Vaega: 89

Fa’atalofa atu i le mamalu o le atunu’u i lou alafa’i mai i le manuia i lenei taeao fou i le alofa ma le agalelei o lo tatou Tapa’au oi le lagi. E ao ai ona o tatou fa’apea ifo, “Le Atua e, o Oe lava o le Mataisau o mea uma lava, matou te fa’afo’i atu le vi’iga ma le fa’ane’etaga i lau Afio i lenei aso. Ia e alofa foa’i mai le loto fa’amaualalo ia i matou, ina ia mafai ai ona o matou talia lu’itau o le olaga nei, ae fa’afo’i atu lava le vi’iga i Lau Afio e fa’avavau, Amene.

Ia manuia le alo faiva o le atunu’u i feau ma galuega o le a feagai ai i lenei aso, ae alo maia, o le a toe fa’aauau atu la tatou tala fa’asolo, Lupe o le Filifili mo lenei aso. Na muta mai la tatou tala, ina ua matagofie le mafutaga a Paulo, Eseta ma le la fanau o Petelo ma Samuelu. O le isi itu, ua toe suiga malie le talatalanoaga ma le fetufa’aiga a le Fa’afeagaiga ia Sila ma lona Faletua o Su’e, ma ua ma’ea ai le tonu lelei aua le aga’i i luma o aiga.

Se i o tatou liliu e asia le aiga o Paulo ma Eseta ma le la fanau. Ua ma’ea le meatausami a le lo’omatua ma le toeaina i lea afiafi, ma ua talatalanoa fa’asamasama moa nei e fa’amatala i a Petelo le latou malaga fa’atasi ai ma le latou fiafia lea na fai ma Salamasina ma Larry i le po. Na alu nei le tali e, ina ua toe fa’amanata e le lo’omatua  le mea na tupu i le moe sa’esa’e vavale o Paulo, ua ‘ata ta’afilifili nei Petelo, ae ua toetiti pu le alaga o si lo’omatua o Eseta i le fe’ini a le toeaina o Paulo.

Ia ua o tatou iloa fo’i, a o’o lava i suaga fa’ale aiga, e alu ai lava ma fa’amatalaga fa’alupelupeina, ae o le uiga lea o le upu, aiga, e talatalanoa ma fetufa’ai, matua ma fanau, a i ai fo’i nisi e ‘ese atu, e le ufiufi lava tala, aisea, aua e ma ma lava tala o lo’o lafo, e ‘ano’anoa pe fa’aleaga ai se isi tagata.

A ‘ata’ata Petelo i tala a lona tina, nofo, aua ua o’o nei ona mafaufauga i le tama’ita’i o Losalia. Ae o le tagata na iloaina le tulaga lea, o Samuelu, ona e fai lava ma fa’asi’usi’u mata ane Samuelu i lona uso. E moni lava o lo’o fiafia, ae e i ai lava le mea o lo’o mamafa i lona loto ma lona mafaufau e le o iloa e se tasi. Na fa’apea nei mafaufauga o Samuelu, “Ou te fia iloa lava po’o le a le mea lea e mamafa i le loto o si o’u uso, aua e moni lava o lo’o ‘ata ma fiafia, ina ua toe mafuta lo matou aiga, ae e le o atoatoa lona fiafia, o lona uiga, e i ai le mea na tupu, ua mafua ai.”

Na i’u lava ina tu a’e i luga le toeaina o Paulo ua to mai i lalo le kitara ma fa’atatagi loa uaua. Ua toe fa’alogologo le lo’omatua o Eseta i le si’ufofoga malie ma le fa’amalie loto o Paulo i lea afiafi, aua o le leo o lava o si toeaina lea a alu ai e tata e ta’i fa po, fa ao o alu, ae tia’i ai lava na o Eseta ma le la fanau. O lea la ua toe fa’ai’ila nei le taleni a le toeaina i lea afiafi.

“Se Paulo, se ai fo’i o le a ou fa’alogo i lou leo pa’ulua, lea na ou se’e ai i a te oe.” Ua ata le toeaina, ae alu le tali e, a le la fanau o Petelo ma Samuelu. “Se tina, se ‘aua e te fa’alavelave se i tatou fa’alogologo i le leo e gata ai leo, o lea ua fiafia si toeina i lenei afiafi, ‘aua e te fa’alavelave.”

E faia pea…