Vaega: 131

Fa’afeiloa’i atu i lou alafa’i mai i le manuia i lenei taeao fou, malo le soifua, e i ai pea le fa’amoemoe o lo’o lagimaina le soifua laulelei o le atunu’u i lenei taeao fou, e ao ai ona o tatou fa’afo’i le vi’iga ma sunu’i lapalapa o malo, i le Atua Soifua, ona o Lana tausiga alofa mo i tatou i aso uma o lou soifua fa’apea ma si o’u nei ola vaivai. Ae ia manuia lou alo atu i faiva ma tiute o le a feagai ai i lenei aso.

Na muta mai la tatou tala, ina ua nofoia nei le isi itu o le ‘ele’ele o le aiga, e igoa o Alava’a e Sila ma Su’e, manatua fo’i o Sila o le uso lona lua o le toeaina o Paulo fa’apea ma lona to’alua o Su’e. O i la’ua fo’i sa galulue i le galuega a le Atua i totonu o Amerika Samoa. O lea la ua malolo mai ina ua maua Sila i gasegase o le tino. Ua ma’ea ona fausia lo la fale e nonofo ai i le isi itu o le fanua o Alava’a, o se galuega fo’i sa galue punoua’i ai le tama’ita’i o Vaitimaleata Caroline ma Petelo aua se malu mo Sila ma Su’e.

A tatou toe manatu i le amataga o la tatou tala, ona e manatua ai lea, o le fanua lenei o Alava’a, sa fai ai le fa’amasinoga a le aiga lenei ma le isi aiga, ae na a’e malo le aiga o Paulo ona ua fa’asino mai e le Atua le mea moni. O lea la ua aoga fo’i le finau ma le tu’ualalao a le lo’omatua o Eseta, lea la ua avea ma nofoaga o uso ma ta’ito’alua ma fanau a Paulo ma Sila.

Fai mai le tala, ua avea Su’e ma fa’atiga ulu ma i totonu o le aiga, e foliga mai e le i tu’ua lava ona uiga fiatagata ma uiga fa’amaualuga. Ua siliga ma le lo’omatua o Eseta ona fai ia uiga fa’apea, o le mea ua tupu, ua fa’asaga tau ane nei i le tuafafine o Sila, le tina o Salamasina, ae e le i tu’u mamaina e Sala, ae maise ai o le teine o Vaitimaleata Caroline.

Ua amata ona fa’asinosino le lima o le lo’omatua o Su’e, i tuaoi o le fanua, ua amata fo’i ona fai fai tala e uiga i a Petelo ma si ona to’alua o Losalia. Ua matutua le fanau a Petelo ma Losalia, ae fai mai le tala, e ‘ese le atamamai o le fanau lea. O se mitamitaga sili lea i a Petelo ma si ona to’alua o Losalia, lea o lo’o tausia nei le aiga, ma ua ma’ea ona fa’ae’e i ai le suafa matai o lona aiga, e sui tulaga i si ona tama o Paulo ua fai i lagi le folauga.

Ua fai fo’i le to’alua o le tama o Misi, ma o le fanua lava na fa’asino i ai le lima o Paulo ae e le i maliu e to ai le fale o Misi, o lea lava ua fa’atu ai le la fale ma si ona to’alua o Susana. E leai, e le o Susana lea na alu e tau ‘apu i Niu Sila, o Susana, o le alo o le Fa’afeagaiga sa galulue i le nu’u, ae ua si’itia mai i Pava’ia’i, ae ua nonofo Misi ma lo la alo.

Fai mai e ‘ese le fealofani o le to’alua o Misi ma le to’alua o Petelo, o uiga fo’i o Petelo mai lava i le amataga o le la mafutaga ma Misi, o lea lava e fa’aauau pea, e ui ina fa’apea ua matai Petelo, ae e le i suia ai uiga alofa ma uiga fa’amaualalo o Petelo, e fa’aali i a Misi, ma so’o se tagata. E ese le malu ali’i o lenei matai, fai mai le tala, e le gaoia, e le faia ni ana fa’aiuga i se auala pi’opi’o ma se auala fia fai mea, e le faia ana fa’aiuga i se mea e manuia ai na o ia, e leai, e matala lona loto ma lona mafaufau i mea e lelei ai le aiga atoa, ae le na o se to’alua pe to’afa.

Fai mai, o nei uiga lelei uma, sa fa’atonu ma a’oa’i ai e ona matua a’o soifua mai, ae salani i le tu’u alalo ma fautuaga lelei a le tina i a Losalia, o le pae ma le auli i totonu o aiga. O le manuia fo’i lea o aiga, o se tina e fautua lelei, ae le o se tina e fautua leaga, e malepelepe ai aiga ma le maua se nonofo fealofani.

Fai mai ua tu Losalia i lona tofi, e leai se mea e fa’aletonu i totonu o le aiga o Petelo, aua ua i ai le tina fautua lelei, le tina e onosa’i ma fa’apalepale, o le tina e le losilosi vale, a’o se tina ua ma’ea ona tapena lelei lona olaga i le alofa ma le fa’apalepale, e manuia ai aiga, nu’u ma ekalesia.

E faia pea…