupu mai, e mau pea le to’ovae, e mau pea le ‘afa fili gata na a’oa’o ai ma fa’atonu ai e matua mai lava I le amataga e o’o mai i le aso.

 

O le aiga la lenei, o se aiga sa tumau pea I le fa’avae lea, o le nonofo fealofani, o le felagolagoma’I, o le loto fesoasoani ae fa’asilisili le alofa o le tasi I le isi, aua o le ute lea o so’o se fa’amoemoe o le tagata soifua. Ia e alofa atu, ona alofagia ai lea o oe, ia e foa’I ma lou loto malie, ona fa’amanuia mai lea o le Atua i a te oe.

 

E ui la ina ua feiloa’I aiga, ma ua potopoto lupe o le filifili ona o fa’anoanoaga e ala lea I le maliu o le to’alua o Salamasina, ae sa auai lava le agaga o le alofa ma le nonofo fealofani, e ala lea I le va’aia o sulu o le tino I totonu o le aiga. Ina ua taunu’u manuia mai le fanau a Salamasina ma Larry, sa aofaga potopoto ai loa le aiga, I le talanoaina o mea e ao ona fai mo le aso o Larry.

 

Fai mai, a’o le I potopoto le aiga atoa, na muamua lava talatalanoa Salamasina ma si ana fanau, I ona itu uma lava pe fa’apefea ona fa’atautai le aso o si o latou tama. Na taumafai mai pea le fanau a Sala, ina ia fa’afaigofie le aso o si o latou tama, peita’I, sa manatu fo’I Salamasina I nisi itu o le aganu’u fa’aSamoa. Ona ana fa’apea o lo’o maliu lo latou tama I Amerika e faigofie la, ae leaga o lea ua maliu si o latou tama I totonu o le aiga.

 

O le isi itu, sa manatu I ai Sala ona o si ona aiga, aemaise ai o nai ona tuagane o le a auai, ia fai lelei le aso o Larry, pe fai mai lava o le palagi, ae leaga ua afu le tautua a Larry I totonu o lona aiga. O le isi lea itu sa fa’amamafa I ai le tautalaga a Sala I lana fanau.

 

Ua fa’apea lava ona fai, ua tasi ai nei le manatu I le fanau a Sala e lafo ia I lo latou tina e faia se upu mo latou pe a potopoto le aiga. O lea la ua I ai le afiafi lea, ua potopoto uma le aiga ma ua auai le aiga atoa. Ua felafolafoa’I nei manatu ma finagalo e tusa ai ma le aso o Larry, ma sa autasi le aiga atoa, o le a fa’aaoga pea ie o le malo, ona o lo latou va’ai I le tautua a Larry I totonu o le aiga. O se aso ua sili ona matagofie lea aso, ma e leai se mea e tasi na fa’aletonu, aua ua pulupulu lima fa’atasi, o lea ua ma ma ai le avega.

 

E ui a ina ua agi sagulugulu matagi o aso tau ma aso vevesi, ae sa to’a pea le tai, I le fa’atasi mai o le Ali’I I ona itu uma. Fai mai, o Petelo lava na tu I le to’oto’o e tali nai aiga sa alolofa ane mo le fa’alavelave. E ui fo’I ina sa leai se paolo, ae ua paolo lava le aiga o Salamasina ae maise o nai a la uo mamae na o’o atu, mo alofa’aga ma fa’amaisega mo Sala ma si ana fanau.

 

Fai mai, a’o tu Petelo e tali aiga, ua na o le mimita o Samuelu, I le fa’alogologo atu e mamafa lava le lafolafo a si ona uso, lea ua tu nei e tausi le aiga. Na fiu le to’alua o Samuelu le tama’ita’I o Elisapeta e fesili ane I a Samuelu, ae ua na o le tu o le tama ma tilotilo ma fa’alogologo I le tautalaga a Petelo.

 

Na fa’ate’ia Samuelu ina ua musumusu ane Misi, “A ali’I Sam, e a, e le fa’ama’ima’I lava la’u tama a, oso I luga o le fua, ‘aua e te pala’ai, fai sou matai ona e alu ai lea I Amerika, a ua e alu fa’asasa’o ai lava I le masina ua lava le na.”

 

E faia pea…

Comment Here