Vaega: 120

Fa’atalofa atu i le mamalu o le atunu’u, i lenei taeao fou, malo le soifua, malo fo’i le onosa’i i faiva ma tiute o lo’o feagai ai i lenei aso. E i ai pea le fa’amoemoe maualuga, o lo’o aoina le masina i le soifua laulelei o le atunu’u, ae alo maia, o le a toe fa’aauau atu la tatou tala mo lenei aso, ae ia manuia le alo faiva o le atunu’u i feau ma galuega o le a feagai ai.

Na muta mai la tatou tala ina ua maua nei le avanoa e talatalanoa ai Petelo ma Losalia, o lea fo’i la ua folasia i malae manatu ma mo’omo’oga o Petelo e tusa ai ma le la mafutaga ma Losalia. Ua fia iloa ma fia mautinoa e Petelo pe fa’amaoni le alofa o Losalia i a te ia pe leai.

“Losalia, ia tautala mai, po’o fea o i ai lou loto, ae maise o lo ta fa’amoemoe, aua o upu moni lava, o le po na fai ai le ta tu’ugatala ou te alu atu ai i ou matua, o le po lava lea na ou fa’alogo atu ai ua fasi mai oe e lou tina, na ou toe fo’i mai ma lo’u fa’anoanoa tele Losalia, ona e fai o lo’u alofa atu i a te oe, ae o lo’u popole pe moni nei mea ua tutupu mai pe leai.

“Ua ou sauni fo’i Lia, afai lava o le a lau tala i a te a’u i le po lenei, po’o lea lava so’u alofa i a te oe, e fai  lava le mea e te loto i ai, e faigata fo’i lo’u naunau atu, ae o lo’o i ai se tasi ua sili a’e na i lo a’u.”

Na fai si umi o fa’atalitali se tali a Losalia, ae fa’alogologo atu Petelo, ua fogifogi mai le isu o Losalia, “Kelo, ou te fa’afetai atu i a te oe, e tusa ai ma le ta mataupu, aemaise fo’i o le tulaga ua tula’i mai, ae ou te ta’utino atu Petelo, e leai lava se tasi e fa’aluaina oe i lo’u loto ma lo’u mafaufau, ailoga fo’i e i ai e tasi na te mafaia ona ave’ese lo’u alofa mai i a te oe, e leai lava se tasi.

Ua tau le lagona le leo o Losalia i lea taimi aua ua maligi ifo nei ona loimata, “Kelo, o le mea na tupu, e le sa’o, ma e le moni fo’i, o faiga lava ia a o’u tuagane e va’ava’ai ma tilotilo o latou mata po’o fea ou te alu i ai, o faiga lava ia o tuagane latou, ana fa’apea fo’i e i ai sou tuafafine, o le mea fo’i lea e te faia, aua o le i oi mata o tuagane, o o latou tuafafine.

“Petelo, ou te fa’amalie atu ai i a te oe si a’u uo pele, e pele lava oe i lo’u loto ma lo’u mafaufau, ma e leai lava se tasi, e pei o le susulu o le la pe a ta toe fa’atasi Kelo. O la’u tali atu lea i lau fesili Kelo, ae po’o fea o i ai lou loto, ta toe amata i le po nei, ae o mea e tatau ona fai, ia e o’o atu i o’u matua fa’amolemole, ona fai ai lea o isi tulaga mo ta’ua.”

Ua manava i totonu Petelo, “Lia, ia e fa’apenei, e le o iloa e o’u matua le tulaga o lo’o i ai ta’ua, o le isi itu, o le ma va lea ma lo’u uso la’ititi o Samuelu, ona ua uma ona fai mai le tala a Samuelu i a te a’u, e uiga i a te oe, o se tulaga e tatau ona ou teuteuina muamua, ona fa’atoa o’u o’o atu ai lea i ou matua.

“Ae tu’u mai se taimi, se i o’u talanoa ai i o’u matua pe a toe fo’i mai, ona ta felogoa’i ai lea, ae e sili pe a e sau ta tou o ma Misi e toe momoli oe, pau le mea e sili ona taua i a te a’u, o lea ua e talanoa  mai, o lo’u alofa fo’i mo oe Lia, ta’ilo i le loloto o le moana, ta’ilo fo’i i le maualuluga o mauga pe mafai ona gata ai, o lo’u alofa mo oe se i iloga e tu’u ifo lo’u tino i le tu’ugamau ona fa’atoa mavae lea.”

E faia pea…