Vaega: 108

Fa’atalofa atu i lou alafa’i mai i le manuia i lenei taeao fou, e ala i le tausiga alofa a lo tatou Matai oi le lagi, e ao ai ona o tatou fa’apea ifo, “Le Atua e, ia e alofa ma foa’i mai le onosa’i ma le fa’apalepale ia i matou i lenei aso, ina ia taunu’u ai i le manuia a matou fuafuaga uma, a’o le vi’iga ma le fa’afetai matou te fa’afo’i atu i Lau Afio e fa’avavau, Amene.”

Ua fa’aauau pea le manatu o le lo’omatua o Eseta, lea ua fa’alologo uma nei i ai le aiga. O upu moni lava e sa’o lele lava le manatu o le lo’omatua, aua fo’i, o ia na va’ai i ai ona mata, ma fa’alogo ona taliga, a’o soifua mai matua o Paulo, Sila, Salamasina, Eteuati, Falaniko ma Pati. O lea la o lo’o taumafai pea le lo’omatua, ina ia tutu fa’atasi le aiga i le fa’amasinoaga lenei aua a tutu fa’atasi ona manuia lea o le fa’amoemoe o le aiga.

“Tatou tutu fa’atasi ona manuia lea o mea uma, a mamulu atu loa le fanua mai o tatou lima o lona uiga, ua leai se aoga o le afu o o tatou matua sa maligi i luga o le fanua lea, ae tu’u ia au tala Paulo, e le toe ‘aina fa’amatalaga na i aso nei. A o o e tata’a i Hawaii ma Amerika ona o mai lea fai mai o o latou ‘ele’ele, e ta inoino e, o lo’u lima fo’i e le i lavea lava i se tagata, ae ou te va’ai atu e lavevea uma lava le aiga lea i lo’u lima.” Ua alu nei le talie a le aiga, ae ina ua fa’alogologo i le tautalaga a le lo’omatua o Eseta, o se tautalaga e fa’amalosi ‘au, e se tautalaga fo’i e lagona ai le loto tele i tulaga fa’apea, aua o lea ua i ai pine fa’amau o mea uma.

Na toe fa’auma upu a le lo’omatua o Eseta, “Paulo, loto tele, fai lou loto e pei ona e fai i aso e te alu ai e ta lau kitala, e te alu e ta’i tolu po tolu ao o e alu, ua pei oe na folo e se ‘ia, o le taimi lenei e te tula’i ai e fai mea ia o le aiga. Taga’i mamao, o lo’o ola a’e fanau, e le faia mo tatou, ae fai mo nai a tatou fanau ia e ola a’e. O fea e o i ai, o si tagata lava ma si ona fa’asinomaga. Tatou loto tetele, ma tatou tutu fa’atasi e fai le mea lea. O si o’u manatu lena i lenei afiafi, ae ia alofa le Atua, fesoasoani mai lona Agaga Paia, e fa’amalosi ‘au ma fa’asino mai le mea moni ma le amiotonu e tusa ai ma la tatou mataupu.”

O le aso o le Fa’amasinoga, e le i auai fanau a i latou uma nei, ona o lo’o feagai nisi ma a’oa’oga o nisi fo’i e pei o Petelo, sa nofo e tapena le meataumafa pe a ma’ea le Fa’amasinoga. O lea la ua i’u manuia mea uma e lagona ai le agaga fa’afetai i le Atua, ona ua ia fa’ailoa le mea moni. Na ona taunu’u lava o le aiga i le fale o Salamasina ma Larry, tatagi loa ma le fa’aumu a le lo’omatua o Eseta.

“Vi’ia le Ali’i, fa’afetai i le Atua ua i’u manuia mea uma, o fea si o’u to’alua fa’apelepele o Paulo, Paulo, sau, sau se i o’u sogi atu i a te oe si o’u to’alua fa’apelepele.” Ua na o le punou o le Fa’afeagaiga o Sila ma ‘ata, ae na savali ane nei Eseta ua sogi fa’aumiumi lava i a Paulo, “Paulo, you are my number uno-1, malo lava, ua a la, ia alo la’ia i ou faiva, ua uma atu le mea sa pei o se ao pouliuli i lo tatou aiga….o fea Larry, e, ua ta fia inu fo’i i sina ipu uaina.”

E faia pea...