Vaega: 19

Fa’atalofa atu i lou alafai mai i fanuga lelei o lenei aso fou. E ao ai ona o tatou fa’apea ifo, “Le Atua e, matou te fa’ane’ene’e i Lau Afio i aso uma o lo matou ola, ia e alofa ma toto i o matou loto le alofa, le onosa’i ma le fa’apalepale, le loto fa’amagalo, ina ia mafai ai ona o matou iloa atu Lau Afio i Lou mamalu e fa’avavau, fa’avavau lava, Amene.

Ia manuia le alo atu o le atunu’u i faiva ma tiute o lenei aso, ae alo maia, o le a toe fa’aauau atu la tatou tala e pei ona masani ai. Na muta mai la tatou tala ina ua taunu’u le malaga a Samuelu, ma o lea fo’i ua feiloa’i fiafia ma le uso o lona tama ma lana fanau. A’o le taimi fo’i lea, ua ma’ea le tonu a Paulo ma Eseta fa’apea Petelo o le a ala usu le toeaina o Paulo e alu e toe au mai Samuelu.

“Eseta, lo’u tina, ou te alofa lava i a te oe, o a lava ou vaivaiga ma ou uiga, ae maise o au upu ua lafo, Eseta, e le mafai ona ave’esea lo’u alofa i a te oe, leaga o oe o lo’u tina, na ou iloa ai lenei lalolagi. Afai lava o fea e i’u i ai lenei mea ua tupu mai, na o le Atua e silafia mea uma i lo’u loto tina, e le mafai ona vavae ‘esea oe, o upu moni lava, e malaia fanau pe afai e talia se upu a matua.”

Na tau oso a’e le lo’omatua i lea taimi, ae ua le mafai ona tautala, ua pei o se tagata ua na fasi e se isi i lea taimi. Ua le mautonu le toeaina, ae ua logo malie i lana fa’alogologo le tautalaga a lona atali’i, o le ala fo’i lea na tu’u ai pea e le toeaina o Paulo le avanoa i lona atali’i, se i fai atu se tala i lona tina. O upu fo’i e fa’apea, e sa i fanau ona fa’atonu matua, atonu e moni, ae e i ai fo’i le taimi e tatau ai i fanau ona tautala e fa’asa’o se mea o fa’aletonu. Aua e le iloa e le tagata lona sese, se i i lona e ta’u ane e se isi tagata, ona iloa lea.

Ua le mafai e Petelo ona toe fai ane se upu i lea taimi, aua ua tagi ma su su nei, na tu a’e nei i luga lona tina o Eseta ma savali ane, ua fusi mau lana tama i lea taimi. “Petelo, fa’amolemole fa’amagalo mai a’u lou tina leaga ma le faamaualuga, Petelo, fa’amolemole fa’amagalo mai a’u si a’u tama pele.”

Ua fai nei le lau’ega a le toeaina ma le lo’omatua ma le la tama o Petelo i lea taimi. Ua amata lava ona to’a mai le lo’omatua, ona ua fa’alogologo atu i upu na tautala ane ai lana tama i a te ia e moni ma fa’amaoni. Ua talia e le lo’omatua le fautuaga ma le tu’ualalo a lana tama na fai ane i a te ia.

Se i tatou asia, po’o fea ua o’o i ai le tama o Samuelu, lea ua sola nei i le uso o lona tama o Sila e nofo ai. Na fa’ate’ia Sila ma lona to’alua ma le la fanau i le alu atu a Samuelu. Ua lagona le popole o Sila, pe ua i ai se mea ua tupu lona uso, fua i le alu atu o Samuelu ae ua pogisa. Fai mai, na alu alu lava le pasi, gata, ae fai ane le ave pasi i le pasese e to’a lima na totoe ai, ua le toe mafai ona toe alu le pasi ona ua pogisa.

E muta le alu a le pasi ae toe lua nu’u e va ai ma le nu’u o lo’o faifeau ai Sila ma lona Faletua. E le i toe i ai lava ni upu i le tama o Samuelu, na ona tu a’e lava i luga, fa’apea ane i le ave pasi, “Sole, fai fa’alelei au mea, afai ua le o’o le pasi i le mea matou te o i ai, e le totogia la a matou pasese.” Na tilotilo ane nei le ave pasi i a Samuelu, e fou i le va’ai a le ave pasi lenei tama ma e le iloa fo’i po’o fea e sau ai.

E faia pea…