Vaega: 62

Tatou momoli la’au i foga’a ma sula lapalapa o malo i le Atua Soifua, ona o Lana tausiga alofa mo i tatou i aso uma o lo tatou ola. O lea fo’i ua o tatou toe aulia mai ai i le manuia lenei aso, e fa’aopoopo i lou soifua fa’apea ma si o’u nei ola vaivai. Tatou tatalo fa’atasi pea i le Atua, ina ia alofa ma foa’i mai le filemu, o le onosa’i ma le fa’apalepale, o le loto fa’amagalo, ina ia mafai ai ona o tatou talia mea tiga ma faigata e o’o mai. Ae alo maia o le a toe fa’auaua atu la tatou tala mo lenei aso, ae ia manuia faia ma tiute o le a feagai ai.

Na muta mai la tatou tala, a’o faia pea le talatalanoaga a le aiga e tusa ai ma le mataupu lea ua o’o i le Fa’amasinoga. O le taimi atoa na fai ai le tautalaga a le lo’omatua o Eseta, o le taimi lea, ua manaia le ‘ini a le tama o Samuelu, lea o lo’o fa’asagasaga i le sami i lea afiafi, ae ua motusia fa’afuase’i ina ua fa’alogo mai o alu atu le leo o lona tina.

O le pese na ‘ini e le tama ma pesepese ai, “O la’u ‘aisa, ua liusuavai, o la’u rosa ua le fua mai, ai ua tau moto e se isi, o la’u rosa ou te suiti ai…….” Tu a’e loa i luga Samuelu ma savali mai i le fale, e taunu’u ae fa’apea loa ma upu a lona tina i lona tama, “Paulo, se loto tele, e te pala’ai loa, uma lona pisupo, o le mea lea e fai i ai le loto o le tagata, loto tele, ‘aua e te loto vaivai, ae a e alu lava e te le loto vaivai, o le taimi lena i le ma’a’a o lou loto e pei o se pa sima ua uma ona uela, a’o le ou te va’ai atu nei, se talofa se, loto tele ma olioli i le Atua lou Fa’aola.”

Ua tu nei i luga le Fa’afeagaiga ma savali aga’i i le faleta’ele, a’o Salamasina lenei, ua le mafai ona taofi le ‘ata ma tilotilo atu i si ona tuagane matua. “Seka, tu’u loa ua lava, o le a ou lailai ifo e, tu’u la’ia, o le mea lea na ou musu ai e te sau, o mea ia, ‘aua e te faia fa’amatalaga e fa’apea ai a Sala ma Sila, o a’u e leaga, tu’u la’ia, o lea ou te tau mafaufau i se auala e tausi ai le filemu, a’o auala ia e te talanoa mai ai, na o auala e tutupu ai fevesia’iga o aiga. O a’u mea fo’i lava na le iloa e Sala ma Sila, a’o lea ua iloa talutalu ai oe, tu’u la’ia, toetiti ona ou le lava lea onosa’i, tu’u loa.”

Na fa’alogologo ane nei Sala, ua ‘ese le leo o lona tuagane i lea taimi, o lea na ia oso ane ai loa e tau pupuni le va lea, ona e i’u lava ina tu a’e i luga Paulo, ‘afu loa ma Eseta. “Paulo, ia o le a la sou manatu i le mataupu lenei, aua o lea lava ou te taofiofi atu, e tutusa lelei lava o ma manatu ma Eseta, ae o i’ina lava e sau ai le fa’aiuga o mea uma, pe o le a la se mea o e manatu i ai, ona fa’asoa mai lea, tatou velo ‘aso fa’atasi i ai, ona maua ai lea o le tonu lelei.

O le a fou sau fa’afofoga mai i a Eseta, ‘aua le tetena ai lou finagalo, e tiga fo’i si lo’omatua latou, leaga ua afu liligi ma afu toto Eseta i le faiga o mea o le aiga. O le mea lea, se i toe sau le Faifeau, ona tatou talatalanoa malie lea ina ia maua se tonu lelei.”

O le taimi lea, o lo’o i ai pea le Fa’afeagaiga i totonu o le faleta’ele, o lea e tu’i ai le ‘ata ma fa’asolosolo ona mafaufauga, ua feliuliua’i le tofa sa’ili i le Fa’afeagaiga, ona o upu o lo’o tautala mai ai le lo’omatua o Eseta, e moni ma fa’amaoni, o a fo’i ona uiga, ae o se tina e naunau ia mautu le aiga i ona itu uma.

Ua  toe mafaufau le Fa’afeagaiga i nai ona uso e to’atolu e le o auai i le latou talatalanoaga lenei, ona fa’apea ai lea o ona manatu e sili pe a moe le toe, ae logo vave tama o lo’o i Amerika ma si ona uso o lo’o faiava i Vatia, mo se isi a latou talanoaga i se taimi lata mai.

E faia pea…