Vaega: 5

Tatou fa’afetaia pea le alofa ma le agalelei o lo tatou Tapa’au oi le lagi, ona o ana fa’amanuiaga mo i tatou i aso uma o lou soifua fa’apea ma si o’u nei ola vaivai. E ao ai ona o tatou fa’apea ifo, “Le Atua e, o ai ea o le a matou o i ai, o lo’o i a te Oe upu o le ola e fa’avavau, ia tumau atu pea Lou vi’iga e fa’avavau, Amene.” ia manuia lou alo faiva i lenei aso.

Na muta mai la tatou tala ina ua fa’alogo mai le lo’omatua ma le toeaina, ua tau mao Petelo i a Samuelu. Ae ina ua iloa mai e Eseta ua savali atu Petelo ma le sapelu i a Samuelu, o lea na ia fa’ataitaio ai ma tamo’e mai e taofi Petelo.

E le i uma atu tala a Petelo, ae feato mai e Samuelu mea na i totonu o le fale, ua tu a’e nei i luga le toeaina o Paulo, ina ua va’ai mai ua savali atu Petelo ma le sapelu.

“Samuelu, Samuelu, o le a le mea lea ua e faia, a, a fai atu Petelo i a te oe, ona e fa’alogo lea, pe afai ua le sao atu sa ma upu i a te oe. Ua sau lava le fiu i au amio, ua pologa ai o ma loto ma lou tina, o afea e tu’u ai, o afea, ou te ofo lava Samuelu i a te oe, ua uma upu lelei, uma a’oa’iga lelei e tu’u atu i a te oe, ua ma le iloa se isi upu e toe fai atu i a te oe ali’i.”

Na fa’ate’ia le lo’omatua o Eseta i le fa’alogo mai o lo’o ‘ava’avau atu Paulo, na i’u lava ina tu’u le lalagaina o le ie to’oga, ae savali ane i le fale o’o lea e fai ai nei finauga a Paulo ma lona atali’i o Samuelu. E le i toe fa’atali Petelo i lea taimi, ua pogisa lona mafafau, ua alu ifo lava le ita ma le tiga o lona loto.

O le savali na maitau atu nei e le lo’omatua o Eseta, o le savali lava lea a Petelo e fa’ao’o ai manu’a i a Samuelu, o lea na tamao’e mai ai loa ma fa’ataitai o mai i a Petelo. “Petelo si a’u tama, alofa mai, ‘aua, ‘aua, ia e va’ai i si ou uso, Petelo alofa mai.” O le fa’ataitaio lea a lona tina na toe tu ai loa le tama ma tilotilo ane i le tamo’e ane a si ona tina i a te ia. Ua tu nei le lo’omatua o Eseta i luma o lana tama o Petelo.

“Petelo, alofa mai i a te a’u lou tina, alofa mai, ia e fa’amagalo i si ou uso o Samuelu.” Na va’aia e le lo’omatua le maligi ifo o loimata o Petelo i lea taimi ma tilotilo ifo i a te ia. Ua ato ‘ese nei e Petelo le sapelu i lea taimi ae ua lilo foliga o si ona tina, ona ua pei o uaga mai le lagi le maligi ifo o ona loimata.

Na liliu nei Petelo ma savali i tua i le umu, lea na fai ai lana fa’alifu talo ma le moa Samoa, aua le meatausami a ona matua.

Ua ato nei e Petelo le sapelu i lalo ma vala’au atu i lona uso o Samuelu, “Samuelu, ua e laki e, ae e te va’ai i le mea ou te faia i a te oe, pe afai e te le usita’i ma fa’alogo i se fa’atonuga a o ta matua, e te va’ai lava i ai. A ou pologa ifo i le faiga o mea o le aiga, ua na o le sala, sala i luma o le nu’u talu talu au faiga leaga, ae folo lava Samuelu, ona o lou va’ai i mata o o ta matua, a’o oe, ua tatau lava ona e ‘afu, ua e fa’alogo mai.”

Na liliu nei Petelo ma savali loa i tua i le umu, lea sa gaioi ai i le faiga o le mea tausami a ona matua. Ua tu le lo’omatua o Eseta ma tilotilo atu i lana tama matua, lea ua savali ‘ese nei ma ona loimata. Ua ‘ese lava fa’alogona o le lo’omatua i lea taimi. Ua lagona le alofa, ua lagona le loto fiafia, ina ua ia iloa, e ‘ese le lelei o Petelo, o se tama e usita’i i a i la’ua i mea uma. O le a lava le fa’atonuga e fai atu i a Petelo, e le talia se upu e tasi, e fai ma le fiafia mea uma.

E faia pea…