Vaega: 87

Fa’atalofa atu i le mamalu o le atunu’u i lenei taeao fou, i lou alafa’i mai i le manuia, e ao ai ona o tatou fa’apea ifo, “Le Atua e, e moni ma fa’amaoni au afioga, aua o le sulu lea i o matou vae ma le malamalama i o matou ala, alofa ma foa’i mai le fa’atuatua i o matou loto, ina o matou maua ai Lau fa’amalologa mo i matou i itu uma lava, a’o le vi’iga ma le fa’ane’etaga e fo’i atu lava i Lau Afio le fa’avavau, fa’avavau lava, Amene.”

Ae alo maia, o le a toe fa’aauau atu la tatou tala mo lenei aso, ae ia manuia faiva ma tiute o le a feagai ai i lenei aso. Na muta mai la tatou tala ina ua taunu’u le malaga a le Fa’afeagaiga i a Sila ma ua fa’atasi nei ma lona Faletua i a Su’e, ae maise o si a la fanau.

Na liliu ane nei Sila ma tilotilo ane i lona to’alua i lea taimi, ma fa’apea ane, “Nofo mai i lalo, malie fo’i oe, e sa’o lava a oe, sa i ai le mea na tupu, ae e le o se mea fo’i lea e fa’apea na matou misa pe a, ae ina ua matou fa’amavae ma si o’u uso o Paulo ma si o ma tuafafine, ua ‘ese lava o’u fa’alogona, e foliga mai e i ai se mea o le a tupu.”

Na saofa’i fa’atopetope ifo nei i lalo le Faletua i a Su’e, ma aunagi ane loa i lona to’alua ina ia fa’amatala uma ia mea na tutupu. Na amata nei le fa’amatalaga a le Fa’afeagaiga i lea taimi, amata mai lava i le latou feiloa’iga ma lona uso o Paulo ma Eseta, i le Maketi i Fagatogo, alu ai lava lea, ina ua o latou taunu’u i le fale o Salamasina ma Larry.

O le latou fiafia na fai i lea afiafi ma si o la tuafafine, fa’atasi ai ma le tau pa o le va’a o le lo’omatua o Eseta i a Paulo, i le le teuteua o lana moe. Soso’o ane ai ma le faiga o le latou mea’ai, sa lelei lava mea uma. Ua o’o nei le fa’amatalaga a le Faifeau i latou talanoaga lea na fai e uiga i le fanua o Alava’a, lea ua fa’aulu ai le tagi a le aiga, o o latou ‘ele’ele.

Ae ina ua o’o le fa’amatalaga a Sila i le taimi na o latou fa’amavae ai o le a o ‘ese mai ma le fale o Sala, na fa’ate’ia le Faletua i le va’ai atu ua maligi ifo loimata o Sila i lea taimi. Na a’apa atu nei Su’e ma milimili lona lima, “Sila, se ‘aua e te fa’apena, ai fo’i ona ua pau o le valevale alofa o si ou uso i a te oe, o le na lava e te iloa, o Paulo, e agamalu, toe loto maualalo, e pei o tama o lo’o i Amerika, ae soia ia e te fa’apena, tatalo i le Atua ia manuia mea uma.”

Ua tau to’a mai le Faifeau i lea taimi, ae na toe tatao ane lava lona Faletua, “Sila, ia o le a la le mea na tupu, o ai le aiga ua fai le latou tagi, fa’amatala mai i te a’u, ou te fia iloa mea uma, ona fai atu ai lea o sa’u fautuaga.”

Na fa’amatala uma nei e Sila i a Su’e mea uma, ae maise ai o le ‘uti’uti o le taimi, ma e tatau lava ona toe faia sa latou talanoaga i se taimi vave, ae e le i o’o i le aso o le fa’amasinoga. Ua e tautala le Faletua, ae manatua fo’i, o lea e nofo ma Salamasina, le la tama teine e to’atasi ia le lisi o mea na tutupu, a’o alu le malaga a lona tama.

O lea la e tau su’e e Sala se taimi e la te talanoa ai ma lona tama e uiga i le alu ane o le lo’omtua o Litia i lo latou fale. Fai mai, na ona maua lava o le avanoa o Sala, nofo ifo loa i lalo ma fa’amatala uma i lona tama mea na tutupu fa’apea ma tala a lona tina sa fai e uiga i le tuafafine o lona tama o Salamasina.

“Tama, e ‘ese lava uiga  o tina latou, ua ou fiu fo’i e taumafai, e le mafai lava, e ‘ese lava ona uiga, e fia fa’alialia, ma le fia maualuga, ua ou iloa lelei lava Papa, e fa’alogo fo’i lava o’u taliga o fai ai tala a fafine o le aulotu. E le iloa lava lava e Tina, tausi lona mamalu, o le tina o le nu’u ma le ekalesia.” Ua le gagana le Faifeau, ae ua na o le moei’ini o ona mata ma lulu lona ulu.

E faia pea