Vaega: 24

Fa’afetai i le alofa ma le agalelei o lo tatou Matai Sili oi le lagi, ina ua mafai ona alafa’i mai i le manuia i lenei taeao fou. E ao ai ona o tatou fa’apea ifo, “Le Ali’i e, fa’amolemole fa’amagalo mai i matou, o a lava se se ma le le tonu o i matou, matou te lagona lava Lou alofa e le fa’atuaoia, ia o matou manatu pea Lau Afio i aso uma o lo matou ola, Amene.”

Ae alo maia, o le a toe fa’aauau atu la tatou tala mo lenei aso, ae ia manuia le alo atu o le atunu’u i faiva ma tiute o le a feagai ai i lenei aso. Na muta mai la tatou tala, ina ua fa’asolosolo mafaufauga o le tama o Petelo i uiga o lona tina o Eseta, a’o le taimi lea, o lo’o nofonofo lava na o ia i luma o le la faleo’o ma lona uso o Samuelu. E le gata i lea, ae ua fa’asolosolo fo’i isi vaega o ona mafaufauga i lana manamea, le tama’ita’i ua fa’ananau i ai lona loto ma lona mafaufau, le tama’ita’i o Losalia.

O mea a fo’i nei, ana ou va’ai atu toe tasi le fasi moa o lo’o totoe, e le toe fa’atali lava po’o ai ma ai, e ‘ai loa a ma le loto fiafia. Ae amuia Petelo, o lo’o ia maua le loto fa’amagalo ma le loto alofa, ua malie lava lona loto, a ua le ‘ai lava, ua lava lea, ae tu’u le fasi moa e tasi ma si ona uso.

Ailoga o toe i ai nisi e fa’apea o latou uiga, o le taimi lenei ta te fa’alogo so’o lava i le upu, se a maua loa le mea, fai loa, ‘aua le toe fa’atali, a’o le tagata e fa’amuamua i a te ia isi tagata, o le tagata lea e le toe fia ‘ai i lona olaga atoa.

Ia ua, talatalanoa fiafia nei Sila le uso Faifeau o Paulo ma le tama fa’alogogata o Samuelu. E fa’alogo ifo le Faifeau, e pei lava e i ai se mea ua tupu, fua i le au sulusulu mai o Samuelu. E le o se fa’alavelave, ae ai po’o i ai fo’i se mea ua tupu i a Samuelu fua i le alu ane fa’apea.

Na alu alu lava le talanoaga a Sila ma Samuelu, i’u loa ina fesili le Faifeau, “Samuelu, e i ai se mea o tupu i tua, ua mafua ai ona e sau?” Ua le tautala Samuelu i lea taimi, ae ua na o le punou. Na ea a’e nei i luga ma fa’apea ane lana tala i le Faifeau, “E leai se fa’alavelave o tupu, a’o a’u, ua ou sola mai, ae e le o iloa e o’u matua, ona ua ou fefe ua fa’alala mai e Petelo le sapelu i a te a’u.”

Ua na o le punou o le ulu o le Faifeau o Sila i lea taimi, ua toe mafaufau le Faifeau, i uiga fa’alogogata o Samuelu, lea e fitu aumatua, lima povi, sefulu pusa’apa ma ie to’oga tetele na alu ai, ona ua sala lona uso o Paulo ma Eseta i luma o le nu’u.

E le gata i lea, a’o uiga fa’amisa ma uiga ula vale o Samuelu, ua fiu ai lona tama ma lona tina. Na ona ea a’e lava i luga o le Faifeau, alu atu loa e le i toe fa’atali, “ia fa’alogo lelei mai lava oe Samuelu, o lea o le a ou fai atu le fa’aiuga o oe, o oe, e te toe fo’i taeao, talofa i si o’u uso o Paulo ma Eseta, ai o fiu e tau su’e oe. O e iloa le faigata o le tulaga e o’o i ai matua, pe afai e sola ‘ese se tama po’o se teine mai totonu o le aiga, o e iloa le mea le na.?”

Na tali Samuelu, “Ioe, Sila, ou te fa’ato’ese atu i lau susuga i le Fa’afeagaiga, ae o a’u, ou te fia tafao i’inei, se i o’o i le Aso Sa, ona ou toe alu lea.” E le i uma atu upu a Samuelu, ae toe fa’apea ane le Faifeau, “Samuelu, fa’alogo lelei mai lava ou taliga i la’u tala lea o le a fai atu, o a’u, ou te le fiafia i ou uiga, ou te le fiafia fo’i pe ou te talia oe, ona o uiga fa’asausili ma uiga fia tama leaga lea e maua ai oe. Va’ai oe, o le tama lelei, e usita’i i ona matua, a’o le mea lea e i ai, ua sala fa’afia ou matua, talutalu oe. E leai lava sina ou alofa o lo’o i ai i totonu o lou loto, i lou va’ai atu i ou matua o fa’atasina solo talutalu oe.”

E faia pea…