Vaega: 85

Taeao manuia i le alafa’i mai o le atunu’u i fanuga lelei o lenei aso fou, o aso e fa’aopoopo i aso o lou soifua fa’apea ma si o’u nei ola vaivai. Tatou sunu’i ai lapalapa o Malo ma fa’afo’i le vi’iga i le Atua Soifua, ona o lana pule fa’asoasoa ma lona alofa lea o lo’o tatou maua ai pea le ola ma le malosi i aso uma. Ae alo, maia o le a toe fa’aauau atu la tatou tala fa’asolo, ae ia manuia le alo faiva o le atunu’u.

Na muta mai la tatou tala ina ua ma’ea le mafutaga fa’aleaiga a Paulo, lona to’alua o Eseta ma le la fanau o Petelo ma Samuelu. Atonu, ua taofi mau i le loto o Samuelu nei fautuaga lelei ua tu’ua atu e ona matua ma si ona uso o Petelo. Ae o le a liliu la tatou tala i le Fa’afeagaiga o Sila, le uso o Paulo, lea ua alu le malaga e aga’i atu i Tula, i le afio’aga o lo’o galulue ai i le galuega a le Atua.

Ua ma’ea le tautalaga a le lo’omatua o Eseta, e apoapoa’i ma fa’atonu ai Samuelu i le mea e tatau ona fai aua le aga’i i luma o lona olaga. Ua ma’ea fo’i le tautalaga a le toeaina o Paulo, o lea la ua o’o nei i le itu a Petelo le mataupu. “Ia Samuelu, o lena ua ma’ea atu le a’oa’iga mai i o ta matua, ma e talitonu lava lo’u loto, ua e lagonaina, e talitonu fo’i lo’u loto, o le a e talia ma lou loto fiafia upu ua tima’i atu ai o ta matua i a te oe le uso.

Va’ai oe, e leai lava nisi o lo tatou aiga, na o ta’ua lava, e leai so ta tuafafine, na o ta’ua lava, e leai fo’i la se faigata, ae o lo’u va’ai atu i a te oe, e foliga mai ua e alu fa’asolo atoa lava oe, ua leai lava e tilotilo mai i tua ma tilotilo i ou talane po’o ai o nonofo atu ai. O le mea lea Samuelu, ua saoasaoa tele lau alu, tu’u tu’u mai i tua lou vae, o le isi itu lenei ou te fia talanoa atu ai Samuelu, se tu’u ia lou fa’amisa solo, e leai se aoga, o na mea uma.

O lea lava ou te onosa’i pea ma onosa’i pea, aisea, aua e le o oe se isi, o oe o lo’u uso tu ‘ofe, e tasi lo ta aluga, tasi lo ta ie ‘afu, tasi lo ta fala. O le upu fo’i e fa’apea, o a’u o lo’o nofo i le aiga, ailoga e sa’o lea upu, o ta’ua o lo’o nonofo i le aiga, e tautua o ta matua ma fai mea o le aiga, ae ua e tu’ulafoa’i mai lava mea uma i a ta ita. O le na lava e te iloa, ou te vaivai i tua tau a’oa’oga, ae o lo’u fa’amalosiau, o oe, aua o nei mea uma ou te fa’atinoina, e le gata mo le tausiga i o ta matau, ae fa’apea fo’i la’u fesoasoani mo lau a’oga, ina ia e i’u lelei ma maua se manuia mo lo tatou aiga.

“Samuelu, tu’u loa, o lena ua fautua atu ma tu’u atu se a’oa’iga a o ta matua i a te oe, alofa mai si o’u uso, liliu mai e ta te so’oso’o tau’au fa’atasi i mea uma, ona manuia lea o si o tatou aiga. Ma ia e alofa mai, ua sala fa’afia o ta matua i luma o le nu’u ona o oe, alofa mai Samuelu, va’ai mai i lou nofonofo atu ma le taumafaiga o mea o lo tatou aiga. ia o la’u talanoa atu lea i lenei afiafi, ae ia manuia lava oulua matua, fa’apea fo’i le uso nei, ia ae ola si o’u nei tagata vaivai.

“O le isi itu ou te fia talanoa atu ai vaeane fo’i o ta matua, Samuelu, o le manatu na ou tu’uina atu e uiga i lau fa’aloia lea na e talanoa mai ai i a te a’u, ua lelei, ua ou talia fo’i, o le a fo’i so’u mantu na i ai, i le avea o oe ma foma’i, ia fa’ata’atia  ‘ese. Ae alo i ou faiva, ou te iloa ua toetiti i’u mai a’oga a Vaitimaleata mai Amerika. ia e manaia fo’i, a tele lava loia i lo tatou aiga, o le tele fo’i lea o tagata ua silisili ona pepelo i lalo o le la.”

E faia pea…