Ads by Google Ads by Google

Fagogo: Lupe o le Filifili

Vaega: 132

 

Fa’atalofa atu i le mamalu o le atunu’u i lou alafa’i mai i le manuia i lenei taeao fou, malo le soifua, malo fo’i le onosa’i ma le fa’apalepale i faiva ma tiute o lo’o feagai ai. E ao ai ona o tatou momoli la’au i foga’a ma sula lapalapa o malo i lo tatou Ali’i Fa’aola, ona o le taulaga tutasi, taulaga e tasi ae afe, sa ia foa’i ai lona Soifua mo i tatou, ina ia o tatou maua ai le ola, ma ia maua atili ai pea i Ana fa’amanuiaga i aso uma.

 

Ae alo maia, o le a toe fa’aauau atu la tatou tala fa’asolo mo lenei aso, ae ia manuia ou faiva. ina ua atoa le fa tausaga talu ona nofoia e Salamasina ma lona to’alua o Larry lo la fale o lo’o i le fanua o Alava’a, na maliu ai loa le toeaina o Larry. Fai mai le tala, sa talia gata lava e Salamasina nei puapuaga, ae o le fa’amalosi ‘au a si ana tama o Vaitimaleata Caroline, fa’apea Petelo ma si ona to’alua o Losalia, sa avea lea ma ala na loto tele ai le tina i a Salamasina.

 

O tuagane e to’alua o Sala o lo’o i Amerika ma a la fanau, e leai se tasi e le i auai i le maliu o le to’alua o Salamasina. Na mafai fo’i ona auai ma le tama o Samuelu, le uso la’ititi o Petelo. Fai mai le fa’amatalaga, ina ua i’u manuia a’oa’oga na feagai ma Samuelu, na galue ai loa i totonu o le Ofisa o le FBi a le Malo Tele, a’o le mea ua tupu, e le i iloa lava e se tasi o le aiga, ua fai le to’alua o Samuelu. O se tama’ita’i lanu, ae o se loia fo’i i totonu o le a’ai o Uosinitone.

 

O le fanau a Salamasina ma Larry, e to’alua tama e i le va o Vaitimaleata Caroline ma lona uso la’ititi, ua fai aiga uma tama nei, ma e nonofo uma i tama’ita’i Papalagi. ina ua potopoto le aiga atoa i le maliu o le tama i a Larry, fai mai o se mea mata’ina e le nu’u atoa fa’apea ma tagata na auai, e leai se fanau e tu fa’aletonu.

 

Sa auai uma fo’i le fanau a Sila ma Su’e, o tama matutua fa’apea ma le teine lea e fa’aigoa i le igoa o Salamasina, e ofo tagata, i le to’atele o fanau ua tupuga mai i totonu o lenei aiga. O Pati ma Sumena ma le la fanau, ua matutua fo’i tamaiti, ua ma’ea fo’i a’oa’oga sa auai, e leai fo’i se tamaititi e fa’aletonu sana galuega. E moni ai le upu, ua aofaga potopoto Lupe o le Filifili, aua ua fa’atasia aiga i le futiafu e tasi. O fea lava e alo i ai le sa o le tagata, o si ona aiga lava, o lona fa’asinomaga lea, i lona olaga atoa. E pei ona i ai la tatou tala ua mavae atu, lea sa fa’aigoaina, O le Alofa e Fa’avae ai Aiga. Ua fa’apena le tulaga ua o’o nei i ai le aiga i lea aso.

 

Ina ua taunu’u manuia mai i fanua faigamalaga mai Amerika ma Hawaii, sa aofaga potopoto ai loa le aiga atoa, e talanoaina le aso o si tama i a Larry. Ae e le i faia le potopotoga lea a le aiga. Sa muamua lava feiloa’i ma fanau ma ta’ito’alua, fai mai e ofo loto o nai tama’ita’i Papalagi, fa’apea ma le to’alua o Samuelu, i le to’atele ma le anoanoa’i o le aiga.

 

Ua fa’ate’ia fo’i le aiga atoa, ina ua taunu’u mai Samuelu ma lona to’alua, le tamaita’i o Elizabeth, Elisapeta, aua e leai se tasi na iloaina. Fai mai le tala, tiga lava ona tele ane i ai tala a uso o Paulo i a Samuelu e pei lava e fai i le tua o le pato. Na o le ‘ata’ata lava o Samuelu ma tilotilo ane i si ona uso matua o Petelo.

 

Na gata le filoaiga a Petelo ma Samuelu i le maliu o si o la tina, le lo’omatua o Eseta, a’o le taimi lea, o lo’o fa’aauau pea a’oa’oga a Samuelu, e le i faia fo’i sona to’alua, a’o lea ua toe fo’i mai, ua fai le aiga o le tama. Na fa’apea ane nei i ai Petelo, “Samuelu, se i e logo mai fo’i a’u, o le a lava le mea ua e nofo ai i lenei fafine.”

 

Ua ‘ata’ata Samuelu ma fa’apea ane i si ona uso, “Kelo, e aoga uma lava tagata, atonu e i ai se aso e aoga ai lenei fafine i a te oe, o le tagata ola fo’i, ua tele suiga o nei vaitaimi, ia e manatua pea le tulaga le na, manatu fo’i i le lua va ma Losalia, ia o mea lava e fa’apena ona fai, ua pau fo’i o se mea ua o’o i ai le malosi o le nu’u.”

 

E faia pea…