Ads by Google Ads by Google

Fagogo: Alofa, se ia tiga

Vaega: 29

 

Na tapuni nei e lo’u tama le telefoni ma toe savali mai i le mea lea ou te nofo atu ai. “Averia, o lea o le a o mai loia tatou te talatalanoa, ia e fa’alogo lelei ma ia teu i lou loto mea uma lava o le a e fa’alogo i ai, ua ma’ea fo’i ona faia e loia pepa ma fa’amaumauga o mea uma lava, ona ou tautala atu loa lea ia te oe i le mea e ao ona fai.”

 

E leai se taimi na ou maua, ou te toe tali atu ai i lo’u tama, ona o le taimi tonu lea, ua matala mai ai le faitoto’a ma savavali mai loa i totonu ia tamaloloa ia na matou feiloa’i muamua, fa’atasi ma le toeaina lea ou te fia iloa nei mai i lo’u tama po’o ai, ae maise fo’i o isi tamaloloa e to’a fa ma le tama’ita’i e to’atasi.

 

Na ma savavali atu nei ma ma nonofo loa i le isi itu o le laulau, ae nonofo uma tagata nei i le isi itu o le laulau. Na savali atu nei lo’u tama ma le tele o faila o lo’o u’u mai ma sa’ofa’i i le ulu o le laulau, ma ua amata loa ma la matou mataupu.

 

Na ou iloa lelei lava le fa’asi’usi’u mata mai ia te a’u o se tasi ali’i pe a i le luasefulu fa o ona tausaga, na ou te’i fo’i i lo’u va’ai atu e la’ititi lava, a’o lea ua o’o i se tulaga maualuga i totonu o le kamupani a lo’u tama. Na ou tilotilo atu nei i ai ma ou ‘ata’ata atu i ai, ae na o le lulu mai o lona ulu ia te a’u ma nofo ifo i lalo.

 

Na toe mou vave ‘ese la’u ‘ata’ata i lea taimi, ae foliga mai ua ou tau ma, ona sa i ai lo’u manatu o le a fa’apea fo’i ona ‘ata’ata mai le ali’i lenei ia te a’u. Ua ou maoaluma ai i lea tulaga, na ou toe tilotilo atu nei i ai, ae ua le ea a’e lava i luga, ua na o le tilotilo i ana pepa ia ua fofola nei i ona luma.

 

Na fa’ate’ia o’u manatu ia ina ua a’apa mai le toeaina lenei ma u’u atu lo’u lima, “Averia, ‘aua e te fefe, ‘aua fo’i e te popole ae ia to’a lelei la’u va’ai, ia matala fo’i lau fa’alogo, ua e fa’alogo mai ia te a’u.”

 

Na ou tali ioe ma ou ‘ata ane i le toeaina lenei, na fa’apea mai le isi ana fa’aupuga, “E tutusa lelei oe ma lou tina, ma’imau e, pe ana fa’apea, o lou tina lea e nonofo ma lou tama.”

 

Ai ua toe manatua e le toeaina, o lea e saofa’i lo’u tama, o le ala lea na taletale ai ma fogifogi lona isu ma tilotilo loa i ana pepa ia ua i luga o le laulau.

 

Na tilotilo mai nei si o’u tama ia te a’u ma ‘ata, ma toe tepa ane i le toeaina lenei, ma lulu lona ulu. Na fa’apea loa upu a lo’u tama, “A’o le i amataina la tatou fonotaga, e muamua lava ona ou momoli atu la’u fa’afetai tele, ona o lo outou taimi ua fa’aavanoaina tatou te talanoa ai i mataupu e pei ona ma o’o mai ai ma lo’u afafine o Averia.”

 

“Ou te mana’o ia outou fa’ailoa i a Averia, tulaga o lo’o i ai le kamupani fa’apea ma mea uma lava o lo’o fa’agasolo ai taualumaga a le kamupani ae maise ai o isi kamupani o lo’o i atunu’u i fafo, ina ia malamalama ai Averia i mea uma.”

 

Na toe tilotilo mai nei le ali’i lea ia te a’u, ae na ou tali atu i ai i la’u ‘ata tau fa’ase’e ma fa’apea ifo o’u mafaufauga, “Tama, polili teuteu mai si a ta mea a, ae ‘aua le fia tama leaga, aua e vave ai ona mamao i totonu lou mata.”

 

E faia pea