Vaega: 70

Tatou fa’afo’i pea le vi’iga ma le fa’amanu i lo tatou Tapa’au i le lagi, ona o Lana tausiga alofa mo i tatou, o lea ua mafai ai ona o tatou alafa’i mai i fanuga lelei o lenei aso. O se aso fo’i e fa’aopoopo i lou soifua fa’apea ma si o’u nei ola vaivai. ia o tatou fa’apea ifo i lenei aso, “Le Ali’i e, e moni ma fa’amaoni au folafola mo i matou, ia e alofa ma foa’i mai le ola ma le malosi mo i matou i lenei aso, amene.”

Fa’aauau pea lau faitau, ma se i o tatou sa’ilia pea le ‘au o le paipa, po’o fea o le a o’o i ai la tatou tala. Ua ma’ea le fetufa’aiga a Petelo ma Misi, ua lagona e Petelo le filemu o lona loto i lea taimi. Na i ai le manatu o Petelo, ai o le a tu i luga Misi e alu i lo latou fale, ona o lea ua fai ane na moe i le fale o Solo, o lona uiga, e le toe o’o Misi i lona aiga. Ae o le mea ua tupu, ua iloa e Misi e na o Petelo lea o lo’o fa’amuli, aua e pe tele le pea sai a Misi i le lo’omatua o Eseta.

Na iloa fo’i e Petelo, o le aso, fa’atoa feiloa’i ai ma nai ona matua ma lona uso o Samuelu i le afiafi, o lea na fai ai loa le la tafaoga ma Misi i le aso atoa. Fai mai na matua’i fuli Petelo e fa’atoleni Misi i lea aso, o le faiga o le lafo e toto ai tiapula, o le veleina o le vao i le isi itu o le ma’umaga, ma le salaina o lausului o fa’i lea na tuli Samuelu e sala, ae ‘emo ane, ua o’o i le uso o lona tama lea e Faifeau i le afio’aga o Tula.

Fai mai na matua’i lagona e Misi le mea e ta’u o le galue, ua iloa ai fo’i e Misi le upu fo’i lea, a le galue ma le afu le muaulu e le ‘ai. O lea la fa’atoa o’o i ai Misi i le tulaga lea, aua ua iloa lelei lava e Petelo, e solo atoa le nu’u o ta’a ai Misi i le aso atoa, ae le alu e fai se ma’umaga e a’ai ai ona matua ma lona aiga. Ua tu nei Petelo ma tilotilo ane i a Misi ma ‘ata, “Se punou tele i lalo, ia o le a fa’ata’eta’e aluga fa’apena, punou tele i lalo e se’i mai i luga le pogati o le vao, ina ia ‘aua nei toe vave ola a’e.”

Fai mai le tomumu le leoa a Misi i lea taimi, “Kelo, fai fai malie mai, o le a tau gau ifo tua o tagata, o le manatu o oe o se solofanua le mea lea.” O mafaufauga ia o Misi na ‘ata ai ma tu a’e i luga ma alu loa ma le fa’aumu lapo’a. Ua ‘ata Petelo ma toe punou i lalo, e toe ea a’e, ua matua’i mafola uma le itu o lo’o i ai Misi, o le gaioi a le tama i lea taimi e le i toe fa’atali lava. A’o le mea ua popole nei i ai Petelo, po’o le mea o se’i uma i luga le vao, po’o le mea ua avane isi vao ua tanu ai vao ia e le i velea e Misi.

Na tilotilo atu nei Petelo, ua amata ona alu ifo le la i lona nofoaga tumau, ma o lea na ia savali ai loa i le isi itu o le ma’umaga, lea ua ia iloa ua matua le talo ma ua ono ‘aiga. O le mafaufau o Petelo o lo’o i ai, e fai se ‘ato talo ma ‘oto lua’u ma se ‘ato fa’i la te o ma Misi e momoli i lona aiga pe a uma le la galuega. Ma ua fa’apea lava ona fai, e fo’i ane Petelo ma le ‘ato talo ma le ‘ato fa’i ma lu’au, ua alu le ta’agulu a Misi i lalo o le la’au lea e i totonu o le fa’atoaga.

“Misi, sole Misi, se matua’i e taea tele, e sili pe a e nofo i se teine palagi po’o se teine Kolea, o lea ua ou iloa nei, e le aoga oe i le faiga o le aiga, aua a e nofo i se teine Samoa, o lona uiga e lagilagi muamua lou no’o e le aiga, pe afai o au aga ia, nofo ia i luga ta o ua amata ona pogisa.”

Ua nofo tata a’e nei i luga Misi ma fetilotilo fa’i solo, “Oi Kelo, ua a, ua uma le ta galuega?” Ua le tautala Petelo, ae ua ‘ata ma tilotilo ane i a Misi. Ua matua’i lagona e Misi le le lava, fa’atoa o’o lea i se galue fa’apea, e le masani ai aua e tutusa lelei lava le olaga o Misi ma le olaga o Samuelu.

E faia pea….