Vaega: 7

Tatou fa’afetaia pea le Atua Silisili ‘Ese, ona o Ana fa’amanuiaga o lo’o tatou oaoa ai pea i faleseu ma o tatou sa’a ai i ma’a o malie i aso uma o lo tatou ola. E ao ai ona o tatou fa’apea ifo, Le Atua e, e silisili lava Oe i mea uma matou te manatu i ai, alofa foa’i mai Lou filemu matou te mapu i ai i lenei aso, a’o fa’agasolo a matou fuafuaga, i’u i le manuia mea uma, ae fa’afo’i atu pea le vi’iga ma le fa’afetai i Lau Afio e fa’avavau, fa’avavau lava, Amene.”

Ae ia manuia le alo faiva o le atunu’u i feau ma galuega o le a feagai ai i lenei aso, ae alo maia, o le a toe fa’aauau atu la tatou tala. Na muta mai ina ua fai nei le tonu a le toeaina o Paulo ma le lo’omatua o Eseta, e fa’atali se i ma’ea le faigalotu i le afiafi ona fai lea o sa latou mafutaga ma le la fanau.

Ua toe mafaufau ifo le lo’omatua, e moni lava a si toeaina, o ia na o lalo lava o le isu, ae e le i feoa’i lava ni ona lima i se tagata. “Ia soia ia, malie fo’i oe le toeaina, o fasaga lava a si lo’omatua ua e masani ai, a leai loa se mea lelei e ina’i ai le fa’alifu, ia ua alu fa’asolo atoa le uaea moso’oi latou ua le mafai ona toe taofiofi.”

Na fa’apea si lo’omatua ua uma ai le mataupu, ae ua te’i i le fa’alogo atu ua toe tali mai le toeaina, “Ioe Eseta la’u manamea e to’atasi, se po’o le a lava le tele o ‘ia o le sami, e tasi lava le ‘ia sa fa’ananau i ai lo’u loto.” E le i uma atu tala a le toeaina ae sau le leo o le lo’omatua, “O le a le ‘ia?” Na tali le toeaina, “Se o le ‘ava’ava, kailo la’ia.”

E le i mau lelei le nofo a le lo’omatua, ae alu atu loa ma le ‘otegia i a Samuelu, “Samuelu, ua ma le iloa ma lou tama se isi mea o le a fai i a te oe, se i e usuta’i ai ma sui ai ou uiga, ua le iloa lava se isi mea o le a fai i a te oe Samuelu. Va’ai oe, i si ou uso, e feagai lava Petelo ma le tausiga o le aiga, ae maise ma’ua i aso uma, a’o fea oe, e leai, e te ta’a solo mai i le isi itu o le nu’u. Ae a e alu fo’i, e te fa’amisamisa solo ma fa’alala lou lima, i lou fia ulavale, ae o a mea o e faia e lelei ai le aiga, e leai se mea lava e tasi.

Ou te ofo lava Samuelu, o lou le alofa fo’i lea i a ma’ua ou matua, o lena e le i fai atu se tala a lou tama i a te oe. A’o a’u, ua lagona lava lo’u fa’anoanoa tele i a te oe Samuelu, e te le faia mai se mea e fa’afiafia ai o ma loto ma lou tama, ae na o mea tiga e te au maia i a ma’ua, ae maise o si ou uso lale e fa’atu mai i le umukuka e fai mea ma te a’ai ai.”

Ua tau manava le lo’omatua i totonu, ae oso a’e loa ma le toeaina, “Eseta, fa’afetai atu, o lea fo’i ua fa’alogo atu Samuelu i sau upu, ae e sili pe a fa’atali se i o’o na nei ona tatou fai tala fa’atasi lea ma Petelo, se i ta fa’alogologo fo’i i se manatu o le ta tama matua e tusa ai ma lenei mataupu, ae ali’i Samuelu, ‘aua ne i e o’o i tua i le umu, o lae e tiga le loto o Petelo, aua ma te va’ai atu ua tupu mai se fa’alavelave, alu ane i luma fale e sala lau sului o fa’i.”

Na tu sasa’e a’e nei i luga Samuelu ma savali ‘ese, e aunoa ma se tala na fai ane i ona matua. O le savaliga mai lava le na a Samuelu, na le toe iloa mai ai e le toeaina ma le lo’omatua po’o fea ua alu i ai. Ae ina ua alu ‘ese mai Samuelu, na liliu ane nei le toeaina i le lo’omatua.

“Eseta, se ou te fiu lava e tau fa’asa’osa’o atu mea se, ae solomua lava i a te oe se le le lelei, o le a e fai mai la i le tama, ae le se’i fa’atali se i fai mai fo’i se upu a Petelo e tusa ai ma le mea ua tupu. Tau fa’ato’ato’a mai mea, o lea ua ta va’ai atu lava i le ata o mea uma, e i’u lava ina mao Petelo i le tama lenei, ae se i o’o i le afiafi pe a ma’ea le faigalotu, ona fai lea o sa tatou tala ma tamaiti.”

Na fa’ate’ia le toeaina ina ua va’ai atu ua maligi ifo loimata o le lo’omatua, “Paulo, ua ou le iloa lava se isi upu e fai atu i lenei tama, ma o le mea fo’i na ou va’ai i ai, ua ou lagona ai le popole, ona e ‘ite’ite lava lo’u loto, a ta le faia se fa’aiuga i le tama o Samuelu, e i’u lava ina tupu ai se fa’alavelave. O lea ua va’ai o’u mata i le ita o Petelo, ua u’u le sapelu, ua ‘ese ai lava ota fa’alogona Paulo. Ua lagona ai lo’u popole tele ma lo’u alofa i le ta fanau i nei mea ua tutupu mai, pe o le a tua ma ni a nei mea Paulo.”

E faia pea…