Vaega: 60

Tatou fa’afetaia pea le alofa ma le agalelei o le Atua Soifua, ona o ana fa’amanuiaga fa’apea ma Lana tausiga alofa mo I tatou I aso uma o lo tatou ola. Ia vi’ia pea lona Suafa e fa’avavau, fa’avavau lava, amene. Ae alo maia, o le a toe fa’aauau atu la tatou tala mo lenei aso, ae ia manuia feau ma galuega o lo’o feagai ai ma le atunu’u.

E le i uma lelei upu a Salamasina, ae fa’alogo mai le Faifeau ma Paulo, ua alu a’e i luga le leo o le lo’omatua o Eseta, “ia ou te fa’afetai atu, a’o fai le tala a Eseta e le i tilotilo lava i a Paulo, aua ua iloa lelei e le lo’omatua le mea e o’o i ai pe afai e tilotilo ia Paulo ma fai lana tala. “O le mataupu lenei, e leai se faigata, pe a ou mafaufau atu i ai, ona o mata a nei, o lima fo’i nei, ma taliga fo’i nei na fa’alogo, a’o soifua mai o outou tua’a.

O upu moni lava ma upu tu’u sa’o, e leai ni ‘ele’ele o le aiga o SaLeiloa, o i totonu o le nu’u atoa po’o luga fo’i o le mauga, e leai, leai lava. O lea lava ou te nofo ma a’u mea nei, oi a o o e tata’a i Amerika ma Hawaii, ona o mai lea fai mai o o latou ‘ele’ele, o le mea lava lea ua taea ai mea a aiga i aso nei. Ona o tagata e o o e tata’a i fafo ona o mai lea fa’alala lima, ma fa’atupu vevesi i totonu o aiga.”

Na motusia fa’asuase’i le tala a le si lo’omatua o Eseta, ina ua oso ane nei le toeaina o Paulo, “Seka, fai fai malie lou leo, tatou te le o misa, o lea tatou te talatalanoa, leo la’ititi mai, o lea e alaala le susuga i le Fa’afeagaiga.”

E le i uma atu tala a Paulo, e toe puga mai le lo’omatua o Eseta, “Se Paulo, se o mea ia e fai i ai le loto o le tagata, agusa, ua le masina le mau fa’asinosino lima, ua o’o lava i le tuaoi o lo’o fai ai le ma’umaga o Kelo, e o ane lava taofi. Oi ta fefe Paulo, ana o lo’u aiga lea i Nu’uuli, e ua ta fia ‘aia lava se tagata i le taimi lenei, ua uma lava ona ou folafola Paulo, e leai lava se isi na lavea ai lima nei, ua e iloa, e leai lava se isi na lavea ai lima nei.”

Na ona lafo lava o le tala a le lo’omatua tilotilo ane loa le Faifeau i lona tuafafine o Salamasina, ma tali e, ma tilotilo i lalo. Ae ua alu lava faiga a le lo’omatua o Eseta e le i toe fa’atali. O Paulo i lea taimi, ua na o le punou ma lulu lona ulu fa’atasi ai ma ona mafaufauga, “O mea a nei, o mea a nei na ou popole ma ou fefe i ai, lea ua aliali mai.”

O le taimi lea, ua le mafai ona taofiofi le ‘ata a le Fa’afeagaiga ma tilotilo ane i lona tuafafine. A’o Sala i lea taimi, ua ‘ata ma toe manatua le mea fo’i na tupu i le isi fa’alavelave a lo latou aiga i tua, lea fo’i na tau pa’i lima ai Eseta ma le Su’e, le Faletua o le Fa’afeagaiga.

Ae a mafaufau i ai Salamasina e sa’o lelei lava manatu o Eseta e fa’aali, o se tina e le mana’o e fia to’ilalo i se mea, o se tina fo’i  e tautala sa’o i mea e fai o le aiga. O le ala fo’i lea e tau oso ai le toto maualuga ma le suka o si ona tuagane o Paulo, ona o faiga a le lo’omatua. O le fa’alavelave fo’i na fai, lea na tau oso a’e ai Su’e e nofo i le ‘api a le aiga. E le i tele lava i se pito, na fa’asa’o loa lava e Eseta e le i toe fa’atali.

E faia pea…