Vaega: 21

E i ai pea le fa’amoemoe maualuga, o lo’o aoina le masina i le soifua laulelei o le atunu’u, i lou alafa’i mai i fanuga lelei o lenei aso fou, o se aso e fa’aopoopo i lou soifua fa’apea ma si o’u nei ola vaivai. E ao ai ona o tatou fa’apea ifo, “Le Atua e, e fa’afo’i atu lava le fa’afetai ma le vi’iga i Lau Afio e fa’avavau, fa’avavau lava, Amene.”

Ua alu pea le solo a Seve ma Samuelu e aga’I atu I le nu’u o lo’o Faifeau ai le uso o le tama o Samuelu, o Sila. O lo’o fai pea le talatalanoaga a Seve ma Samuelu a’o alu pea le la savaliga.

O le va’ai a Seve i a Samuelu, o se tama e faitino lelei, o se tama fo’i e la lelei ona foliga, ma e so’o uma lava i le uso o lona tama lea e Faifeau nei i lo latou nu’u. E savali lava la Samuelu, ae le iloa e le tama, o lea e fikafika malie atu lava e Seve mea uma. O le faitino fo’i o Samuelu, e maualuga tino lelei, leitioa fo’i a fa’amisamisa i le soga’imiti ave pasi, aua a tago lima i ai Samuelu o lona uiga, ua u i luga vae ae u i lalo le ulu.

O mafaufauga ia o le toeaina o Seve na ‘ata ai nei ma tilotilo ane i a Samuelu, ua toe mafaufau, o lana tala lea o le a fa’amatala nei i le Faifeau pe a taunu’u le la sopo. Ae ua toe mafaufau Seve, e le galo i a te ia le ‘otegiaina o ia e le Faifeau, ona o le pa’ulua o pese o le lotu i le Aso Sa ua mavae.

Ua fa’asolosolo mafaufauga o le toeaina o Seve i upu na ‘otegia ai ia e le Faifeau o Sila, “Se Seve, se sa ou fa’apea lava ua lelei au nota, a’o lea e foliga mai, e o atu matou i le Salamo, ae sau oe i le Fa’ata’oto. O fea fo’i o i ai au tusi nota na e fai mai ai, fai fa’alelei pese o le lotu, ae le o le tilotilo o oe i teneiti o le au faipese ae se se ai pese o le lotu, fai fa’alelei pese o le lotu, e mataga le o mai o ni tagata e asiasi mai ae fa’alogo mai e ‘ese fati o pese.”

O le Fa’afeagaiga i a Sila ma le Faletua o Su’e, e to’atolu le la fanau, e ulumatua le tama e igoa i a Fusi, soso’o ai le isi tama e igoa i a Mika, ae ui’i le teine, o lo’o fa’aigoa i le igoa o le tu’afafine e to’atasi o Paulo ma Sila, o Salamasina.

O Fusi la, e tupulaga lelei lava ma Petelo, a’o Mika, e tupulaga ma Samuelu, pe a i ni nai masina e va ai, ae e tausaga fa’atasi. Ae se i vagana ai le teine o Salamasina, e la’ititi. Ua taunu’u manuia le sopo a le toeaina o Seve ma le tama o Samuelu i le nu’u, ma ua aga’i sa’o lava i le fale o le Faifeau. Na i ai le manatu o Samuelu, o le a alu sa’o le toeaina i lona fale, ae peita’i, ua fai ane le toeaina, la te o muamua se i feiloa’i i le Faifeau ma lona Faletua, ona alu ai lea i lona fale, ma ua fa’apea lava ona fai.

E faia pea…