Ads by Google Ads by Google

Fagogo: Alofa, se ia tiga

Vaega: 38

 

Fa’atalofa atu i lou malei fua mai i le manuia i lenei taeao fou, malo le soifua, malo fo’i le onosa’i i faiva ma tiute o lo’o feagai ai i lenei aso. Ae alo maia o le toe fa’aauauina lenei o la tatou tala, Alofa, se ia tiga.

 

Ua fa’aauau pea a’u a’oa’oga ma e leai lava se isi mea na fa’asili i lo’u loto ma lo’u mafaufau na i lo le i’u manuia o a’u a’oa’oga, ona ua i ai le mea e sili ona taua ia te a’u ma o le fa’atumutumuga fo’i lea o a’u tamafaiga uma, o lo’u alu lea i Amerika e su’e si o’u tina moni na ou iloa ai le lalolagi o Elisapeta.

 

O le tausaga muamua o a’u a’oa’oga, sa i’u manuia ma ua pasi uma a’u mataupu, sa ou lagona lo’u loto fa’afetai i le Atua ona o le avanoa ua au mai mo a’u, ae maise ai o le fa’amatalaina o lo’u mafaufau e tusa ai ma a’u mataupu o lo’o tauave. E ui lava ina ou lagona le faigata ae sa o’u taumafai pea ina ia i’u manuia a’u mataupu. E le misi le vala’au mai o si o’u tama e asi mai ma’ua ma si o’u tina tausi, ae ona o lona pisi tele, o le ala lea ua le alu ane ai, ae ua ia ta’utino mai ia te a’u, e alu ane e asi maua pe a avanoa.

 

 Ua amata lava ona ou masani i totonu o le a’oga, ma o mea uma fo’i e le masepu se mea e tasi i totonu o le a’oga e ala lea i le tumama o tama’ita’i fa’apea ma ali’i o lo’o ao’oga ai. O se tasi lea o tulaga sa ou mata’ina pea i aso uma, ona e leai se taimi ta te va’ai atu ai o nofonofo noa se tasi, o taimi uma lava e fai ai le malologa, e punonou uma e su’esu’e tusi a’oga, e leai se taimi e fa’aalu vale.

 

A’o faia la’u malologa i se tasi aso i lalo o le la’au tele lava o lo’o i talane o le falea’oga, na ou te’i ina ua saofa’i ifo i o’u talane se taule’ale’a. Ua ou le mautonu i lea taimi, ona sa mamao lava ma lo’u mafaufau ia tulaga fa’apea, ona ua tu’u atoa lo’u loto ma lo’u mafaufau i a’u a’oa’oga.

 

Na ou fia fai atu lava i ai e alu ‘ese, ae peita’i, sa ou mafaufau o le a o’o ai a’u i se tulaga ua ou le mafaufau ma ou le fa’atauaina lenei tagata. “Talofa Averia, fa’amolemole pe mafai ona ou nofo atu i le isi itu lea, ona ua tumu tele lalo o le la’au lea e masani ona ou nofonofo ai.”

 

Na ou pupula to’a atu nei i le ali’i ma ou te talitonu ua na iloa mai lo’u le fiafia i le mea ua ia faia, ona sa tatau lava ona fa’anoi muamua mai ae le i nofo ifo i o’u talane. O lona uiga, ua muamua ta le ‘aufa’i, ae mulimuli fa’anoi. “Averia, ou te iloa ua e le le fiafia ia te ta’u, ae ua ou iloa oe, leaga e ave fa’atasi a ta vasega i le Polofesa o Mesa.”

 

Ua na o lo’u fa’atau pupula ane nei i ai, ma o se ali’i e matagofie ma lalelei ona foliga, o se ali’i fo’i e maualuga ma tino lelei. O ona la’ei na ou iloa ai o se ali’i e sau mai se aiga e pei o lo’u aiga, o se tagata fo’i e iloa ona ava ma fa’aaloalo. Na tu’u atu nei i ai lo’u lima ma ma fa’atalofa loa. O lea taimi, o lo’o mata’i mai uma ma’ua e isi ali’i ma tama’ita’i a’oga, ae ia te a’u lava ia, o le fa’aaloalo o le loto maualalo ma le alofa i so’o se tagata o a’oa’oga ia sa fautua mai ai si o’u tina tausi o Ana ina ia ou faia, ona avea ai lea o a’u ma tagata tausa’afia.

 

“Lau susuga, o lea ua e iloa lo’u igoa, ae ou te le iloa lou igoa, o ai la lou suafa, aua e tatau ona motu le pa ae ua iloa, ae le o le alu pogisa ai lava ne i te’i se isi ua fetaui ma se pou uila.”

 

Ua ‘ata’ata si ali’i, ma tilotilo mai ia te a’u, “O lo’u igoa o Valentino.”