Vaega: 17

Ua o tatou va’aia le susulu matagofie mai o le la i lenei aso, ua iloa fo’i e sulu  le tino le malosi ma le filemu, ona o tatou fa’apea ifo ai lea, “Le Ali’i e, o Lou alofa, o Lou alofa ua silisili lava lea mo i matou, fa’afetai, fa’afetai tele, e ui lava ina o matou lagona lo matou fa’atauva’a, ae matou te mautinoa lava, e le mavae lou alofa mo i matou i aso uma lo matou ola, malo pule, fa’afetai le foa’i i mea uma, Amene.”

Ia manuia le alo faiva o le atunu’u i feau ma galuega o le a feagai ai i lenei aso, ae alo maia, o le a toe fa’aauau atu la tatou tala fa’asolo, Lupe o le Filifili. Na muta mai la tatou tala ina ua liliu nei e tau sa’ili po’o fea ua o’o i ai Samuelu. A’o lea fo’i se manu e feoa’i solo lima o Samuelu i gutu o si ave pasi, pe ana le fa’ato’ato’a lelei e le toeaina lea e aulotu i le uso o lona tama.

E foliga mai ua ‘ese lava le tulaga ua o’o i ai i lea taimi, ma o le mea tonu lava lea na talatalanoa muamua ai Paulo i si ona atali’i o Petelo, ae e le i taunu’u ane i le fale, ona ua iloa lelei e le toeaina le mea o le a tupu. O lea lava ua sa’o lava, o lea ua tupu, ma o se mea fo’i e fa’anoanoa ai le loto ma le mafaufau o le toeaina e uiga i lona to’alua o Eseta.

O le mea e fa’anoanoa ai le loto ma le mafaufau o le toeaina o Paulo, ona o le mafai e Eseta ona lafo nei upu fa’apea, a’o lea e nofo atu le isi ana tama na alu ifo mai lona manava. O le mea lea e ofo ai le toeaina o Paulo, ma ua iloa ma mautinoa ai fo’i e le toeaina, o Eseta, e ui lava ina fa’apea ua loa tausaga talu ona mafuta, ae sa onosa’i lava i uiga ma amio a lona to’alua e fa’aali, pe a potopoto lona aiga.

Ua toe mafaufau nei le toeaina i si ona tuafafine e to’atasi o Salamasina. O se teine e filemu ma tamali’i ona uiga, ae na fa’atoa va’ai lava lea o Paulo i le tiga na o’o i lona tuafafine, ina ua fai mea a le aiga i le isi aso, ae fetaui ai loa ma lona to’alua o Eseta. O lea ua toe fo’i i tua le mafaufau o le toeaina ona o lona va’ai i uiga ia o le lo’omatua ua aliali mai.

“Eseta, nofo ifo i lalo, fa’ato’ato’a mai mea, ae le o lou ‘oso tu i luga, o ou uiga a ia e le manuia ai se mea o le ta aiga, fa’ato’ato’a mai, o lea lava e pupula mai mata o lau tama na alu ifo mai i lou manava, nofo mai i lalo, ua toetiti lava ona ou le lava lea onosa’i, nofo mai i lalo.”

Ai ua gau le ivi ‘aso’aso o le lo’omatua i le taimi na fa’apau ifo ai i lalo ma sa’a solo ona vae, ua foliga mai o se tagata ua ‘oso sona ma’i maliu i lea taimi. Ua nofo ifo nei i lalo le toeaina o Paulo, ma tau to lana manava i lea taimi. Ae ua alu a’e i luga le tagi a le lo’omatua i lea taimi. Ua uma nei le ‘ava’avau na fai, ae ua alu a’e i luga le tagi tautala.

“Paulo, o au faiga a ia, e te fai tama fa’apito i a Petelo, ai ona o le fa’apea, o Petelo lea e tausia ta’ua, ae e te fa’atuatuana’i lava i a Samuelu, ae e sau se taimi e aoga ai Samuelu i a ta’ua. Ae afai o lea, e sili pe a ma o ma si a’u tama i lo’u aiga ma te nonofo ai, ae tu’u oulua ma lou atali’i o Petelo.”

“Eseta, na ou fai atu i a te oe ua lava, fa’ato’ato’a mai, o lea fo’i ou te lagona le tiga alofa i a Samuelu, fa’ato’ato’a mai, a’o lea lava e fai a oe, se i e va’ai mai, e leai lava nisi ma o ma’ua ma si a ta tama lele e tagitagi mai, tu’u la’ia, ‘aua ne i ou toe fa’alogo atu lava i sau tala, tu’u loa, i lele atu le ‘ali lea tau i na mata, tu’u loa.”

Ua tau to’a mai le lo’omatua i lea taimi, ae o o a lima, ua le iloga se pito o le fala ua felusi solo nei ma fea’a solo vale. Ua na o le pupula atu nei i ai o lana tama o Petelo ma lona loto fa’anoanoa i lona tina. Na i’u lava ina lafo atu e Petelo le tala na matua’i lagona ai le tiga o lona tina.

E faia pea…