Vaega: 67

Fa’afeiloa’i atu ma fa’atalofa atu i le mamalu o le atunu’u, i lenei taeao fou, malo le soifua, malo fo’i le onosa’i i faiva ma tiute o lo’o feagai ai. E i ai pea le fa’amoemoe, o lo’o maualuga pea le alofa ma le agalelei o le Atua Soifua, e ala i ana fa’amanuiaga o lo’o tatou o’ao’a ai pea i faleseu ma o tatou sa’a ai i ma’a o malie i aso uma o lo tatou ola. Ae alo maia, o le a toe fa’aauau atu la tatou tala mo lenei aso.

Na muta mai la tatou tala ina ua fai le fiafia a le aiga i lea afiafi, o a lava fa’afitauli ma faigata o le olaga nei, ae a pesepese ma fa’alogologo i musi matagofie, e galo uma lava ia mafatiaga. O le tulaga lea ua o’o nei i ai le aiga i lea afiafi, ae maise ai o le matagofie o si’ufofoga o Paulo, Sila ma le la tuafafine o Salamasina, ae salani i le leo matagofie o le tama o Samuelu.

Fai mai a alu alu le siva a Eseta ma Larry, ua tau pa’u le ie o le Palagi, ae tamo’e ane le lo’omatua ua sulu i luga, “Se Larry, a fiu a Paulo ma Sila e tau nana, ae e i a oe lava e fa’aaliali, fai le afei, afei fa’alelei mea na…….” E le o iloa lava e si tamaloa palagi le tala lea e fai ane e le lo’omatua…ua amata ona ta’i lua Larry lea e va’ai atu i ai Eseta, ona o le manaia o le uaina, ae salani i le malie o si’ufofoga o le au faipese, sau ai i tua ma le tatagi malie o le kitala ma le ukulele, ia o ai o le a le fiafia, aua a malie le pese ua selau pasene le siva.

Na fa’ate’ia le aufaipese ina ua fa’apea ane le lo’omatua o Eseta, “Se Sala, o fea le tuiga, au mai le tuiga se fa’atafo, e, le lalolagi e, ma mea o tumu ai, lalo, lalo, tago i ai Larry, ne i fa’apea lava a le vaega lea ta te le mafaia se mea, tago i ai Larry, ‘aua le faia umaga ta mea…. Ga, ga, sa’e le vae… o lea e fai i a Larry e sa’e le vae, ae o ia lea ua alu i luga le vae. Ua ‘ata le Faifeau ma lulu lona ulu, ua tilotilo ane i a Samuelu lea ua na o le punou ma pese.

Fai mai o lea ua fa’ata’ita’i nei e le Palagi le sa’e o le vae o le lo’omatua, ae ua pau ifo ai i lalo le ie, ua tamoe ane le lo’omatua o Eseta ua tau sulu i luga. Ua tau le pese Salamasina i lea taimi, ua pei e ene e se tagata. Ua lagona le fiafia, ua lagona fo’i le loto fa’afetai i le Atua, ona e le ‘au maua ia mafutaga i aso uma, ona o le mamao o le ala ma nofoaga o lo’o i ai le tagata latou. Ae ua avea lea afiafi ma afiafi o tamali’i ona e ui lava e le i atoatoa le aiga, ae sau se taimi e fa’atasitasi ai, ona atili ai lea ona matagofie le fa’ili ma pesepesega.

Ua na o le fa’aumuumu o le lo’omatua o Eseta ma fai fai tala, “Larry, tago i ai, ne i fa’apea lava a le auvaega lea ta te le mafai se mea, lalo, lalo, va’ai lou ie o le a pau, lalo, lalo. Va’ai o mea na o Salamasina lava e tatau ona iloaina, ia ae e lelei fo’i, agusa ua ta fiu fo’i e tilotilo i a Paulo latou.”

Ua alu le talie, ae maise ai o le Faifeau lenei e filofilo ai i ma a lona aiga. Ua na o le ‘ata o Sila ma lulu lona ulu, ae ua liliu atu nei Sameulu e teu le mea atoa i lea afiafi. O se leo ua sili ona matagofie i le fa’alogologo, ua fa’ate’ia fo’i Sila ma Paulo, aua la te le i iloaina le leo lelei o Samuelu. Ua na o le tilotilo ane i ai o lona tama, ma fa’apea ona mafaufauga, “Talofa e, i si o’u atali’i, e ui lava ina fa’alogogata, ae o lea ou te vaai atu e so’o uma lava i a te a’u.”

E faia pea.