Vaega: 73

“Lo’u agaga e, ia e fa’amanu atu i le Ali’i, o mea uma fo’i oi totonu i a te a’u, ia fa’amanu atu i Lona Suafa Paia, o la tatou tatalo lea mo lenei aso, ina ia o tatou manatua ai pea le alofa o le Atua i uma o lotatou ola,mai lava i le amataga se ia o’o mai i le aso. Ae ia manuia le alo faiva o le atunu’u i feau ma galuega o le a feagai ai.

Tatou tulitulituliloaina pea le malaga a Paulo, Eseta, Sila ma Samuelu lea o lea toe fo’i, ae ua tu’ua na o Salamasina ma lona to’alua o Larry. E ‘ese fo’i le faigata o mea fa’apenei, a o’o loa ina o le a toe fo’i, ae tu’ua se tasi e pele i o tatou loto, e lagona le tiga alofa, ma ua fa’apea lava le tulaga ua o’o i ai le toeaina o Paulo ma Sila, ona o si o la tuafafine o Salamasina, e moni lava le upu, “E pipi’i tia, ae mamao ala.”

Fai mai ua tau to’a mai le toeaina o Paulo i lea taimi, ae ua toe mafaufau nei, e moni si ona uso a Faifeau, e fa’amavae fo’i ma ia pe a taunu’u i le maketi, ona alu ai lea o lana malaga i Tula, ae toe fo’i latou i tua. Fai mai ua atili ai ona maligi ifo loimata o Paulo i lea taimi, ua fiu lava le Faifeau ma Eseta e tau fa’ato’ato’a ae ua le mafai lava. “Paulo, o le a ea le mea ua e fa’apea ai, e ia i se mea o mamafa i lou loto, ua uma ona ou fai atu e te loto tele, o lea fo’i ua tautala atu le Faifeau i a te oe, e fai aso le Ali’i, e faia e le Atua le taimi ma le aso tatou te toe feiloa’i ai, ‘aua e te loto vaivai fa’apena Paulo.”

Ua taunu’u nei le savaliga i le Maketi i Fagatogo, ae o lo’o amo ane e le tama o Samuelu, ia ‘ato e lua, o le fa’aoso a le Faifeau ma le fa’aoso a ona matua na fai e le teine o Salamasina ma lona to’alua. Fai mai o uiga o le tama’ita’i, a maua ane ni mea mai le vaega a le Navy lea e ta’ita’i ai lona to’alua o Larry, e teu lelei ma fa’apolopolo ona o lona manatu alofa i nai ona tuagane, o Paulo, Sila ma Pati lea e fai ava i tua i ie isi nu’u, e sopo fo’i auala i na vaitaimi.

Ua iloa lelei lava e Sala, o lona tuagane Faifeau o Sila e mo’i lava, ae o lo’o maua mea i le alofa ma le agalelei o le aulotu, o lona tuagane fo’i o Pati lea o lo’o fai ava i Masefau, o lo’o faigaluega lelei, ma e tu lelei fo’i le aiga o lona to’alua. A’o si ona tuagane o Paulo, lea e nofo nei i le aiga i tua, e moni lava ua mautu, ae e alofa lava le teine i lona tuagane lea. Ua iloa uma fo’i la e fafine nei, o ava ia a ona tugane le alofa fa’apito o Salamasina i lona tuagane matua o Paulo. O lea la ua tausa’e nei e Samuelu ia ‘ato nei e lua, o le fa’aoso a le Faifeau ma le fa’aoso a latou i tua.

Ua taunu’u le savaliga i le Maketi i Fagatogo, ae o lo’o tagitagi pea le toeaina o Paulo, ua le mautonu ai le loto o le lo’omatua o Eseta, ae ua fa’apea ifo i lona mafaufau, ua matua fo’i si toeaina, atonu o lona valevale alofa i si ona tuafafine e to’atasi, o lea ua mafua ai. Na saofafa’i ifo nei i lalo ma ua va’ava’ai solo nei i pasi ia e o i tua, e taunu’u ane, e leai ma se pasi o tu, o lea na tuli ai loa e le Faifeau ia Samuelu e alu i le Faleoloa e tasi na tu i Fagatogo i na vaitaimi, e fai mai lana fa’atau.

Ua alu Samuelu, ae ua nofonofo nei na o Paulo, o lona uso o Sila ma le lo’omatua o Eseta, e fai lava ma a’apa atu le lima o Paulo i lona uso o Sila. “Sila, a tonu o le a umi fo’i tatou te le toe feiloa’i, ona o tulaga o lo’o i ai auala i lenei vaitaimi, ae o le mataupu na o tatou talanoa ai ma le ta tuafafine, e le mafai ona toe tu’ua, ona ua vave le taimi, afai e maua sou avanoa e te toe sau ai i a Sala, ia fai se lua tonu lelei, ona logo atu lea o a’u i tua, e ala i se tusi e alu atu ma le pasi.

O le isi itu sa ou fia talanoa atu ai i a te oe le uso, ta’atia ia ou mamalu fa’aletalalelei, o le tulaga lea o lo’o i ai lo’u atali’i o Samuelu, fa’afetai i a te oe le uso, i lou manatu mai i a te a’u, ae maise fo’i Eseta lea e nofonofo atu. Ua i ai lo’u manatu e sili ia pe a tu’u mai Samuelu e nofo i a Salamasina ma lona to’alua e fa’ama’ea ai ana a’oga ia ma nofo e to’alua ma Sala i aso uma, ona e nofo to’atasi na o le ta tuafafine i le aso atoa.” E fai ane lava le tala a le toeaina ma a’apa ifo lava i lona solosolo ma soloi ai ona mata.

E faia pea…