Ads by Google Ads by Google

Fagogo: Alofa, se ia tiga

Vaega: 31

 

“Averia Rosa Elisapeta si a’u tama pele, e le lava upu ou te fa’ailoa atu ai ia te oe si a’u tama, lo’u alofa. Ua ou faia lenei tusi ma le o’otia o lo’u loto fa’atasi ai ma lo’u naunauta’iga, ia e maua lenei tusi pe afai e tusa ai ma le finagalo o le Atua i lou olaga tuputupu a’e…..ou te fia fa’ailoa atu ia te oe si a’u tama pele e to’atasi, e leai lava se tasi e mafaia ona ave’ese lo’u alofa mai ia te oe…..se’i iloga e tu’u ifo lo’u tino i le tu’ugamau ona fa’atoa mavae lea….Ou te fia ta’u atu ia te oe si a’u tama pele, afai o le a e maua lenei tusi, ona avea lea ma vai fofo mo oe, i taimi o faigata ma mafatiaga e o’o atu ia te oe.”

 

Ua le mafai ona taofiofi lo’u loto mafatia i lea taimi, ma na i’u ai lava ina ou le mafaia ona tatali le maligi ifo o o’u loimata, sa ou taumafai e taofiofi, peita’i, ua le mafai lava.

 

“Averia, si a’u tama pele, ia ‘aua ‘aua lava ne i o’o ni manatu ia te oe, ua ou le alofa ia te oe, ua ou tu’u lafoa’i ia te oe, pe ua ou le mana’o ia te oe….ua na o le Atua e silafia lo’u loto Averia, ua na o le Atua fo’i o lo’o silafia o’u fa’alogona tiga o lo’o i ai nei.”

 

Na ou tepa a’e nei i luga ma tau soloi o’u loimata, ona ua pa’u mai nei ma ua su su ai le tusi mai i si o’u tina.

 

“Averia, sa ma fetaui ma lou tama o Mikaele i Amerika, ma sa ma ao’oga fa’atasi ai. O le amataga lea o le ma feiloa’iga ma lou tama. Ua mafana le ma mafutaga, sa fusia i le alofa i so’o se mea lava. E ui ina sa faigata ia i ma’ua le tulaga o a ma a’oa’oga, ae sa ma galulue fa’atasi, e fesoasoani le tasi i le isi, ina ia taunu’u lo ma fa’amoemoe, ia ma fa’atasi ma ma mafuta i aso uma o le olaga. Na ma taumafai ina ia fa’ai’uina i le manuia a ma a’oa’oga, ma na taunu’u lava, i le fesoasoani mai o le Atua ia i ma’ua.”

 

Ua ou toe tepa a’e i luga i lea taimi, e ui lava ina faigata ia te a’u, ae sa ou taumafai nei e mafaufau i le fa’amatalaga a lo’u tama lea na ta’u mai ai ia te a’u le la mafutaga ma lo’u tina. E sa’o lava le tala a lo’u tama na fai mai ia te a’u.

 

Ua toe fa’aauau la’u faitau, “Averia, si a’u tama pele, e ui ina matuitui ma tiga lo’u alofa i lou tama, ae maise ai o lo’u tu’ua o oe e te lua mafuta ma lou tama, ae sa ou faia, ona o lo’u va’ai alofa i le aunagi mai a matua o lou tama ia te a’u. O lo’o i totonu o le pusa lenei, lou pepa fanau, e te iloa ai, o oe o la’u tama moni na ifo mai i lo’u manava. Ma e leai se tasi e mafai ona ia fa’aluaina oe ia te a’u, e leai lava Averia.”

 

Ua le matu o’u loimata, ua tau le mafai ai ona faitau le tusi a si o’u tina, ua sola fo’i le loto tele sa i a te a’u i lea taimi, ae ua ufitia nei i le fa’anoanoa.

 

“Averia, afai lava e i ai ni ou alofa mo a’u lou tina, ia e alofa ma fa’amagalo mai a’u. Afai o e fiafia, ona ou fiafia ai lea, afai o feagai oe ma ni mafatiaga, ona ou mafatia ai fo’i lea, afai o lutia oe i fa’anoanoaga, ona ou fa’anoanoa ai lea….ae ia e fiafia Averia….o a lava mea uma na tutupu i lo ma va ma lou tama, ia e alofa fa’amagalo i ma’ua ma Mikaele.”

 

“O lou tama, o se tagata e loto alofa, e usita’i, ma e loto maualalo. Ina ua uma ona ou fanaua oe i Amerika, sa mana’o lava lou tama ma te o i Peretania, ona o lona mana’o, se i va’ai ona matua ia te oe. E ui fo’i i le le malilie o o’u matua, ae sa ou faia lava, ona o lo’u alofa i lou tama ae maise ai o lona mana’oga. Na avea lo’u usita’i i lou tama ma ala na leaga ai lo matou va ma o’u matua i Amerika. Ma na lafo mai le tala a lo’u tama ia te a’u, e le toe fia va’ai ia te a’u, o le a le toe ta’ua a’u o sona afafine. E ui i ia mea tiga uma ma lo’u alofa i o’u matua, ae ua sili  lo’u alofa i lou tama ona ua maua oe, o fua na o le alofa moni ma o le ala lea na ma o ai loa i Peretania.”

 

Na ou toe tepa a’e i luga ma tau soloi o’u mata i lea taimi, ae lilo i o’u manatu o lo’o mata’i lelei mai a’u e le ave ta’avale, ou te le i ano lava i ai, ae ua toe fa’aauau pea la’u faitau i le tusi a si o’u tina na fai mo a’u.

 

E faia pea