Vaega: 83

Tatou sunu’i lapalapa o malo ma fa’afo’i le vi’iga i le Atua Soifua i lenei aso, ina ua o tatou va’aia ataata o taulelei i le soifua manuia ma le soifua maua i lenei aso fou. E ao ai ona o tatou fa’apea ifo, “Le Atua mamana e, ia e alofa ma foa’i mai le onosa’i ma le fa’apalepale ia i matou i lenei aso, ina ia mafai ai ona fa’atino a matou fuafuaga lelei mo o matou aiga fa’apea a matou fanau, a’o le vi’iga e fa’afo’i atu i Lau Afio e fa’avavau, fa’avavau lava, Amene.”

Na muta mai la tatou tala, ina ua talatalanoa fiafia nei Paulo, Eseta ma le la fanau o Petelo ma Samuelu ina ua taunu’u manuia le malaga, ae maise ai o le atigipusa lea na avane i le tuafafine o Paulo, le tama’ita’i o Salamasina. O lea fo’i la ua lau le tusi na fai e Sala mo Petelo ma Samuelu. O a’oa’oga lava ina ia lelei o la olaga, ia o la maua  le fealofani ma le nofo feavata’i o le tasi i le isi. O mana’oga lava ia o matua e alolofa fa’amoni i a latou fanau, ia a’oa’o ma saga a’oa’o pea i mea lelei, aua e alu aso, sau aso, e le tumau pea le mafutaga.

A’o fai pea tala a le lo’omatua o Eseta, o le taimi lea ua tatala e Petelo lona mitiafu ma tilotilo i ai, ae na fa’ate’ia le tama ina ua tatala atu, ae pa’u mai i lalo le tusi. “Oi, o le tusi, pei uma lava o se tusi mai i a Sala, Samuelu se tago ane oe e faitau le tusi, ua e iloa fo’i a’u e leaga o’u mata pe a o’o i le po.” Na lulu le ulu o Samuelu ma ‘ata ane i lona uso, ua iloa lelei lava e Petelo, e tau le lelei le faitau tusi a Petelo.

Na a’apa ane nei Samuelu ma tatala loa le tusi, o upu nei o le tusi mai i a Salamasina. “Mo Petelo ma Samuelu, e i ai lou talitonuga a oulua faitau i lenei tusi, ona oulua iloa ai lea sou manatu ua fia fai atu. Petelo ma Samuelu, o lea o le a ou tautala atu i a te oulua, ia oulua maua le fealofani ia alofa le tasi i le isi, Petelo, o oe e matua, ia e maua le agaga o le fa’apalepale ma le onosa’i, o a fo’i uiga o Samuelu, ia e lava papale, o oe e matua. E moni lava ua matua Samuelu, ae e i ai lava taimi e fa’atamaititi ai lona mafaufau. O oe Samuelu, ia e fa’alogo mai i la’u tala o le a fai atu, e leai se taimi na maua e mafai ai ona ou talanoa atu i a te oe a’o tatou fa’atasi, a’o lea o le a ou tautala atu Samuelu.

Samuelu, o oe e la’ititi, o le tele fo’i o taimi pe a fa’atasitasi lo tatou aiga, ou te va’ai ai pea i ou uiga, e le matagofie i la’u va’ai, ae e le mafai ona ou fai atu se tala, ona o lo’u alofa i mata o lo’u tuagane. Ae e i ai pea lo’u fa’amoemoe o lo’o tautala pea ma fa’atonu oulua e Paulo ma Eseta i mea lelei. Samuelu, ia e iloa lelei le lua va ma Petelo, o oe e la’ititi, e fesili muamua le la’ititi i le ua matua.

O le isi lenei itu ou te fia talanoa atu ai, Samuelu, afai e te fia nofo i a ma’ua ma Larry e fa’aauau ai au a’oga, ua lelei fo’i lea, ae o le tonu e fai e ou matua. Ae ia oulua maua le felofani, e tasi lava le lua va’aiga, o Paulo ma Eseta, pau lea. O a lava isi mea, e fa’ata’atia ‘ese uma lava, o le lua va’aiga ma le fa’atumutumuga o mea uma, o o oulua matua. O la’u tusi atu lea, afai e i ai se mea e tupu, ia vave logo mai a’u, ae ou te alofa tele atu mo oulua si a’u fanau, alofa tele atu mo Paulo ma Eseta. Tofa o Sala.

E faia pea…