Vaega: 122

O le vi’iga ma le fa’afetai tatou te fa’afo’i fa’atasi i le Atua Soifua, ina ua mafai ona aulia mai e le atunu’u lenei taeao fou i Lona alofa ma Lona agalelei. E ao ai ona o tatou fa’apea ifo, “Le Ali’i e, fa’afetai, fa’afetai tele mo au fa’amanuiaga o lo’o matou o’ao’a ai pea i faleseu ma o matou sa’a ai i ma’a o malie i aso uma o lo matou ola, ia e alofa ma mafuta mai ma i matou i lenei aso, amene.”

Alo maia, o le a toe fa’aauau atu la tatou tala mo lenei aso, ae ia manuia lou alo alo i faiva ma tiute o le a feagai ai. Na muta mai la tatou tala ina ua fai le fa’afiafiaga le totogia a Misi, ae pese si tama o Kelo. O lea fo’i ua suiga malie le mataupu e uiga i a Losalia ma Petelo, o se fiafiaga sili lea mo i la’ua.

O mea fa’apenei, o mea e mafai lava ona fo’ia, pe afai e uia auala maualalo ma ia maua pea le fa’apalepale o le tagata. O a lava mea e tutupu mai, a to’a lava le loto o le tagata, e mafai fo’i ona ia fa’afoefoe malie mea uma, ina ia o’o ai i se taunuga lelei ma maua ai le loto fiafia.

Ae se i liliu la tatou tala po’o fea ua o’o i ai le fa’atasiga a le aiga o Paulo, lea o lo’o fai i le fale o lona tuafafine o Salamasina, ua logo i tino matagi lelei, ua va’aia fo’i ataata o ta’uleleia, ina ua a’e malo faiva sa feagai ai ma le aiga o Paulo. Fai mai o se aso ma se po fiafia mo le aiga atoa, e le gata i le aiga, ae ua fa’apea fo’i si tamaloa Palagi o Larry, e moni lava le upu, e le sili le ta’i, na i lo le tapua’i, e ui lava ina e le i malamalama Larry i le itu fa’aSamoa, ae sa fa’amatalatala uma e i ai e lona to’alua o Salamasina.

O lea la ua malamalama ai si ali’i Papalagi i ona itu uma, sa lagona fo’i e le Larry le popole alofa, ona o tulga ua o’o i ai le aiga o si ona to’alua fa’apelepele, ae o lea ua ia maua le tala, ua manuia le Fa’amasinoga, o lea ua lagona ai le fiafia o lona loto. Fai mai e le malolo le tamaloa Palagi i faiga a le lo’omatua o Eseta, e fai fai gase uma tagata, ae alu lava Eseta e le taofia.

O le mea ua tupu, e fa’afiafia lava Eseta, ae o lo’o mulu mai lava e le to’alua o le Faifeau o Su’e, ma le to’alua o Pati si lo’omatua. Ae o faiga a Eseta e le tu’u maia i lalo le fu’a a le lo’omatua i lea taimi. A sivasiva Eseta, tiltotilo atu ua toetiti pipi’i gutu o Su’e ma Lumepa le to’alua o Pati ma le to’alua o Sila, ua pei o le alu a le la’au su’isu’i.

Ua iloa lelei e le lo’omatua uiga taumuimui o le to’alua lea, e le gata e muimui ia, ae ua fa’apea fo’i ona fai a la tala e uiga i a Salamasina. Ae o le upu a Paulo na lafo i a Eseta, “Eseta, fa’alogo lelei mai lava oe, e le sili ifo lava oe na i lo lo’u tuafafine, ia e alofa i si o’u tuafafine, ia maua lou onosa’i, o Sala e le o se tagata fa’amaualuga, o le na lava e te iloaina, e le o se tagata fo’i e losilosi vale pe maua i le ma’i leaga, o le loto leaga, e leai, e filemu lava ma ona iloa teu le lua va, ia e alofa i si o’u tuafafine Eseta, fautua oe i ai, o a lava mea o le aiga e fai, fautua i ai oe, ona manuia lea o lo tatou aiga.”

O upu tima’i la ia a Paulo i a Eseta, o lea e teu lava i le loto o le lo’omatua, aua ua iloa lelei lava e Eseta ia uiga o Su’e ma Lumepa. A’o le mea ua tupu, e le tautala Salamasina, ae fai i le ‘ofe e Eseta le faletua fa’asolo atoa atu ai ma le to’alua o Pati. E o’o fo’i i ta’ito’alua o Eteuati ma Falaniko, e le tu’u mamaina i le lo’omatua o Eseta, pau lava le tala a Eseta, “Va’ai lava lo’u lima e le i lavea lava i se tagata e, va’ai lava lo’u lima.”

E faia pea…