Vaega: 15

Fa’atalofa atu i le alafa’i o le atunu’u i fanuga lelei o lenei aso fou, fa’afetaia ai pea le alofa ma le agalelei o lo tatou Matai oi le lagi, ona o Lana tausiga alofa mo i tatou i aso uma o lo tatou ola. E ui lava ina lutia pea i tatou i faigata ma puapuaga o le soifuaga nei, ia ia tumau pea lo tatou fa’atuatua i le Atua, o ia o lo tatou maluapapa, ma lo tatou mapusaga i mea uma. Ae alo maia, o le a toe fa’aauau atu la tatou tala mo lenei aso, ae ia manuia faiva ma tiute o le a feagai ai i lenei aso.

Na muta mai la tatou tala, ina ua matua’i lavea lava le lo’omatua o Eseta i tala na lafo ane i ai e lana tama matua o Petelo. Ua nofonofo le tama, ua le mafai ona tatali le fa’alogo atu i upu o lo’o tautala ai lona tina, o le ala lea na ia tautala ai loa. Na fa’ate’ia le lo’omatua o Eseta ina ua fa’alogo mai i le tala ua lafo atu e lana tama o Petelo.

Ua tau le matala upu a Petelo i lea taimi, ua lagona le vaivai o lona loto, ma na a’apa mai nei si ona tama ua fusi atu, “Petelo, sau ia oe lo’u atali’i, o le mea sili ona taua i a te a’u, o lea ua e tautala mai, fa’afetai i lou alofa i si ou uso o Samuelu, ma ou te iloa lava Petelo lou alofa, o a lava sala e tu’u ma e le nu’u ia ma’ua ma lou tina ona o amioga a Samuelu, e te punou gugu lava e fa’atino mea uma, e leai sou leo e tasi, ona ou iloa ai lea i’ina, lou alofa i a ma’ua ma lou tina, fa’apea fo’i lou uso la’ititi.”

“Ioe tama, o a lava mea a Samuelu e fai mai, ou te onosa’i lava, pau lava o lea, e le mafai ona ou moe se iloga e fai la’u tatalo, ou te tatalo i le Atua, ina ia o’o maia se aso e sui ai uiga o Samuelu ma ave ma tama usita’i ma tama lelei, a’o lea o lo’o oulua soifua mai pea.”

“Ua lelei Petelo fa’afetai i a te oe si o’u atali’i, ae sau loa ta o, o lo’o fa’atali mai lou tina, se i fai se tatou tala, ona fai ai lea o le fa’aiuga i le mea e tatau ona fai taeao.”

Ua toe alu nei le solo i lo latou fale, ma o la iloa mamao atu lava le mu mu mai o le moli matagi ua uma ona fa’aola e le lo’omatua. Na fiu e tau va’ai po’o fea o i ai Eseta, ae totofu atu i le fale, o lo’o punou le lo’omatua mo lana lotu afiafi. Ua taunu’u le solo a Paulo ma lona atali’i o Petelo i lo latou fale, e taunu’u atu, o lo’o punou le lo’omatua o Eseta i le faiga o lana lotu afiafi. Na saofafa’i ifo nei ma punonou fo’i ma i la’ua i lea taimi.

Na fa’ateia Paulo ma Petelo i le fa’apea o upu a le lo’omatua, “Ona o ou puapuaga fa’anoanoa.” Na tali Paulo ma Petelo, “Ia e alofa ma fa’amagalo i matou ma tagata uma o le lalolagi atoa.” O le misitelio lea e lau pea e le aiga i afiafi uma, e fa’asefulu la ona lau le misitelio lea.

Na uma loa fa’asaga ane loa Eseta i le itu o lo’o nonofo atu ai Paulo ma lona atali’i o Petelo. Na fesili nei po’o fea o i ai Samuelu, ae na tali Petelo, se i fai atu se tala a le toeaina, ae ua ma le maua atu Samuelu, ua alu i a Sila. Ua le tautala le lo’omatua, ae ua pupula to’a ane nei i le toeaina. “Paulo, o fea ua alu i ai si a’u tama o Samuelu.”

Ua moe’i’ini mata o le toeaina, ua iloa lelei lava e Paulo, o le taimi lea, ua tatau ona matua’i milimili fa’alelei lava le lo’omatua, ne i te’i lava ua o’o lo latou aiga i se isi tulaga i lea afiafi. Na liliu ane nei ma fa’apea ane, “Eseta, sau ia oe le lo’omatua, malie lou loto, o Samuelu ua alu i a Sila, o lana tala lea na fai i a Tomasi, o lea fa’atoa ma fo’i mai ai, o lona uiga ua o’o Samuelu i a Sila.”

E faia pea…