Vaega: 117

Ua o tatou molimauina le tausagi mai o manulele o le taeao, ua oso a’e fo’i le la i lona nofoaga masani, ua fa’ailoa mai ai le alofa ma le agalelei o le Atua mo i tatou i aso uma o lo tatou ola.E ao ai ona o tatou fa’apea ifo, “Lo matou Matai e, ia e fesoasoani mai ia i matou i lenei aso, ina ia taunu’u i le manuia a matou fuafuaga uma i lou alofa, a ma’ea ona matou fa’afo’i atu lea o le vi’iga ma le fa’amanu i Lau Afio e fa’avavau,fa’avavau lava, amene.”

Alo maia, o le a toe fa’aauau atu la tatou tala mo lenei aso, ae ia manuia lou alo faiva i feau ma galuega o le a feagai ai ma oe i lenei aso. O lo’o i ai pea la tatou tala i le fa’amuli a Petelo ma Misi, o lea ua amata ona tatala mai le loto o Petelo e uiga i lana manamea o Losalia.

Fai mai ua na o le fa’alologo o Misi, ae ua tu’u atoa le avanoa e tautala mai ai Petelo, o le mea ua tupu, o lo’o fia iloa e Misi, po’o fea o i ai le loto o Petelo. “Misi, ia e fa’apenei, ua i ai lo’u mana’oga, e sili pe a fa’aavanoa lo’u taimi ma te feiloa’i ai ma Losalia, e moni lava oe le uso, e tatau lava ona fai sa’u fa’aiuga i le mataupu lenei, ae ou te fia fa’ailoa atu i a te oe, Misi, o a’u, e le uma lo’u alofa i a Losalia.”

E le i uma mai le tala lea a Petelo, ae oso atu Misi, “Kelo, velo mai lou lima, o le a la le isi mea o lo’o e popole ai, o lea ua e tautala mai, se o mea faigofie mea uma na, pe a i ai le loto o le tagata.” Ua na o le punou o Petelo ma lulu lona ulu, “Misi, a e alofa mai, ia ‘aua ne i iloa e Samuelu, pau lava le mea ou te fia feiloa’i ai i a Losalia, o lo’u fia iloa ma lo’u fia mautinoa pe moni le tala ua ou iloa, ae pe fa’amaoni fo’i upu na tautala mai ai Losalia i a te a’u.”

Na vave ona maona Misi i lea taimi, e pei lava e fofo’e ‘ese atu se avega mamafa sa nofo ma Misi, aua o upu moni lava, o le alofa ia o Misi i a Losalia, alofa fa’aletuagane i lona tuafafine. Na feola fa’atasi a’e lava, o Misi o Petelo, o Solo ma Samuelu, a’o lea ua i ai le manatu o Petelo i a Losalia, ia o mea lelei fo’i mea ia, e atia’e ai aiga.

“Kelo, e te mana’o e te lua feiloa’i ma Losalia i le po lenei, e sili ai lea, ona e toe fo’i loa le toeaina ma le lo’omatua, ona faigata lea, ae maise ai o le tama tele o Samuelu, ae e sili lava le toe fo’i mai ae ua uma ona fai se lua tala ma Losalia, o la  fo’i e fa’atalitali mai si teine i sau tala e fai atu mo ia.”

Ua fai nei le tonu a Petelo ma Misi, o le po lava lea o le a alu ai Misi e va’ai pe maua se avanoa o Losalia e o’o ane ai se i fai se la ala ma Petelo. Ua alu nei Misi, fai mai tiga ona tu’ia vae o Misi i ma’a, e le i fa’atafa ai le savali a Misi. Na ‘ai atu lava e maile a isi aiga lea e i tafatafa o le fale o Losalia, e le i i fa’aitiitia ai le la’a a Misi.

Fai mai a oso ane i ai ta’ifau a aiga ia, ona tagi fa’apusi lea o Misi, ina ia ‘aua ne i iloa o ia lea o lo’o savali i luga o le auala, fai mai si tomumu a Misi, “O le mea la lea e leaga mea nei, o Petelo e ona le teine, ae ‘ai ai a’u e malie, ia soia ia, a ua tauto lava e amo le fana, ia amo ai pea, ae ta fe fe pe a iloa nei e Samuelu, ae tu’u ane i le lo’omatua o Eseta, o lona uiga, ua gau atoa le pisinisi a Polo.”

E faia pea…