Ads by Google Ads by Google

Fagogo: Alofa, se ia tiga

Afai ou te tautala i gagana a Agelu, ae leai so’u alofa, ua leai se aoga, afai ou te maua mea uma o lenei lalolagi ma le tamaoaiga e tele, ae leai so’u alofa, ua leai se aoga, afai fo’i ou te fa’apea ifo ia te a’u lava ia, o a’u e alofa ae le fa’atinoina, ua matua’i le aoga lava. Ae na fetalai Iesu Keriso, “Ia e alofa atu i le lua te tuaoi e pei o oe lava ia te oe.”

 

O le alofa o lesu Keriso e le mafai ona fa’amatalaina, aua o Lona alofa lea na o’o ai lava ina tiga ma maliu ai i luga o le satauro, e togiola ai a tatou agasala. O le alofa o Keriso e le fa’atuaoia ma e le mo se to’atasi, pe to’alua, pe to’atolu, ae ua fa’asalafa Lona alofa mo so’o se tagata, o le mativa, o le mauoloa, o  le ma’i po’o le maloloina, so’o se atunu’u, so’o se lanu, so’o se gagana. Na ia toe fetalai, “E leai lava se alofa e sili a’e na i lo lenei alofa, o le tu’u atu lea o lona ola e sui ai ana uo.”

 

 O le alofa o le tagata i le isi uso a tagata, e alu alu lava gata, a’o le alofa o le Atua mo i tatou ta’ito’atasi e fa’aauau pea se ia o’o ina tu’u ifo i tatou i le tu’ugamau. A’o galue le Tama’ita’i Sa o Mother Theresa i totonu o le atunu’u o initia lea sa ia galue ai mo tausaga e tele, na asiasi atu i ai se ali’i tusitala mai le Malo o Amerika. O lana galuega, sa ia ofoina atu lona ola e fesoasoani ai i tagata mama’i, o tagata ua puapuagatia, ua tu’ulafoa’ina, ma i latou ua leai ni aiga e tausia ma alolofa i ai.

 

Sa tiga fo’i le Alo o le Atua Soifua, ma ia talia ona puapuga uma, ona o lona alofa mo i tatou. Sa talia e Iesu Keriso, le ma’asiasi, tauemuga ma upu tau faifai a tagata, sa ia talia ma le onosa’i le sasa ma le pale tuitui i lona a’o, sa ia talia le ipu ua silisili ona o’ona, sa ia talia le satauro na te amoina mo a tatou agasala, sa ia talia le tautau mai ua pei o se tagata ua tu’ulafoaina, sa ia talia fao na tutu’i ai ona vae ma ona lima, aisea, e tasi lava le upu, ALOFA. O le ala fo’i lea e fa’ata’imua ai ma lalago pea i ai o’u fa’amoemoega uma, “Ia ou alofa atu, se ia o’o ina tiga.”

 

Na maofa le loto o le ali’i Tusi Tala lenei, aua ua ia molimau i uiga tausa’afia ma uiga alofa o lenei Tama’ita’i Sa, o ana galuega fo’i ua iloa ai o ia e le lalolagi atoa, sa fa’ata’imua ai le alofa e pei ona ia ta’ua ma fa’ailoa i le ali’i Tusi Tala mai le Malo o Amerika. Ina ua toe fo’i ane le malaga a lenei ali’i i Amerika, sa ia tusia ai loa le tala’aga o lenei Tama’ita’i Sa amio Atua, ma le agaalofa i so’o se tasi.

 

 Sa maua le avanoa o lo’u nei tagata ou te faitau ai i le tele o galuega lelei ma a’oa’oga taua sa fa’atino e lenei Tama’ita’i Sa, e fa’ailoa atu ai le alofa ma le agalelei o Iesu Keriso mo e ua puapuagatia ma mafatia i le atunu’u o Initia.

 

Ua ou au maia lenei manatu ua silisili ona taua i lou soifua ma lo’u nei ola e fa’ata’imua ai la tatou tala fa’asolo ua fa’aigoaina, ‘Alofa, se ia tiga.’ Ma o le a e faitau ai i le olaga o le tama’ita’i e igoa i a Averia. Tatou feiloa’i i le manuia i le alofa o le Atua i le aso a taeao, mo le amataina o la tatou tala fa’asolo, ae ia manuia lava le alo faiva o le atunu’u i feau ma galuega o le a feagai ai i lenei aso.

 

E faia pea