Fagogo: Alofa, se ia tiga

Vaega: 37

 

Malo le soifua manuia i le mamalu o le atunu’u, i lou alafa’i mai i fanuga lelei i lenei taeao fou i le alofa ma le agalelei o le Atua, ae alo maia o le toe fa’aauauina lenei o la tatou tala fa’asolo, Alofa, se ia tiga.

 

Ua amata a’u a’oa’oga ma o mataupu fo’i sa ou a’oa’o ai, o ni mataupu ua sili ona faigata. Ma sa ou tapena fo’i e tali atu i ai aemaise ai o le fesoasoani malosi mai a si o’u tina tausi o Ana, e ala lea i lona fa’amalosi a’u mai ia te a’u, ma le tapenaina o mea uma mo a’u. Sa lilo i lo’u manatu, o aso uma lava out e alu ai i la’u a’oga, e le misi le valaa’u mai a si o’u tama ma talatalanoa ma Ana, o lona uiga, e le ave’ese a’u mai le loto ma le mafaufau o si o’u tama.

 

Atonu fo’i ua ma’ea ona ia faitau i le tusi sa tusia e si o’u tina o Elisapeta lea na alu ma ia, fa’atasi ai ma lona ata matagofie ma le aulelei o lo’u tina. Na i’u lava ina fa’apea ifo o’u mafaufauga, “Si tama’ita’i o Makerita, e soli i vae o lo’u tina, ua ou ‘ata nei ma ou fa’apea ifo, ai a iloa a’u e Ana lo’u tina tausi ua otegia fo’i a’u.

 

Ua fa’asolosolo pea a’u a’oa’oga, ma ua ou iloa lava atonu e i’u i le manuia si a’u taumafaiga pe afai lava o le finagalo lea o le Atua. O taeao uma ae ou te le i usu i la’u a’oga, e le misi la ma tatalo ma Ana, o afiafi fo’i o le a ma momoe e le misi la ma talosaga i le Atua, e fa’afetaia ai Lona alofa ma Lona agalelei i mea uma.

 

Ina ua tu’ua la’u a’oga i se tasi aso ma ua ou taunu’u ane i le fale, ua te’i lava ua le taofiofia lo’u mafaufau i si o’u tama. Na ou fa’apea ifo nei, po’o le mea o ma’i, po’o i ai se mea o tupu i lo matou aiga. Na ou a’apa ane nei i la’u telefoni ma ou vala’au loa i lo’u fia fa’alogo i le leo o si o’u tama ua ou misia.

 

Ua tatagi le telefoni i totonu o lo matou fale, ma ou te iloa lelei lava le tulaga o lo’o i ai le telefoni, sa leai se tasi na taliina mai. Na ou toe vili, pe fa’afa lava ona tatagi, ae tali mai loa e le tagata. Na ou fesili muamua lava po’o ai, ona e to’atele tagata faigaluega o lo’o galulue i totonu o le fale a o’u matua.

 

Na sau le tali, o ia o le tagata faigaluega, ae ou te fa’atali atu se i vala’au se isi e alu ane i le telefoni. Na ou fiu e fa’atalitali e leai se tasi na alu ane e tali mai i la’u vala’au atu. Na toe tu’u nei i lalo le telefoni ma ou tilotilo atu i fafo i le matagofie o le toagala’au ma o le togala’au sa ma o atu ma si o’u tina tausi, o lo’o i ai, ae ua galue ai nei Ana e toe fa’amatagofie atili.

 

Ua ‘ese lava la’u fa’alogo i lea taimi, ua oso a’e lo’u popole ma e foliga mai o lo’o i ai se mea o lo’o tupu i lo matou aiga. Na ou tu a’e nei i luga ma ou savali atu loa i le isi itu o le fale o lo’o nofo nofo mai ai lo’u tina tausi o Ana ma faitau lana tusi.

 

Na iloa lelei mai lava e Ana e i ai le mea o lo’o o’u popole ai, ma na i’u lava ina fesili mai ia te a’u. “Averia, e i ai se mea o e popole ai?” Na ou tali atu ua ou popole lava i si o’u tama po’o ma’i pe i ai fo’i se mea o tupu i lo matou aiga.

 

“Averia, ‘aua e te popole, sa ma talanoa ma lou tama i le aso, o lo’o malosi lava ma manuia ia, o lo’o momoli mai ona alofa’aga mo oe.”

 

E faia pea

 

 

Comment Here