Vaega: 113

Fa’atalofa atu i le alafa’i mai o le atunu’u i fanuga lelei o lenei aso fou, i le alofa ma le agalelei o lo tatou Matai oi le lagi. E i ai pea le fa’amoemoe maualuga, o lo’o aoina le masina i le soifua laulelei o atunu’u i lenei aso fou. Ae alo maia, o le a toe fa’aauau atu la tatou tala mo lenei aso, ae ia manuia le alo atu o le atunu’u i feau ma galuega o le a feagai ai i lenei aso.

Na muta mai la tatou tala ina ua ma’ea le talanoaga a le aiga, ae ua alo loa e fai le fa’amalosi tino latou, fai mai e nonofo uma le aiga, ae fai to’atasi e le lo’omatua o Eseta le aso. Ua amata ona ona le pa’u o le lo’omatua i le uaina, a’o lea taimi, ua na o le tu’i tino o le toeaina o Paulo, “Se o le lo’omatua lenei se e sili ai pe a fau se va’apa’u fa’i e fa’atafea atu ai i se motu tu’ufua, ua na o le niniva o lo’u mafaufau i faiga a le lo’omatua lenei.”

E le o iloa atu lava e Eseta mafaufauga o le toeaina, ae ua na o le tali e, fiafia o le aiga i lea taimi, ma tau valavala’au i a Eseta, “Tago i ai, ne i fa’apea lava a Paulo e te le mafai se mea, tago i ai Seka.” Ua atili ai le mimita o le lo’omatua, na i’u lava ina fa’asaniti i luga le ie o le lo’omatua ma fa’aaliali lana malu. Fai mai ua na o le ‘ata o le tamaloa Palagi o Larry ma fa’asinosino lona lima i vae o Eseta.

Ua le toe fa’atali le lo’omatua i lea taimi, na ona afe lava i luga o le ie, alu loa ma le fa’ataupati e le i toe fa’atali. ina ua ua le fa’afiafiaga malie a le lo’omatua, na fesilisi nei i ai isi au mau paolo o le aiga, “Seka, ai o lau malu lea na se’e ai Paulo a ea?” Ua ‘ata fa’amaela le lo’omatua, “Ioe, o lea lava, ae e le o Paulo, o la’u laumoli suamalie.”

Se i o tatou asia po’o fea ua o’o i ai le fa’amuli a Petelo ma Misi, aua o lea na fa’atonu e le toeaina o Paulo, ia fai se suavai e ave ai se umu a le Fa’afeagaiga ma lona faletua.

“Misi, sau loa e ta’ele, ona fai ai lea o se ta mea’ai, ua alu fo’i le aso ia.” Ua tau tu a’e nei i luga Misi, ua matua’i lagona le vaivai o le tino i lea taimi, aua fa’atoa o’o lea o Misi i se gaioi fa’apea, ae sa fa’aloto tele lava ona o lona va’ai atu i a Petelo, e pei o le selo i a Petelo mea uma.

“Se Kelo, se ua fa’atoa o’o lea o lota tino i se gaioi fa’apea, afai o le faiga lea o lona uiga, e le umi, ae ou fati, ia se i va’ai na gaioi mai lava i le taeao e le i vivini moa, lea fa’atoa malolo.” Ua ‘ata Petelo ma tilotilo ane i a Misi, “Misi, ia fa’alogo lelei mai lava, e leai se mea e te maua ma le filemu, a e le gaioi e te le ‘ai, a e le gaioi e le ai se mea e tu’u i le manava, tu ia i luga, matua’i e taea tele se.”

Na tu a’e nei i luga Misi ma ‘ata ae fa’alogo atu Petelo ua alu a’e le pese a Misi, “E le lalolagi e, o mea leaga, talu oe Eva i lou solomua i mea uma lava, ua ma’imau o le olaga manaia, ua e nofo fo’i ma fa’aleaga……” Ua ‘ata Petelo ma togi ane le solo i a Misi. Ae na toe fa’apea ane Misi, “Se Kelo, fa’afefea ea si teine o Losalia, se ta’alo fa’atamali’i le faiga o mea, ae le o lou ta’alo fa’apena, fai lelei se lua tala ma si teine, o la fo’i e naunau mai lona loto i a te oe, fai fa’alelei au mea.”

“Misi, na o lou alu lava e te ta’ele, ma fufulu ou lafa, alu la’ia, e leai sau feau e te fai mai ai i a te a’u, o lea lava ou te iloa le mea e tatau ona fai, tu’u la’ia ae alu e ta’ele, ua sau le manogi fa’ase’use’u.”

E faia pea…