Vaega: 25

Fa’atalofa atu I le alafa’I mai o le atunu’u I fanuga lelei o lenei aso fou. E I ai pea le fa’amoemoe maualuga, o lo’o aoina pea le masina I le soifua o le atunu’u, e ao ai ona o tatou momoli la’au I foga’a ma sula le alofa ma le agalelei o lo tatou Matai oi le lagi, ona o ana fa’amanuiaga mo I tatou I aso uma o lo tatou ola. Ae alo maia o le a toe fa’aauau atu la tatou tala mo lenei aso,ae ia manuia faiva ma tiute o le a feagai ai I lenei aso.

Ua fa’aauau pea le tautalaga a le Fa’afeagaiga o Sila, le uso o le tama o Samuelu I a Samuelu, ona ua fa’ate’ia ina ua alu atu I lea aso. “Samuelu, afai ua alu ane Petelo i a te oe ma le sapelu, ua tatau, e te le alofa i si ou uso, o lo’o pologa i le faiga o mea uma o le aiga, se i e mafaufau i lea itu. Na o le tagata e fa’asamasamanoa lona loto ma le tagata e le alofa i sona aiga na te faia uiga ia Samuelu. Ua e va’ai i le tulaga ua i ai nei le isi o ma uso, o lae ua loka i le falepuipui, ua ma’imau le ola a le Ali’i na ola ai, o le mea fo’i lea e o’o i ai oe, pe afai e te le talia se fautuaga e tu’u atu i a te oe Samuelu, a le suia ou uiga na, e o’o mai lava le fa’avavau fa’avavau amene, o e fa’apena lava. Ae afai o le a sui ou uiga ma avea oe o se tama lelei, ona e va’ai lea i le alofagia o oe e tagata.

O le taimi lenei i le nu’u, ua leai se tagata e alofa i a te oe, ona o ou uiga leaga ia Samuelu, ou te matua’i le fiafia lava i a te oe, ae afai o le a sui lou olaga ma avea oe o se tama lelei, ma e alofa i ou matua ma si ou uso e to’atasi lae e sautia ma gapatia i le faiga o mea o le aiga, ona alofagia ai lea o oe e tagata.

Ae ala vave i le taeao ona ta o ai lea e momoli oe, ai o fiu Paulo ma Eseta e tau su’e oe, talofa i si o’u uso, e fai o mea o le aiga, a’o le mamafa o le loto o Paulo i au faiga ali’i Samuelu. ia e ala usu i le taeao ta o e toe momoli oe i a Paulo ma Eseta.”

E leai lava se tamaititi na fesili i a Samuelu pe aisea le mea ua alu ane ai, ua mua lava ona fai a latou tala ma fiafia ai, ua fa’amatala e Samuelu ia lana a’oga. Ae ua iloa uma lava e le fanau a Sila, e aveave sili lava Samuelu i matupu uma i totonu o le A’oga. O le ala fo’i lea e va’ai maualuga ai lava le fanau a Sila i a Samuelu, ona ua o latou iloa e moni lava e lelei fo’i a latou a’oga, ae e le tutusa lava ma a’oa’oga o lo’o maua e Samuelu.

O le Kolisi lea ua o’o i ai le a’oga a Samuelu, ma o lona tausaga mulimuli fo’i lea, ona va’ai loa lea o Samuelu i se isi la’asaga o lona olaga i se taimi oi luma. O le mitamitaga lea i le toeaina o Paulo ma le lo’omatua o Eseta, ae e fa’asilisili ai le mimita ma le fiafia o le loto o si ona uso o Petelo. O le itu lea, e le o iloa e le toeaina ma le lo’omatua, ona ua i ai le manatu o Petelo, afai lava ua malie lona loto e nofo e tausi o la matua, ua lava lea, ae tu’u Samuelu e fa’aauau ana a’oga.

O le ala fo’i lea po’o le a lava uiga o Samuelu, ae e alofa lava i ai lona uso o Petelo, ae a o’o loa uiga faigata o Samuelu i le tuluga fo’i lea ua oso pe tali se upu a o la matua, o i’ina loa e a’apa ai Petelo i le sapelu.

E faia pea…