Vaega: 104

Fa’atalofa atu i lou alafa’i mai i le manuia i lenei taeao fou, i lea alofa ma le agalelei o lo tatou Tama oi le lagi. E i ai pea le fa’amoemoe, o lo’o aoina le masina i le soifua laulelei o le atunu’u, ae ia manuia faiva ma tiute o le a feagai ai i lenei aso. Na muta mai la tatou tala ina ua ma’ea nei le fa’afiafia na alo i ai tina o le nu’u, ona o le taliga malo o lo’o i le maota o le Fa’afeagaiga ma lona Faletua.

Ua o’o nei i le aso e feiloa’i ai le aiga o Paulo, ona o le fa’amasinoga o lo’o loma nei i le va o aiga e lua, ona o le ‘ele’ele e igoa o Alava’a. O le ‘ele’ele lenei fai mai e alu e tau i atumauga le tele o le ‘ele’ele o le aiga o Paulo, ae peita’i, ua i ai tagata ua o latou manatu ifo, o ‘ele’ele fo’i nei e fa’asino i a i latou. O lea la ua o’o ai i le Fa’amasinoga le mataupu, a’o le toeaina o Paulo, e le o mana’o e o’o i le Fa’amasinoga le mataupu lenei, ona o lona manatu, e le faia e le Fa’amasinoga se fa’aiuga, a’o aiga lava ia i le va fealoa’i ma le agaga malilie e fa’amautu ma maua ai le nonofo filemu o aiga.

O lea la ua potopoto nei le aiga o Paulo i le fale o lona tuafafine o Salamasina, ona e feso’ota’i ai ma nai ona uso o Sila ma Pati lea o lo’o galue Sila i le galuega a le Atua, a’o Pati o lo’o fai ava i le nu’u o Vatia. O le ala ua potopoto uma le aiga, a’o le mea ua tupu, a’o le alu le malaga a Paulo ma Eseta, ua mana’o fo’i Petelo e alu ai ona o lona manatu e fia fa’alogologo, aua a iloa malamalama le tagata i lona fa’asinomaga, e le toe te’a ‘ese ai.

Ua potopoto le aiga atoa i le fale o le tama’ita’i o Salamasina, ua uma fo’i ona talatalanoa le tama’ita’i i lona to’alua palagi o Larry e tusa ai ma le mataupu e uga i si ona aiga, ma ua malie i ai Larry i le itu. E moni lava le upu, a malamalama lava le tagata e le tau fesiligia fo’i sana fa’aiuga lelei e fai. E ui fo’i ina fa’apea o le palagai le to’alua o Salamasina, ae sa fa’ailoa pea ma talatalanoa i ai le teine, e uiga i tu ma aganu’u fa’aSamoa. Ae e i ai fo’i nai isi taimi a fai atu i ai Sala i a Larry o le fa’alavelave ae sau le tali a Larry, “Oka, oka Sina, to much lavelave, lavelave, oka, oka.” Ia ona uma ai lava lea i’ina ae e fai lava e le tamaloa palagi ia fa’alavelave e le tu’ua.

O le isi fo’i lea itu na talatalanoa ai pea Sala i lana fanau, ia o latou iloa lelei le tele o fa’alavelave fa’aSamoa, ma e tatau lava ona o latou malamalama i lea itu. O le teine ulumatua o le fanau a Salamasina ma Larry, le tama’ita’i o Caroline Vaitimaleata, e ‘ese le fiafia o le tama’ita’i i le olaga fa’aSamoa, ma ua mautu ai fo’i i’ina se manatu o Sala, ona e va’ai atu i lana tama teine lea, e i ai lona agaga alofa ma e fiafia i le fa’aSamoa.

Fai mai na fa’ate’ia Larry ina ua taunu’u ane i le fale ina ua manava lana galuega, ua matua’i fa’atumulia le la fale, e fai o totonu a’o fafo. O lea ua taunu’u ane le ta’avale, ma na ona va’aia muamua lava le to’atele o tama o lo’o nofonofo i lalo o niu ma talatalanoa ai.

E ofo le loto o si tamaloa Palagi, i le to’atele o le aiga o Salamaina, e fai o le tumutumu o totonu o le fale, ae o le anoano o lo’o nofonofo solo i lalo o niu i tua ma luma o le fale. Na fa’apea mafaufauga o le tamaloa Palagi, “Oka, oka, ua kumu lalo gei.”

E faia pea…