Ads by Google Ads by Google

Fagogo: Alofa, se ia tiga

Vaega: 30

 

I la matou feiloa’iga ma le Komiti Fa’afoe a le kamupani fa’apea ma loia a lo’u tama, ua manino ai le mata o le vai i mea uma lava o lo’o fa’afeagai ma le kamupani, ae maise ai lo’u tama.

 

Ua ou iloa mea uma lava ma a tonu o le mana’oga lea o si o’u tama, ma o le mea fo’i lea sa ia nauanu ai ina ia ma o ane i le ofisa, se i fa’ailoa ma fa’amanino mai ia te a’u mea uma.

 

Fa’atoa ou iloa ai foi, e ono fale’aiga tetele o lo’o i totonu o Peretania o lo’o pulea e le kamupani a lo’u tama, na ou manatua ai i lea taimi le vave ona fa’atino o le ‘aiga sa matou auai ma tagata uma o le au faigaluega, ona o lea o lo’o pulea e lo’u tama.

 

Na ou iloa nei i lo’u tama o le igoa o lenei toeaina o Afa (Author McDonalds, o se tama ua leva ona galue i totonu o le kamupani ma e sau mai le atunu’u o Amerika, lea o lo’o i ai nei si o’u tina moni na ou iloa ai le lalolagi. Ina ua ma’ea mea uma, sa toe talanoa mai lo’u tama e fa’apea, “O le taimi lenei, o le a ta’atia mea uma, pau le mea e sili ona taua, o lea ua iloa uma e Averia mea uma, ae o le a fa’atali, se i ma’ea mai a’oa’oga a Averia, ona tau ave loa lea e ia lo’u tulaga i totonu o le kaupani. Na ou lagona lo’u fiafia tele i lea taimi, ona ua fa’ailoa e lo’u tama ma ua ia talitonu fo’i ou te mafaia la’u a’oga e pei ona ou talosaga ai ia te ia.

 

Ua ou toe alu nei na o a’u i lo matou fale ae nofo lo’u tama i le ofisa, ona ua uma ona fai a ma tala, ma ua ou iloa fo’i mea uma. Na fai si o’u popole i lo’u alu o le a ou alu ai nei, ona ua ou iloa lelei lava le mea o le a tupu.

 

Peita’i, sa ou lagona lo’u loto tele ona o lea ua ma’ea ona ma talanoa ma si o’u tama, o le a fa’aauau a’u a’oa’oga e sa’ili ai lo’u fa’ailoga fa’aloia, ua uma fo’i ona ia faia mea uma, a fai e ma’ea mai la’u a’oga ona ou tula’i ai lea e va’ai le kamupani i lalo o lana fa’amalumaluga.

 

Ua ma fa’amavae nei ma lo’u tama ma ua uma ona fa’atonu le ave ta’avale e momoli a’u i le fale i lea taimi. Ae ou te le i alu  ese mai le ofisa tutotonu o lo’u tama, sa muamua lava ma talatalanoa ma le toeaina o Afa. Ua fa’amatala mai e Afa ia te a’u, le matagofie o le Malo o Amerika sa ia toe ta’ua fo’i lo’u tina, na te iloa lelei lava, ma o le ala lea na fai mai ai ia te a’u, e leai se ‘ese’ese o ma’ua ma lo’u tina.

 

Na ou oso nei i totonu o le ta’avale, ma na ou a’apa muamua lava i le pusa lea na tu’u mai e Ana ia te a’u. Ua alu ‘ese le ta’avale ma ua ma aga’i atu loa i le auala e taunu’u atu ai i le nofoaga o lo’o matou nonofo ai. Na ou lagona nei, ua fia maua lava se nofoaga filemu, se i o’u nofonofo ai ma faitau tusi ia na tu’u mai e Ana ia te a’u.

 

Na ou iloa atu le popole o le ali’i ave ta’avale, ona ua uma ona fa’atonu e lo’u tama ia momoli sa’o a’u i le fale, ae sa ou fai atu e ‘aua le popole, ona ua ou mo’omia se taimi filemu ou te mafaufau ai.

 

Na ou savali loa aga’i atu i le isi itu lea o lo’o i ai se vaitafe e le tele tele, ma o lo’o feoa’i mai ai luga ia pato lapopo’a lava e valu. Na ou saofa’i ifo nei i luga o le nofoa o lo’o i ai, ma ou toe tilotilo tasi atu lava i le vaitafe lenei.

 

Na ou a’apa atu nei i totonu o le pusa ma tu’u mai i fafo le tusi sa tusia e si o’u tina moni o Elisapeta. Na ou lagona lava le filemu o lo’u loto ma lo’u mafaufau i lea taimi, ma ua tatala loa ma le tusi na tusia e si o’u tina mai tausaga e tele na va valavala ai, ae na teu lava ma taofi e si lo’omatua o Lita mo a’u.

 

O upu nei o le tusi, “Averia Rosa Elisapeta, si a’u tama pele…..”

 

E faia pea