Vaega: 106

Fa’atalofa atu i le mamalu o le atunu’u ua alafa’i mai i le manuia i lenei taeao fou, tatou sunu’i laia o lapalapa a malo ma fa’afo’i le mua i le Atua Soifua, ona o Ana fa’amanuiaga ma Ana meaalofa o lo’o tatou sapi ai pea i ma’a o malie ma talitali i aso uma o lo tatou ola.

E ui fo’i ina o tatou vaaia pea suiga fou ua ofi mai i totonu o si o tatou atunu’u, ae ia tatou tatalo fa’atasi ina ia i ai pea le filemu ma le alofa o le Atua i totonu o o tatou lau’ele’ele. Ae ia manuia lou alo atu i faiva ma tiute o le a feagai ai i lenei aso, ae o le a fa’aauau atu la tatou tala e pei ona masani ai i aso ta’itasi.

Na muta mai la tatou tala ina ua potopoto le aiga atoa lava, o fanau a uso o le tama o Paulo ma a latou fanau, o isi itu paepae o le aiga, e leai se tasi e le i auai i le talanoaga lenei. O mea lava fa’apenei i totonu o aiga, a poia loa Faleolo, ona lagona lea o le fa’anoanoa, ae peita’i, e mafai lava ona fo’ia, pe afai e lafolafo manatu ma fa’ailoa finagalo o le aiga i ona itu uma.

A taumate loa le ‘ete pe tua ma ni a se fa’amoemoe o se aiga, ona fesili loa lea, po’o oe o se lupe o le filifili pe leai. O lea la ua auai uma lupe o le filifili, aua e tau toto, ivi ma a’ano, e tasi le aluga, tasi le ie’afu, tasi le loto, tasi le agaga, tasi fo’i le aiga. Pe e te mau paolo lava, e le afaina lea tulaga, leaga o lea ua i ai fanau, ma sa tautua fo’i i totonu o le aiga i aso ma tausaga e tele, o oe fo’i la o le lupe o le filifili, ona o tulaga ia.

I le fa’atasiga la a le aiga na muamua lava saunoa Paulo, aua o ia o lo’o nofo mai i le aiga, ma sa ia fa’afeiloa’i fo’i i le aiga atoa, ae maise o le Fa’afeagaiga i a Sila, ona fa’asolosolo ai lava lea o le fa’ailoa o manatu ma mafaufau o le tagata e tusa ai ma le talanoaga ua alo nei i ai. O le itu na fa’amamafa i ai le talanoaga a Paulo, o le itu lea e fa’apea, e le mana’o e o’o le mataupu i le Fa’amasinoga, ona e ta mau pea lona manatu, e mafai ona fofo fa’afitauli nei i tua i aiga, e ala i le talatalanoa ma fetufa’ai i mea uma.

O lea la e fai le tautalaga a si toeaina o Paulo, a’o le lo’omatua lenei o Eseta, ua le mau lana nofo, i lona le malie i tala o lo’o lafo mai e Paulo i luma o le aiga. Na i’u lava ina tomumu ane i lana tama o Petelo. “Kelo, o a ia manatu fa’apea e talanoa ai lou tama, se ua iloa ai lava le leai o se ‘ate, e pala’ai, e, se ma’imau pe ana nofo mai i o’u talane, ua leva ona pu pu alaga i a te a’u. E le mana’o e o’o i le Fa’amasinoga, a’o lea ua o le aiga ave i le Fa’amasinoga, se o lou tama se Kelo, e leai se loto, e pala’ai, e ta fe fe, na o mea lusi a mea nei.”

Na toe musumusu ane nei i ai lana tama o Petelo, “Se Eseta, ae a pe a onosa’i lou loto, o lae e fai le tautalaga a le toeaina, onosa’i, e sau se taimi e malamalama ai mea uma, ‘aua e te faia se mea e i’u a’e fo’i, ua e toa lavea ai, onosa’i ma fa’atalitali.”

Na fetaui le tilotilo mai i tua o si toeaina o Paulo, ae taia lana pupula i le ‘atigu a le lo’omatua o Eseta ma liliu i le isi itu, alu atu ai ma le lulu o lona ulu. O nei faiga uma, na iloa lelei mai lava e le tuafafine o Paulo, le teine o Salamasina. Ua ‘ata Sala ma tilotilo i lalo, ae ua iloa lelei lava e Sala le mea o lo’o ‘atigu atu ai Eseta i lona tuagane. Ua fa’asolo pea le fa’ailo’aga o manatu o le tagata lava ia, ae na fa’amulimuli lava i a Salamasina.

Ina ua fa’ai’ui’u le tautalaga a Salamasina, na fa’apea ai loa ana upu mulimuli. “Ou te talosaga atu i le mamalu o lo tatou aiga, pe a pe a tu’u atu se avanoa i le tina i a Eseta mo sona finagalo, aua o upu moni lava, o Eseta na mafuta ma o tatou matua i aso uma, o i fo’i la, tatou te iloa ai le mea e tatau ona fai.” E le i uma mai upu a Salamasina, ae puna a’e loa le lo’omatua o Eseta. “O a’u ua leva ona ou fia pese, fa’afetai atu i lau afioga Salamasina i lou manatu mai i si nei lo’omatua.”

E faia pea