Fagogo: Alofa, se ia tiga

Vaega: 113

 

Taeao manuia i le mamalu o lea atunu’u i lou alafa’i mai i le manuia i lenei taeao fou i le alofa ma le agalelei o le Atua. E ao ai ona o tatou fa’afo’i le vi’iga i le Atua ona o lona agalelei lea o lo’o tatou ‘oa’oa ai pea i faleseu ma o tatou sa’a ai i ma’a o malie i aso uma o lo tatou ola. Ae alo maia, o le a toe fa’aauau atu la tatou tala fa’asolo e pei ona masani ai, Alofa, se ia tiga.

 

Alofa, o se upu e taula’i uma i ai mea uma, o le loto maualalo, loto fa’amagalo, loto mama, uiga filemu ma le le losilosi vale, e fa’apalepale ma onosa’i. O uiga lelei uma ia, e taunu’u uma lava i le upu e tasi, ALOFA. Ma’imau e, pe ana fa’apea tatou te maua uma nei vituti taua, ae ia o tatou taumafai pea ina ia o tatou maua, ia maua le fa’apalepale ma le onosa’i, ona avea ai lea o i tatou ma fanau a le Atua, ma ia o tatou manatua pea, e lelei Ieova, e fa’avavau Lona alofa.

 

O le ma mafutaga ma Tino, ua pei o le susulu o le la i aso uma. O lona naunau mai ia te a’u, ae maise ai o lona galue malosi e fa’atino mea uma, ua avea lea ma fa’amama avega mo a’u. E leai se mea e tasi e fa’aletonu i lo ma va, o a fo’i mea e tatau ona ma fetufa’ai ai, e fa’aavanoa lava o ma taimi ma te talatalanoa ai, aua le aga’i i luma o mea uma. 

 

E i ai fo’i nai taimi ae le tele tele, e tau oso ai le vevela, ae o mea uma lava e vevela e mafai lava ona fa’amalulu lelei, ma i’u ai ina toe foi i le lelei mea uma i totonu o le aiga. Ua avea si o’u tina tausi o Ana fa’apea si ona tama, ma fesoasoani malosi mo i ma’ua i le taumafaiga o mea uma. O le tele o aso e fa’aavanoa lava e Tino lona taimi e galulue fa’atasi ai ma Tomasi i le fa’amautuina o isi mea I totonu o lo matou aiga. Ae ua avea fo’i lo matou fa’atasi ai ma si o’u tama, ua mafai ai ona fa’ataunu’u isi mea lelei i totonu o lo matou aiga. O ona manatu lelei sa fafau ai le tele o nisi mea e aga’i ai i luma matou uma.

 

E le misi le vala’au mai a si o’u tuagane la’ititi o Ioane e asi mai lo ma tama fa’apea ma matou. Na ou fa’alogologo atu i le isi a ma talanoaga, e foliga mai ua toe fia sau Ioane ae o lona fa’alavelave e le i ma’ea ana a’oga, o lona tausaga i’u lea ua amata, ae foliga mai ua misia e Ioane lo matou aiga. Na toe fa’apea mai si o’u tuagane, “Averia, ua ou fiu e vala’au Makerita ma Peteru, e le talia maia la’u telefoni.”

 

Ina ua lafo mai e lo’u tuagane le tala lea, na ou lagona ai lava le fa’anoanoa, fa’atasi ai ma lo’u manatu, pe o le a saga fai lava I fea lenei mea, pe uma fo’i afea lenei vesiga o lo’o fai pea. “Ioane, va’ai oe lo’u tuagane, ua uma ona ma talanoa atu ma lo ta tama ia te oe, ia fa’ata’atia ‘ese uma lava manatu na, ae ia tu’u tasi atu lou loto ma lou mafaufau i lau a’oga, matou te o atu uma lava i lou fa’au’uga, ae ia e onosa’i i lau a’oga ma ia e loto tele Ioane, ua e fa’alogo mai.”

 

Na fai si umi o o’u fa’atalitali mo se tali mai a lo’u tuagane, ae na ou fa’alogo atu nei o fa’apea mai lana tali, “Averia…ua lelei, o le a ou usita’i lava ae ou te alofa tele atu i si o ta tama, Averia….va’ai lelei Dad, fa’amolemole, ou te alofa atu fo’i mo oulua ma Tino, fa’apea si lo’omatua o Ana ma si toeaina o Tomasi….alofa tele atu mo oe…tofa Averia….”

 

Ua tu’u nei i lalo le telefoni, ma sa fai lava si umi o o’u saofa’i pea, ae na fa’ate’ia ina ua savali mai si o’u tama i le mea o lo’o o’u nofo ai. “Averia, o ai na vala’au mai.?” Ua ou punou nei i lalo e tau nana mai i lo’u tama le tafe ifo o o’u loimata i lea taimi. “Dad, o Ioane lea na vala’au mai, e asi mai tatou, o lo’o alofa mai lava mo oe Dad, o lo’o manuia lava ia, fai mai e ‘aua e te popole atu ia te ia, o lo’o lelei lava mea uma o lana a’oga.”

 

Na tu nei lo’u tama ma fa’ataupupula mai ia te a’u, “Averia, e i ai se mea o tupu, o le a le mea ua e tagi ai, tautala mai ia te a’u, e i ai se mea ua tupu.?”

 

“Dad, e leai, ua uma lava ona ma talanoa ma si o’u tuagane, ua ou misia lava, ae tatou fa’amalolosi ma tu’u atu le lagolago ia te ia ina ia i’u manuia ai ana a’oga.”

 

E faia pea

Comment Here