Vaega: 107

Fa’atalofa atu i lou maleifua mai i fanuga lelei o lenei aso fou, i le alofa ma le agalelei o lo tatou Tama oi le lagi. E i ai pea le fa’amoemoe, o lo’o aoina le masina i le soifua laulelei o le atunu, ae alo maia, o le a toe fa’aauau atu la tatou tala mo lenei aso, ae ia manuia lou alo atu i faiva ma tiute o lenei aso.

Na muta mai la tatou tala, ina ua o’o nei le fa’asologa i le au faiava ma le au nofotane o le aiga, ma o lea ua muamua lava le tautalaga a le lo’omatua o Eseta, ona o se mana’oga na talanoa ane ai Sala i luma o lona aiga. O le mea ua tupu, e le i o’o ane, ae ua leva ona olioli atu le lo’omatua mo lana tautalaga.

“E fa’apenei, o a’u ua leva ona ou fia pese, se i fa’ailoa le tulaga o lo’o ta’oto ai le fanau o lo tatou aiga o Alava’a. Ou te momoli atu le fa’afeati tele i lo tatou aiga, ona o le manatu mai fo’i i si o matou nofonofo atu i totonu o le aiga, fa’amalo, fa’afetai. O le ‘ele’ele po’o le fanua o lo’o ta’ua i lenei mataupu, o le fanua e patino tonu lava i lo tatou aiga, o le uiga o la’u tala, ona o mata nei na va’ai, o taliga fo’i nei sa fa’alogo, ia o na vaitau, e le iloa po’o ai se tama’i simolo na fa’alogo i ai taliga o Paulo latou. Ua alu le talie a tagata, “O mata nei na va’ai o taliga fo’i nei na fa’alogo, o lima fo’i nei na u’u le sapelu ma ta le vao o le ‘ele’ele lea o Alava’a.

“O na fo’i aso e leai ma ni tagata o le nu’u na fia o i uta i le vao, e leai lava ma se tasi, ae na o le toeaina ma le lo’omatua, a’o soifua mai, na taina le fanua lea. Manatua la, o le tagata lava ia na muamua pa’u lana la’au i uta  i le vao, o le tagata lava lea e onaina le fanua. Ua uma fo’i ona fai e o tatou tua’a ia tuaoi o le fanua lea. O lea fo’i ou te iloa lelei lava le tuaoi o le fanua lea, o la’au na toto e le toeaina, o lea lava e ola mai i aso nei. E faigofie lava le mataupu, pe afai ua o’o i le Fa’amasinoga, o le igoa fo’i o le fanua, ua uma ona fa’amau e lo tatou tama, o le igoa fo’i sa fa’aigoa ai e lo tatou tama le fanua  lea, o Alava’a.

Ua tau manava le lo’omatua i totonu, toe sau ai loa i fafo, “Le mamalu o le tatou aiga, afai ua ave e le aiga lea i le fa’amasinoga, tatou o, tatou o’o i le fa’amasinoga, aua o le ‘ele’ele lea, ua uma ona fa’aigoa, e i ai fo’i tapuafanua o le ‘ele’ele lea, e ta loa le sefululua i le aoauli, e matua’i sa sa lava ona toe pa’o se mea. O le mea fo’i lea Paulo, a ta o i la aso o ta malolosi i le fanua lea, ou te viga atu lava i a te oe, ta te malolo pe a ta le sefululua, ona o le itu lea.

“Afai o le mea lea e manana’o ai le aiga lea, tatou o, o le a le mea e faigata ai, aua o lea ua i o tatou lima mea uma, Paulo, tu’u ia ou manatu fa’apena, o taimi nei, a iloa e moni ma fa’amaoni mea uma, e fa’ailoa e le Ali’i le mea amiotonu, ae a silasila le Ali’i o ni mea e fai i auala pi’opi’o ma le fia fai mea, e le manuia, e tuai a ae fai mai, ae tatou tutu fa’atasi, ma tatou felagolagoma’i i mea fa’apenei, aua o le fa’asinomaga lea o tatou, ae maise a tatou fanau mo aso oi luma, ‘aua le tu’ulafoa’ia fa’apea ‘ele’ele ma fanua o le aiga Paulo, ae maise fo’i le mamalu o le tatou aiga. Tatou loto tetele ma fa’amoemoe i le Atua, na te au maia le tali o mea moni, ua maligi afi afu o o tatou tua’a, tatou loto tetele ma tatou galulue fa’atasi.”

Na tau manava i totonu le lo’omatua o Eseta ma toe fa’apea ane, “O fea Larry, Larry sau e au mai sa’u uaina, o ou lima fo’i e le i lavea i se tagata, ae ou te va’ai atu e muamua lavea lo’u lima i a oe Paulo.” Ua alu le tali e a le aiga i lea taimi ma tilotilo ane i le lo’omatua, ua avea ma fa’amalosi’au i le aiga atoa.

E faia pea ...