Vaega: 127

Taeao manuia, i lou alafa’i mai i fanuga lelei o lenei aso fou. Tatou fa’afo’i ai le mua ma sunu’i lapalapa o malo i le Atua Soifua, ona o Lana tausiga alofa mo i tatou lea, o lo’o tatou maua ai pea le ola, ae maise o Ana fa’amanuiaga i aso uma o lou soifua, fa’apea ma si o’u nei ola vaivai. Ae alo maia, o le a toe fa’aauau atu la tatou tala e pei ona masani ai, ae ia manuia le alo faiva o le atunu’u i feau ma galuega o le a feagai ai.

Ua fa’asolosolo pea aso o le olaga, ua va’aia fo’i suiga fou ua i ai le atunu’u. i le maitau a le to’atele o tagata, e i ai lava suiga lelei, a’o le tele o suiga e le o ni suiga lelei, ma ua lepetia ai le va tu nonofo o matua ma fanau, o tuagane i tuafafine, o aiga i isi aiga. O suiga la nei ua le manuia. Ua maliliu uma le toeaina o Paulo ma le lo’omatua o Eseta, ae ua nofo nei Petelo e tausi le aiga. Ua to’alima le fanau a Petelo ma Losalia, o le la tama muamua lava na fanau, a’o soifua Paulo ma Eseta, o se mitamitaga lea i le lo’omatua ma le toeaina, a’o soifua mai.

Fai mai, e amo lava e le toeaina le tamaititi i lona ua ma savali, po’o fea lava e o i ai ma le lo’omatua e o lava ma ave Paulo la’ititi. O le igoa lea o le ulumatua a Petelo ma Losalia. E ui ina ua fai i lagi le folauga a matua o Petelo, ae ua lava tapena Petelo i le tausiga o le aiga, ua uma fo’i ona fa’ae’e i ai le suafa matai o le aiga, o lea la ua alu nei Petelo i ona faiva o le tausiga o le aiga.

O Petelo lava na muamua fai to’alua, i fanau uma lava a Paulo ma ona uso, o le mea fo’i lea fai mai le tala, e leai se mea na fa’aletonu i aso fiafia o Petelo ma Losalia. E ui lava ina fa’aletonu ai le mafaufau o le lo’omatua o Eseta, ae sa ia talia lava, ona o lona manatu alofa i si ana tama o Petelo, o lea na fa’atino ai lava le aso o Petelo e leai ma se mea e tasi na fa’aletonu. E fai o le aiga o Eseta mai Nu’uuli, a’o uso ma fanau a le toeaina o Paulo lea o lo’o i Amerika. Na auai uma lava i le aso fiafia o Petelo ma Losalia, ae na ta ai le faleaitu a le lo’omatua o Eseta.

E ui lava ina ua le toe va’aia i la’ua i totonu o le aiga, a’o a la a’oa’oga lelei ma tima’iga, sa manatua pea e Petelo ma Losalia, ina ua nonofo mai i le aiga. Ua le toe i ai ni pasi usu ma pasi moe, ua fa’ata atoa auala e aga’i atu i le nu’u o lo’o i ai Petelo ma Losalia. Ua le toe i ai se upu fo’i lea e alu alu lava le pasi fa’atu i talane o le auala. Ua matutua lava Sila ma Su’e, ae ua ola a’e fo’i le la fanau, e fa’apea fo’i Salamasina ma si ona to’alua, o lo’o soifua pea i la’ua, a’o le la fanau, ua tu tu mai nei e fai mea uma o le aiga.

O le tama’ita’i o Vaitimaleata Caroline, ua toe to’i mai i Samoa ina ua ma’ea ana a’oa’oga, ma ua maua ana fa’ailoga e mafai ai ona fa’avae lona Ofisa Loia i totonu o le atunu’u. O se mitamitaga lea i a Salamasina ma lona to’alua o Larry, fai mai, e sulu uma i ai tagata ma kamupani ua fa’avae i totonu o Amerika Samoa, ia Vaitimaleata i mataupu tau i fa’amasinoga.

O se tama’ita’i e tau sa’afia ona uiga, o se tama’ita’i e amio tamali’i, e se se i ai isi tagata fai mai o le tama’ita’i palagi, ae a sau le fa’aSamoa a Vaitimaleata Caroline, e muliga fo’i fa’aSamoa a tagata e atoatoa toto Samoa, i le fa’aSamoa a le tama’ita’i.

Ua litaea lona tama mai le Malo, ae ua avea le la fanau ma fesoasoani malosi i mea e fai o le aiga. O se aiga tu lelei, ona o le lelei o fa’atonuga ma tima’iga fa’apea fautuaga a o latou matua a’o soifua mai. O a lava la suiga ua ofi mai, ae sa ta mau pea i o latou loto ia a’oa’oga lelei na fa’asino i ai e o latou matua, a’o soifua. A’oa’o le tama e tusa ai ma ona ala, aua a o’o ina matua, e le toe te’a ‘ese ai.

E faia pea…